2. самиддхисуттам̣

158. екам̣ самайам̣ бхагава̄ саккесу вихарати сила̄ватийам̣. тена кхо пана самайена а̄йасма̄ самиддхи бхагавато авидӯре аппаматто а̄та̄пӣ пахитатто вихарати. атха кхо а̄йасмато самиддхисса рахогатасса пат̣исаллӣнасса евам̣ четасо паривитакко удапа̄ди – ‘‘ла̄бха̄ вата ме, суладдхам̣ вата ме, йасса ме саттха̄ арахам̣ самма̄самбуддхо. ла̄бха̄ вата ме, суладдхам̣ вата ме, йва̄хам̣ евам̣ сва̄ккха̄те дхаммавинайе паббаджито. ла̄бха̄ вата ме, суладдхам̣ вата ме, йасса ме сабрахмача̄рино сӣлаванто калйа̄н̣адхамма̄’’ти. атха кхо ма̄ро па̄пима̄ а̄йасмато самиддхисса четаса̄ четопаривитаккаман̃н̃а̄йа йена̄йасма̄ самиддхи тенупасан̇ками; упасан̇камитва̄ а̄йасмато самиддхисса авидӯре махантам̣ бхайабхеравам̣ саддамака̄си, аписсудам̣ патхавӣ ман̃н̃е ундрӣйати.

атха кхо а̄йасма̄ самиддхи йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно а̄йасма̄ самиддхи бхагавантам̣ етадавоча – ‘‘идха̄хам̣, бханте, бхагавато авидӯре аппаматто а̄та̄пӣ пахитатто вихара̄ми. тасса майхам̣, бханте, рахогатасса пат̣исаллӣнасса евам̣ четасо паривитакко удапа̄ди – ‘ла̄бха̄ вата ме, суладдхам̣ вата ме, йасса ме саттха̄ арахам̣ самма̄самбуддхо. ла̄бха̄ вата ме, суладдхам̣ вата ме, йва̄хам̣ евам̣ сва̄ккха̄те дхаммавинайе паббаджито. ла̄бха̄ вата ме, суладдхам̣ вата ме, йасса ме сабрахмача̄рино сӣлаванто калйа̄н̣адхамма̄’ти. тасса майхам̣, бханте, авидӯре маха̄бхайабхеравасаддо ахоси, аписсудам̣ патхавӣ ман̃н̃е ундрӣйатӣ’’ти.

‘‘неса̄, самиддхи, патхавӣ ундрӣйати. ма̄ро есо па̄пима̄ туйхам̣ вичаккхукамма̄йа а̄гато. гаччха твам̣, самиддхи, таттхева аппаматто а̄та̄пӣ пахитатто вихара̄хӣ’’ти. ‘‘евам̣, бханте’’ти кхо а̄йасма̄ самиддхи бхагавато пат̣иссутва̄ ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми. дутийампи кхо а̄йасма̄ самиддхи таттхева аппаматто а̄та̄пӣ пахитатто виха̄си. дутийампи кхо а̄йасмато самиддхисса рахогатасса пат̣исаллӣнасса…пе… дутийампи кхо ма̄ро па̄пима̄ а̄йасмато самиддхисса четаса̄ четопаривитаккаман̃н̃а̄йа…пе… аписсудам̣ патхавӣ ман̃н̃е ундрӣйати. атха кхо а̄йасма̄ самиддхи ма̄рам̣ па̄пимантам̣ га̄тха̄йа аджджхабха̄си –

‘‘саддха̄йа̄хам̣ паббаджито, ага̄расма̄ анага̄рийам̣;

сати пан̃н̃а̄ ча ме буддха̄, читтан̃ча сусама̄хитам̣;

ка̄мам̣ карассу рӯпа̄ни, нева мам̣ бйа̄дхайиссасӣ’’ти.

атха кхо ма̄ро па̄пима̄ ‘‘джа̄на̄ти мам̣ самиддхи бхиккхӯ’’ти дуккхӣ думмано таттхевантарадха̄йӣти.