1. самбахуласуттам̣

157. евам̣ ме сутам̣ – екам̣ самайам̣ бхагава̄ саккесу вихарати сила̄ватийам̣. тена кхо пана самайена самбахула̄ бхиккхӯ бхагавато авидӯре аппаматта̄ а̄та̄пино пахитатта̄ вихаранти. атха кхо ма̄ро па̄пима̄ бра̄хман̣аван̣н̣ам̣ абхинимминитва̄ махантена джат̣ан̣д̣увена аджинаккхипаниваттхо джин̣н̣о гопа̄насиван̇ко гхуругхурупасса̄сӣ удумбарадан̣д̣ам̣ гахетва̄ йена те бхиккхӯ тенупасан̇ками; упасан̇камитва̄ те бхиккхӯ етадавоча – ‘‘дахара̄ бхаванто паббаджита̄ сусӯ ка̄л̣акеса̄ бхадрена йоббанена саманна̄гата̄ пат̣хамена вайаса̄ аниккӣл̣ита̄вино ка̄месу. бхун̃джанту бхаванто ма̄нусаке ка̄ме. ма̄ сандит̣т̣хикам̣ хитва̄ ка̄ликам̣ анудха̄виттха̄’’ти. ‘‘на кхо майам̣, бра̄хман̣а, сандит̣т̣хикам̣ хитва̄ ка̄ликам̣ анудха̄ва̄ма. ка̄ликан̃ча кхо майам̣, бра̄хман̣а, хитва̄ сандит̣т̣хикам̣ анудха̄ва̄ма. ка̄лика̄ хи, бра̄хман̣а, ка̄ма̄ вутта̄ бхагавата̄ бахудуккха̄ бахупа̄йа̄са̄, а̄дӣнаво еттха бхиййо. сандит̣т̣хико айам̣ дхаммо ака̄лико ехипассико опанеййико паччаттам̣ ведитаббо вин̃н̃ӯхӣ’’ти. евам̣ вутте, ма̄ро па̄пима̄ сӣсам̣ окампетва̄ дживхам̣ нилла̄летва̄ тивиса̄кхам̣ нала̄т̣е нала̄т̣икам̣ вут̣т̣ха̄петва̄ дан̣д̣амолуббха пакка̄ми.

атха кхо те бхиккхӯ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘идха майам̣, бханте, бхагавато авидӯре аппаматта̄ а̄та̄пино пахитатта̄ вихара̄ма. атха кхо, бханте, ан̃н̃атаро бра̄хман̣о махантена джат̣ан̣д̣увена аджинаккхипаниваттхо джин̣н̣о гопа̄насиван̇ко гхуругхурупасса̄сӣ удумбарадан̣д̣ам̣ гахетва̄ йена майам̣ тенупасан̇ками; упасан̇камитва̄ амхе етадавоча – ‘дахара̄ бхаванто паббаджита̄ сусӯ ка̄л̣акеса̄ бхадрена йоббанена саманна̄гата̄ пат̣хамена вайаса̄ аниккӣл̣ита̄вино ка̄месу. бхун̃джанту бхаванто ма̄нусаке ка̄ме. ма̄ сандит̣т̣хикам̣ хитва̄ ка̄ликам̣ анудха̄виттха̄’ти. евам̣ вутте, майам̣, бханте, там̣ бра̄хман̣ам̣ етадавочумха – ‘на кхо майам̣, бра̄хман̣а, сандит̣т̣хикам̣ хитва̄ ка̄ликам̣ анудха̄ва̄ма. ка̄ликан̃ча кхо майам̣, бра̄хман̣а, хитва̄ сандит̣т̣хикам̣ анудха̄ва̄ма. ка̄лика̄ хи, бра̄хман̣а, ка̄ма̄ вутта̄ бхагавата̄ бахудуккха̄ бахупа̄йа̄са̄, а̄дӣнаво еттха бхиййо. сандит̣т̣хико айам̣ дхаммо ака̄лико ехипассико опанеййико паччаттам̣ ведитаббо вин̃н̃ӯхӣ’ти. евам̣ вутте, бханте, со бра̄хман̣о сӣсам̣ окампетва̄ дживхам̣ нилла̄летва̄ тивиса̄кхам̣ нала̄т̣е нала̄т̣икам̣ вут̣т̣ха̄петва̄ дан̣д̣амолуббха пакканто’’ти.

‘‘несо, бхиккхаве, бра̄хман̣о. ма̄ро есо па̄пима̄ тумха̄кам̣ вичаккхукамма̄йа а̄гато’’ти. атха кхо бхагава̄ етаматтхам̣ видитва̄ та̄йам̣ вела̄йам̣ имам̣ га̄тхам̣ абха̄си –

‘‘йо дуккхамаддаккхи йатонида̄нам̣,

ка̄месу со джанту катхам̣ намеййа;

упадхим̣ видитва̄ сан̇готи локе,

тассева джанту винайа̄йа сиккхе’’ти.