10. раджджасуттам̣

156. екам̣ самайам̣ бхагава̄ косалесу вихарати химавантападесе [химавантапассе (сӣ.)] аран̃н̃акут̣ика̄йам̣. атха кхо бхагавато рахогатасса пат̣исаллӣнасса евам̣ четасо паривитакко удапа̄ди – ‘‘сакка̄ ну кхо раджджам̣ ка̄ретум̣ аханам̣ агха̄тайам̣ аджинам̣ аджа̄пайам̣ асочам̣ асоча̄пайам̣ дхаммена̄’’ти?

атха кхо ма̄ро па̄пима̄ бхагавато четаса̄ четопаривитаккаман̃н̃а̄йа йена бхагава̄ тенупасан̇ками; упасан̇камитва̄ бхагавантам̣ етадавоча – ‘‘ка̄рету, бханте, бхагава̄ раджджам̣, ка̄рету, сугато, раджджам̣ аханам̣ агха̄тайам̣ аджинам̣ аджа̄пайам̣ асочам̣ асоча̄пайам̣ дхаммена̄’’ти. ‘‘ким̣ пана ме твам̣, па̄пима, пассаси йам̣ мам̣ твам̣ евам̣ вадеси – ‘ка̄рету, бханте, бхагава̄ раджджам̣, ка̄рету сугато, раджджам̣ аханам̣ агха̄тайам̣ аджинам̣ аджа̄пайам̣ асочам̣ асоча̄пайам̣ дхаммена̄’’’ти? ‘‘бхагавата̄ кхо, бханте, чатта̄ро иддхипа̄да̄ бха̄вита̄ бахулӣката̄ йа̄нӣката̄ ваттхуката̄ анут̣т̣хита̄ паричита̄ сусама̄раддха̄. а̄кан̇кхама̄но ча, бханте, бхагава̄ химавантам̣ паббатара̄джам̣ суван̣н̣ам̣ твева адхимуччеййа суван̣н̣ан̃ча панасса̄’’ти [суван̣н̣апаббатасса̄ти (сӣ. сйа̄. кам̣.), суван̣н̣ан̃ча паббатасса̄ти (пӣ.)].

‘‘паббатасса суван̣н̣асса, джа̄тарӯпасса кевало;

двитта̄ва на̄ламекасса, ити видва̄ саман̃чаре.

‘‘йо дуккхамаддаккхи йатонида̄нам̣,

ка̄месу со джанту катхам̣ намеййа;

упадхим̣ видитва̄ сан̇готи локе,

тассева джанту винайа̄йа сиккхе’’ти.

атха кхо ма̄ро па̄пима̄ ‘‘джа̄на̄ти мам̣ бхагава̄, джа̄на̄ти мам̣ сугато’’ти дуккхӣ думмано таттхевантарадха̄йӣти.

дутийо вагго.

тассудда̄нам̣ –

па̄са̄н̣о сӣхо сакаликам̣ [саккхаликам̣ (ка.)], патирӯпан̃ча ма̄насам̣;

паттам̣ а̄йатанам̣ пин̣д̣ам̣, кассакам̣ раджджена те даса̄ти.