9. сундарикасуттам̣

195. екам̣ самайам̣ бхагава̄ косалесу вихарати сундарика̄йа надийа̄ тӣре. тена кхо пана самайена сундарикабха̄радва̄джо бра̄хман̣о сундарика̄йа надийа̄ тӣре аггим̣ джухати, аггихуттам̣ паричарати. атха кхо сундарикабха̄радва̄джо бра̄хман̣о аггим̣ джухитва̄ аггихуттам̣ паричаритва̄ ут̣т̣ха̄йа̄сана̄ саманта̄ чатуддиса̄ анувилокеси – ‘‘ко ну кхо имам̣ хабйасесам̣ бхун̃джеййа̄’’ти? аддаса̄ кхо сундарикабха̄радва̄джо бра̄хман̣о бхагавантам̣ ан̃н̃атарасмим̣ руккхамӯле сасӣсам̣ па̄рутам̣ нисиннам̣. дисва̄на ва̄мена хаттхена хабйасесам̣ гахетва̄ даккхин̣ена хаттхена каман̣д̣алум̣ гахетва̄ йена бхагава̄ тенупасан̇ками. атха кхо бхагава̄ сундарикабха̄радва̄джасса бра̄хман̣асса падасаддена сӣсам̣ вивари. атха кхо сундарикабха̄радва̄джо бра̄хман̣о ‘мун̣д̣о айам̣ бхавам̣, мун̣д̣ако айам̣ бхава’нти татова пуна ниваттитука̄мо ахоси. атха кхо сундарикабха̄радва̄джасса бра̄хман̣асса етадахоси – ‘мун̣д̣а̄пи хи идхекачче бра̄хман̣а̄ бхаванти; йам̣нӯна̄хам̣ там̣ упасан̇камитва̄ джа̄тим̣ пуччхеййа’нти.

атха кхо сундарикабха̄радва̄джо бра̄хман̣о йена бхагава̄ тенупасан̇ками; упасан̇камитва̄ бхагавантам̣ етадавоча – ‘ким̣джаччо бхава’нти?

‘‘ма̄ джа̄тим̣ пуччха чаран̣ан̃ча пуччха,

кат̣т̣ха̄ хаве джа̄йати джа̄таведо;

нӣча̄кулӣнопи муни дхитима̄,

а̄джа̄нӣйо хоти хирӣниседхо.

‘‘саччена данто дамаса̄ упето,

ведантагӯ вуситабрахмачарийо;

йан̃н̃опанӣто тамупавхайетха,

ка̄лена со джухати даккхин̣еййе’’ти.

‘‘аддха̄ суйит̣т̣хам̣ сухутам̣ мама йидам̣,

йам̣ та̄дисам̣ ведагумаддаса̄ми;

тумха̄диса̄нан̃хи адассанена,

ан̃н̃о джано бхун̃джати хабйасеса’’нти.

‘‘бхун̃джату бхавам̣ готамо. бра̄хман̣о бхава’’нти.

‘‘га̄тха̄бхигӣтам̣ ме абходжанеййам̣,

сампассатам̣ бра̄хман̣а неса дхаммо;

га̄тха̄бхигӣтам̣ пануданти буддха̄,

дхамме сати бра̄хман̣а вуттиреса̄.

‘‘ан̃н̃ена ча кевалинам̣ махесим̣,

кхӣн̣а̄савам̣ куккуччавӯпасантам̣;

аннена па̄нена упат̣т̣хахассу,

кхеттан̃хи там̣ пун̃н̃апеккхасса хотӣ’’ти.

‘‘атха касса ча̄хам̣, бхо готама, имам̣ хабйасесам̣ даммӣ’’ти? ‘‘на кхва̄хам̣, бра̄хман̣а, пасса̄ми садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа йассесо хабйасесо бхутто самма̄ парин̣а̄мам̣ гаччхеййа ан̃н̃атра, бра̄хман̣а, татха̄гатасса ва̄ татха̄гатаса̄вакасса ва̄. тена хи твам̣, бра̄хман̣а, там̣ хабйасесам̣ аппахарите ва̄ чхад̣д̣ехи аппа̄н̣аке ва̄ удаке опила̄пехӣ’’ти.

атха кхо сундарикабха̄радва̄джо бра̄хман̣о там̣ хабйасесам̣ аппа̄н̣аке удаке опила̄песи. атха кхо со хабйасесо удаке паккхитто чиччит̣а̄йати чит̣ичит̣а̄йати сандхӯпа̄йати сампадхӯпа̄йати. сеййатха̄пи на̄ма пха̄ло [лохо (ка.)] дивасам̣сантатто [дивасасантатто (сӣ. сйа̄. кам̣. пӣ.)] удаке паккхитто чиччит̣а̄йати чит̣ичит̣а̄йати сандхӯпа̄йати сампадхӯпа̄йати; евамева со хабйасесо удаке паккхитто чиччит̣а̄йати чит̣ичит̣а̄йати сандхӯпа̄йати сампадхӯпа̄йати.

атха кхо сундарикабха̄радва̄джо бра̄хман̣о сам̣вигго ломахат̣т̣хаджа̄то йена бхагава̄ тенупасан̇ками; упасан̇камитва̄ екамантам̣ ат̣т̣ха̄си. екамантам̣ т̣хитам̣ кхо сундарикабха̄радва̄джам̣ бра̄хман̣ам̣ бхагава̄ га̄тха̄хи аджджхабха̄си –

‘‘ма̄ бра̄хман̣а да̄ру сама̄даха̄но,

суддхим̣ аман̃н̃и бахиддха̄ хи етам̣;

на хи тена суддхим̣ кусала̄ ваданти,

йо ба̄хирена парисуддхимиччхе.

‘‘хитва̄ ахам̣ бра̄хман̣а да̄руда̄хам̣

аджджхаттамевуджджалайа̄ми [аджджхаттамева джалайа̄ми (сӣ. сйа̄. кам̣. пӣ.)] джотим̣;

ниччаггинӣ ниччасама̄хитатто,

арахам̣ ахам̣ брахмачарийам̣ чара̄ми.

‘‘ма̄но хи те бра̄хман̣а кха̄рибха̄ро,

кодхо дхумо бхасмани мосаваджджам̣;

дживха̄ суджа̄ хадайам̣ джотит̣ха̄нам̣,

атта̄ суданто пурисасса джоти.

‘‘дхаммо рахадо бра̄хман̣а сӣлатиттхо,

ана̄вило саббхи сатам̣ пасаттхо;

йаттха хаве ведагуно сина̄та̄,

аналлагатта̄ва [аналлӣнагатта̄ва (сӣ. пӣ. ка.)] таранти па̄рам̣.

‘‘саччам̣ дхаммо сам̣йамо брахмачарийам̣,

маджджхе сита̄ бра̄хман̣а брахмапатти;

са туджджубхӯтесу намо карохи,

тамахам̣ нарам̣ дхаммаса̄рӣти брӯмӣ’’ти.

евам̣ вутте, сундарикабха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… ан̃н̃атаро ча пана̄йасма̄ бха̄радва̄джо арахатам̣ ахосӣ’’ти.