1. санан̇кума̄расуттам̣

182. евам̣ ме сутам̣ – екам̣ самайам̣ бхагава̄ ра̄джагахе вихарати саппинӣтӣре. атха кхо брахма̄ санан̇кума̄ро абхикканта̄йа раттийа̄ абхиккантаван̣н̣о кевалакаппам̣ саппинӣтӣрам̣ обха̄сетва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо брахма̄ санан̇кума̄ро бхагавато сантике имам̣ га̄тхам̣ абха̄си –

‘‘кхаттийо сет̣т̣хо джанетасмим̣, йе готтапат̣иса̄рино;

виджджа̄чаран̣асампанно, со сет̣т̣хо девама̄нусе’’ти.

идамавоча брахма̄ санан̇кума̄ро. саманун̃н̃о саттха̄ ахоси. атха кхо брахма̄ санан̇кума̄ро ‘‘саманун̃н̃о ме саттха̄’’ти бхагавантам̣ абхива̄детва̄ падаккхин̣ам̣ катва̄ таттхевантарадха̄йӣти.