4. арун̣аватӣсуттам̣

185. евам̣ ме сутам̣ – екам̣ самайам̣ бхагава̄ са̄ваттхийам̣ вихарати…пе… татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘бхӯтапуббам̣, бхиккхаве, ра̄джа̄ ахоси арун̣ава̄ на̄ма. ран̃н̃о кхо пана, бхиккхаве, арун̣авато арун̣аватӣ на̄ма ра̄джадха̄нӣ ахоси. арун̣аватим̣ кхо пана, бхиккхаве, ра̄джадха̄ним̣ [арун̣аватийам̣ кхо пана бхиккхаве ра̄джадха̄нийам̣ (пӣ. ка.)] сикхӣ бхагава̄ арахам̣ самма̄самбуддхо упанисса̄йа виха̄си. сикхисса кхо пана, бхиккхаве, бхагавато арахато самма̄самбуддхасса абхибхӯсамбхавам̣ на̄ма са̄вакайугам̣ ахоси аггам̣ бхаддайугам̣. атха кхо, бхиккхаве, сикхӣ бхагава̄ арахам̣ самма̄самбуддхо абхибхум̣ бхиккхум̣ а̄мантеси – ‘а̄йа̄ма, бра̄хман̣а, йена ан̃н̃атаро брахмалоко тенупасан̇камисса̄ма, йа̄ва бхаттасса ка̄ло бхависсатӣ’ти. ‘евам̣, бханте’ти кхо бхиккхаве, абхибхӯ бхиккху сикхисса бхагавато арахато самма̄самбуддхасса паччассоси. атха кхо, бхиккхаве, сикхӣ бхагава̄ арахам̣ самма̄самбуддхо абхибхӯ ча бхиккху – сеййатха̄пи на̄ма балава̄ пурисо самин̃джитам̣ ва̄ ба̄хам̣ паса̄реййа, паса̄ритам̣ ва̄ ба̄хам̣ самин̃джеййа евамева – арун̣аватийа̄ ра̄джадха̄нийа̄ антарахита̄ тасмим̣ брахмалоке па̄турахесум̣.

‘‘атха кхо, бхиккхаве, сикхӣ бхагава̄ арахам̣ самма̄самбуддхо абхибхум̣ бхиккхум̣ а̄мантеси – ‘пат̣ибха̄ту, бра̄хман̣а, там̣ брахмуно ча брахмапариса̄йа ча брахмапа̄рисаджджа̄нан̃ча дхаммӣ катха̄’ти. ‘евам̣, бханте’ти кхо, бхиккхаве, абхибхӯ бхиккху сикхисса бхагавато арахато самма̄самбуддхасса пат̣иссутва̄, брахма̄нан̃ча брахмапарисан̃ча брахмапа̄рисадждже ча дхаммийа̄ катха̄йа сандассеси сама̄дапеси самуттеджеси сампахам̣сеси. татра судам̣, бхиккхаве, брахма̄ ча брахмапариса̄ ча брахмапа̄рисаджджа̄ ча уджджха̄йанти кхиййанти [кхӣйанти (сӣ. сйа̄. кам̣. пӣ.)] випа̄ченти – ‘аччхарийам̣ вата, бхо, аббхутам̣ вата бхо, катхан̃хи на̄ма саттхари саммукхӣбхӯте са̄вако дхаммам̣ десессатӣ’’’ти!

‘‘атха кхо, бхиккхаве, сикхӣ бхагава̄ арахам̣ самма̄самбуддхо абхибхум̣ бхиккхум̣ а̄мантеси – ‘уджджха̄йанти кхо те, бра̄хман̣а, брахма̄ ча брахмапариса̄ ча брахмапа̄рисаджджа̄ ча – аччхарийам̣ вата, бхо, аббхутам̣ вата, бхо, катхан̃хи на̄ма саттхари саммукхӣбхӯте са̄вако дхаммам̣ десессатӣти! тена хи твам̣ бра̄хман̣а, бхиййосоматта̄йа брахма̄нан̃ча брахмапарисан̃ча брахмапа̄рисадждже ча сам̣веджехӣ’ти. ‘евам̣, бханте’ти кхо, бхиккхаве, абхибхӯ бхиккху сикхисса бхагавато арахато самма̄самбуддхасса пат̣иссутва̄ диссама̄ненапи ка̄йена дхаммам̣ десеси, адиссама̄ненапи ка̄йена дхаммам̣ десеси, диссама̄ненапи хет̣т̣химена упад̣д̣хака̄йена адиссама̄нена упаримена упад̣д̣хака̄йена дхаммам̣ десеси, диссама̄ненапи упаримена упад̣д̣хака̄йена адиссама̄нена хет̣т̣химена упад̣д̣хака̄йена дхаммам̣ десеси. татра судам̣, бхиккхаве, брахма̄ ча брахмапариса̄ ча брахмапа̄рисаджджа̄ ча аччхарийаббхутачиттаджа̄та̄ ахесум̣ – ‘аччхарийам̣ вата, бхо, аббхутам̣ вата, бхо, саман̣асса махиддхиката̄ маха̄нубха̄вата̄’’’ти!

