11. гаггара̄суттам̣

219. екам̣ самайам̣ бхагава̄ чампа̄йам̣ вихарати гаггара̄йа поккхаран̣ийа̄ тӣре махата̄ бхиккхусан̇гхена саддхим̣ пан̃чаматтехи бхиккхусатехи саттахи ча упа̄сакасатехи саттахи ча упа̄сика̄сатехи анекехи ча девата̄сахассехи. тйа̄ссудам̣ бхагава̄ атирочати [ативирочати (ка.)] ван̣н̣ена чева йасаса̄ ча. атха кхо а̄йасмато ван̇гӣсасса етадахоси – ‘‘айам̣ кхо бхагава̄ чампа̄йам̣ вихарати гаггара̄йа поккхаран̣ийа̄ тӣре махата̄ бхиккхусан̇гхена саддхим̣ пан̃чаматтехи бхиккхусатехи саттахи ча упа̄сакасатехи саттахи ча упа̄сика̄сатехи анекехи ча девата̄сахассехи. тйа̄ссудам̣ бхагава̄ атирочати ван̣н̣ена чева йасаса̄ ча. йам̣нӯна̄хам̣ бхагавантам̣ саммукха̄ са̄руппа̄йа га̄тха̄йа абхиттхавеййа’’нти.

атха кхо а̄йасма̄ ван̇гӣсо ут̣т̣ха̄йа̄сана̄ екам̣сам̣ уттара̄сан̇гам̣ каритва̄ йена бхагава̄ тенан̃джалим̣ пан̣а̄метва̄ бхагавантам̣ етадавоча – ‘‘пат̣ибха̄ти мам̣, бхагава̄, пат̣ибха̄ти мам̣, сугата̄’’ти. ‘‘пат̣ибха̄ту там̣, ван̇гӣса̄’’ти бхагава̄ авоча. атха кхо а̄йасма̄ ван̇гӣсо бхагавантам̣ саммукха̄ са̄руппа̄йа га̄тха̄йа абхиттхави –

‘‘чандо йатха̄ вигатавала̄хаке набхе,

вирочати вигатамалова бха̄н̣ума̄;

евампи ан̇гӣраса твам̣ маха̄муни,

атирочаси йасаса̄ саббалока’’нти.