3. годхикасуттам̣

159. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. тена кхо пана самайена а̄йасма̄ годхико исигилипассе вихарати ка̄л̣асила̄йам̣. атха кхо а̄йасма̄ годхико аппаматто а̄та̄пӣ пахитатто вихаранто са̄майикам̣ четовимуттим̣ пхуси. атха кхо а̄йасма̄ годхико тамха̄ са̄майика̄йа четовимуттийа̄ париха̄йи. дутийампи кхо а̄йасма̄ годхико аппаматто а̄та̄пӣ пахитатто вихаранто са̄майикам̣ четовимуттим̣ пхуси. дутийампи кхо а̄йасма̄ годхико тамха̄ са̄майика̄йа четовимуттийа̄ париха̄йи. татийампи кхо а̄йасма̄ годхико аппаматто а̄та̄пӣ пахитатто вихаранто са̄майикам̣ четовимуттим̣ пхуси. татийампи кхо а̄йасма̄ годхико тамха̄…пе… париха̄йи. чатуттхампи кхо а̄йасма̄ годхико аппаматто…пе… вимуттим̣ пхуси. чатуттхампи кхо а̄йасма̄ годхико тамха̄…пе… париха̄йи. пан̃чамампи кхо а̄йасма̄ годхико…пе… четовимуттим̣ пхуси. пан̃чамампи кхо а̄йасма̄…пе… вимуттийа̄ париха̄йи. чхат̣т̣хампи кхо а̄йасма̄ годхико аппаматто а̄та̄пӣ пахитатто вихаранто са̄майикам̣ четовимуттим̣ пхуси. чхат̣т̣хампи кхо а̄йасма̄ годхико тамха̄ са̄майика̄йа четовимуттийа̄ париха̄йи. саттамампи кхо а̄йасма̄ годхико аппаматто а̄та̄пӣ пахитатто вихаранто са̄майикам̣ четовимуттим̣ пхуси.

атха кхо а̄йасмато годхикасса етадахоси – ‘‘йа̄ва чхат̣т̣хам̣ кхва̄хам̣ са̄майика̄йа четовимуттийа̄ парихӣно. йам̣нӯна̄хам̣ саттхам̣ а̄хареййа’’нти. атха кхо ма̄ро па̄пима̄ а̄йасмато годхикасса четаса̄ четопаривитаккаман̃н̃а̄йа йена бхагава̄ тенупасан̇ками; упасан̇камитва̄ бхагавантам̣ га̄тха̄хи аджджхабха̄си –

‘‘маха̄вӣра маха̄пан̃н̃а, иддхийа̄ йасаса̄ джала;

саббаверабхайа̄тӣта, па̄де ванда̄ми чаккхума.

‘‘са̄вако те маха̄вӣра, маран̣ам̣ маран̣а̄бхибхӯ;

а̄кан̇кхати четайати, там̣ ниседха джутиндхара.

‘‘катхан̃хи бхагава̄ туйхам̣, са̄вако са̄сане рато;

аппаттама̄насо секкхо, ка̄лам̣ кайира̄ джанесута̄’’ти.

тена кхо пана самайена а̄йасмато годхикена саттхам̣ а̄харитам̣ хоти. атха кхо бхагава̄ ‘‘ма̄ро айам̣ па̄пима̄’’ ити видитва̄ ма̄рам̣ па̄пимантам̣ га̄тха̄йа аджджхабха̄си –

‘‘еван̃хи дхӣра̄ куббанти, на̄вакан̇кханти джӣвитам̣;

самӯлам̣ тан̣хамаббуйха, годхико париниббуто’’ти.

атха кхо бхагава̄ бхиккхӯ а̄мантеси – ‘‘а̄йа̄ма, бхиккхаве, йена исигилипассам̣ ка̄л̣асила̄ тенупасан̇камисса̄ма йаттха годхикена кулапуттена саттхам̣ а̄харита’’нти. ‘‘евам̣, бханте’’ти кхо те бхиккхӯ бхагавато паччассосум̣.

атха кхо бхагава̄ самбахулехи бхиккхӯхи саддхим̣ йена исигилипассам̣ ка̄л̣асила̄ тенупасан̇ками. аддаса̄ кхо бхагава̄ а̄йасмантам̣ годхикам̣ дӯратова ман̃чаке виваттаккхандхам̣ сема̄нам̣ [сеййама̄нам̣ (сйа̄. кам̣.), соппама̄нам̣ (ка.)]. тена кхо пана самайена дхӯма̄йитаттам̣ тимира̄йитаттам̣ гаччхатева пуримам̣ дисам̣, гаччхати паччхимам̣ дисам̣, гаччхати уттарам̣ дисам̣, гаччхати даккхин̣ам̣ дисам̣, гаччхати уддхам̣, гаччхати адхо, гаччхати анудисам̣.

атха кхо бхагава̄ бхиккхӯ а̄мантеси – ‘‘пассатха но тумхе, бхиккхаве, етам̣ дхӯма̄йитаттам̣ тимира̄йитаттам̣ гаччхатева пуримам̣ дисам̣, гаччхати паччхимам̣ дисам̣, гаччхати уттарам̣ дисам̣, гаччхати даккхин̣ам̣ дисам̣, гаччхати уддхам̣, гаччхати адхо, гаччхати анудиса’’нти? ‘‘евам̣, бханте’’. ‘‘есо кхо, бхиккхаве, ма̄ро па̄пима̄ годхикасса кулапуттасса вин̃н̃а̄н̣ам̣ саманвесати – ‘каттха годхикасса кулапуттасса вин̃н̃а̄н̣ам̣ патит̣т̣хита’нти? аппатит̣т̣хитена ча, бхиккхаве, вин̃н̃а̄н̣ена годхико кулапутто париниббуто’’ти. атха кхо ма̄ро па̄пима̄ белувапан̣д̣увӣн̣ам̣ а̄да̄йа йена бхагава̄ тенупасан̇ками; упасан̇камитва̄ бхагавантам̣ га̄тха̄йа аджджхабха̄си –

‘‘уддхам̣ адхо ча тирийам̣, диса̄ анудиса̄ свахам̣;

анвесам̣ на̄дхигаччха̄ми, годхико со кухим̣ гато’’ти.

‘‘йо [со (сӣ. пӣ.)] дхӣро дхитисампанно, джха̄йӣ джха̄нарато сада̄;

ахораттам̣ ануйун̃джам̣, джӣвитам̣ аника̄майам̣.

‘‘джетва̄на маччуно [бхетва̄ намучино (сӣ.)] сенам̣, ана̄гантва̄ пунаббхавам̣;

самӯлам̣ тан̣хамаббуйха, годхико париниббуто’’ти.

‘‘тасса сокапаретасса, вӣн̣а̄ каччха̄ абхассатха;

тато со думмано йаккхо, таттхевантарадха̄йатха̄’’ти [таттхевантарадха̄йитха̄ти (сйа̄. кам̣.), таттхева антарадха̄йӣти (ка.)].