10. бахудхӣтарасуттам̣

196. екам̣ самайам̣ бхагава̄ косалесу вихарати ан̃н̃атарасмим̣ ванасан̣д̣е. тена кхо пана самайена ан̃н̃атарасса бха̄радва̄джаготтасса бра̄хман̣асса чатуддаса балӣбадда̄ нат̣т̣ха̄ хонти. атха кхо бха̄радва̄джаготто бра̄хман̣о те балӣбадде гавесанто йена со ванасан̣д̣о тенупасан̇ками; упасан̇камитва̄ аддаса бхагавантам̣ тасмим̣ ванасан̣д̣е нисиннам̣ паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄. дисва̄на йена бхагава̄ тенупасан̇ками; упасан̇камитва̄ бхагавато сантике има̄ га̄тха̄йо абха̄си –

‘‘на хи нӯнимасса [наханӯнимасса (сӣ. сйа̄. кам̣.)] саман̣асса, балӣбадда̄ чатуддаса;

аджджасат̣т̣хим̣ на диссанти, тена̄йам̣ саман̣о сукхӣ.

‘‘на хи нӯнимасса саман̣асса, тила̄кхеттасми па̄пака̄;

екапан̣н̣а̄ дупан̣н̣а̄ [двипан̣н̣а̄ (сӣ. пӣ.)] ча, тена̄йам̣ саман̣о сукхӣ.

‘‘на хи нӯнимасса саман̣асса, туччхакот̣т̣хасми мӯсика̄;

уссол̣хика̄йа наччанти, тена̄йам̣ саман̣о сукхӣ.

‘‘на хи нӯнимасса саман̣асса, сантха̄ро саттама̄сико;

уппа̄т̣акехи сан̃чханно, тена̄йам̣ саман̣о сукхӣ.

‘‘на хи нӯнимасса саман̣асса, видхава̄ сатта дхӣтаро;

екапутта̄ дупутта̄ [двипутта̄ (сӣ. пӣ.)] ча, тена̄йам̣ саман̣о сукхӣ.

‘‘на хи нӯнимасса саман̣асса, пин̇гала̄ тилака̄хата̄;

соттам̣ па̄дена бодхети, тена̄йам̣ саман̣о сукхӣ.

‘‘на хи нӯнимасса саман̣асса, паччӯсамхи ин̣а̄йика̄;

детха детха̄ти чоденти, тена̄йам̣ саман̣о сукхӣ’’ти.

‘‘на хи майхам̣ бра̄хман̣а, балӣбадда̄ чатуддаса;

аджджасат̣т̣хим̣ на диссанти, тена̄хам̣ бра̄хман̣а̄ сукхӣ.

‘‘на хи майхам̣ бра̄хман̣а, тила̄кхеттасми па̄пака̄;

екапан̣н̣а̄ дупан̣н̣а̄ ча, тена̄хам̣ бра̄хман̣а̄ сукхӣ.

‘‘на хи майхам̣ бра̄хман̣а, туччхакот̣т̣хасми мӯсика̄;

уссол̣хика̄йа наччанти, тена̄хам̣ бра̄хман̣а̄ сукхӣ.

‘‘на хи майхам̣ бра̄хман̣а, сантха̄ро саттама̄сико;

уппа̄т̣акехи сан̃чханно, тена̄хам̣ бра̄хман̣а̄ сукхӣ.

‘‘на хи майхам̣ бра̄хман̣а, видхава̄ сатта дхӣтаро;

екапутта̄ дупутта̄ ча, тена̄хам̣ бра̄хман̣а̄ сукхӣ.

‘‘на хи майхам̣ бра̄хман̣а, пин̇гала̄ тилака̄хата̄;

соттам̣ па̄дена бодхети, тена̄хам̣ бра̄хман̣а̄ сукхӣ.

‘‘на хи майхам̣ бра̄хман̣а, паччӯсамхи ин̣а̄йика̄;

детха детха̄ти чоденти, тена̄хам̣ бра̄хман̣а̄ сукхӣ’’ти.

евам̣ вутте, бха̄радва̄джаготто бра̄хман̣о бхагавантам̣ етадавоча – ‘‘абхиккантам̣, бхо готама, абхиккантам̣, бхо готама! сеййатха̄пи, бхо готама, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа – чаккхуманто рӯпа̄ни даккхантӣти; евамева бхота̄ готамена анекапарийа̄йена дхаммо пака̄сито. еса̄хам̣ бхавантам̣ готамам̣ саран̣ам̣ гаччха̄ми дхамман̃ча бхиккхусан̇гхан̃ча. лабхеййа̄хам̣ бхото готамасса сантике паббаджджам̣, лабхеййам̣ упасампада’’нти.

алаттха кхо бха̄радва̄джаготто бра̄хман̣о бхагавато сантике паббаджджам̣, алаттха упасампадам̣. ачирӯпасампанно пана̄йасма̄ бха̄радва̄джо еко вӯпакат̣т̣хо аппаматто а̄та̄пӣ пахитатто вихаранто начирассева – йассаттха̄йа кулапутта̄ саммадева ага̄расма̄ анага̄рийам̣ паббаджанти, тадануттарам̣ – брахмачарийапарийоса̄нам̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа виха̄си. ‘‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄’’ти аббхан̃н̃а̄си. ан̃н̃атаро ча пана̄йасма̄ бха̄радва̄джо арахатам̣ ахосӣти.

арахантавагго пат̣хамо.

тассудда̄нам̣ –

дханан̃джа̄нӣ ча аккосам̣, асуриндам̣ билан̇гикам̣;

ахим̣сакам̣ джат̣а̄ чева, суддхикан̃чева аггика̄;

сундарикам̣ бахудхӣтарена ча те даса̄ти.