‘‘атха кхо абхибхӯ бхиккху сикхим̣ бхагавантам̣ арахантам̣ самма̄самбуддхам̣ етадавоча – ‘абхиджа̄на̄ми кхва̄хам̣, бханте, бхиккхусан̇гхасса маджджхе еварӯпим̣ ва̄чам̣ бха̄сита̄ – пахоми кхва̄хам̣ а̄вусо, брахмалоке т̣хито сахассилокадха̄тум̣ [сахассӣлокадха̄тум̣ (сӣ. сйа̄. кам̣. пӣ.)] сарена вин̃н̃а̄пету’нти. ‘етасса, бра̄хман̣а, ка̄ло, етасса, бра̄хман̣а, ка̄ло; йам̣ твам̣, бра̄хман̣а, брахмалоке т̣хито сахассилокадха̄тум̣ сарена вин̃н̃а̄пеййа̄сӣ’ти. ‘евам̣, бханте’ти кхо, бхиккхаве, абхибхӯ бхиккху сикхисса бхагавато арахато самма̄самбуддхасса пат̣иссутва̄ брахмалоке т̣хито има̄ га̄тха̄йо абха̄си –

‘‘а̄рамбхатха [а̄раббхатха (саббаттха)] никкаматха [никкхаматха (сӣ. пӣ.)], йун̃джатха буддхаса̄сане;

дхуна̄тха маччуно сенам̣, нал̣а̄га̄рам̣ва кун̃джаро.

‘‘йо имасмим̣ дхаммавинайе, аппаматто вихассати;

паха̄йа джа̄тисам̣са̄рам̣, дуккхассантам̣ кариссатӣ’’ти.

‘‘атха кхо, бхиккхаве, сикхӣ ча бхагава̄ арахам̣ самма̄самбуддхо абхибхӯ ча бхиккху брахма̄нан̃ча брахмапарисан̃ча брахмапа̄рисадждже ча сам̣веджетва̄ – сеййатха̄пи на̄ма…пе… тасмим̣ брахмалоке антарахита̄ арун̣аватийа̄ ра̄джадха̄нийа̄ па̄турахесум̣. атха кхо, бхиккхаве, сикхӣ бхагава̄ арахам̣ самма̄самбуддхо бхиккхӯ а̄мантеси – ‘ассуттха но, тумхе, бхиккхаве, абхибхусса бхиккхуно брахмалоке т̣хитасса га̄тха̄йо бха̄сама̄насса̄’ти? ‘ассумха кхо майам̣, бханте, абхибхусса бхиккхуно брахмалоке т̣хитасса га̄тха̄йо бха̄сама̄насса̄’ти. ‘йатха̄ катхам̣ пана тумхе, бхиккхаве, ассуттха абхибхусса бхиккхуно брахмалоке т̣хитасса га̄тха̄йо бха̄сама̄насса̄’’’ти? евам̣ кхо майам̣, бханте, ассумха абхибхусса бхиккхуно брахмалоке т̣хитасса га̄тха̄йо бха̄сама̄насса –

‘‘а̄рамбхатха никкаматха, йун̃джатха буддхаса̄сане;

дхуна̄тха маччуно сенам̣, нал̣а̄га̄рам̣ва кун̃джаро.

‘‘йо имасмим̣ дхаммавинайе, аппаматто вихассати;

паха̄йа джа̄тисам̣са̄рам̣, дуккхассантам̣ кариссатӣ’’ти.

‘‘‘евам̣ кхо майам̣, бханте, ассумха абхибхусса бхиккхуно брахмалоке т̣хитасса га̄тха̄йо бха̄сама̄насса̄’ти. ‘са̄дху са̄дху, бхиккхаве; са̄дху кхо тумхе, бхиккхаве! ассуттха абхибхусса бхиккхуно брахмалоке т̣хитасса га̄тха̄йо бха̄сама̄насса̄’’’ти.

идамавоча бхагава̄, аттамана̄ те бхиккхӯ бхагавато бха̄ситам̣ абхинандунти.