5. дутийама̄рапа̄сасуттам̣

141. екам̣ самайам̣ бхагава̄ ба̄ра̄н̣асийам̣ вихарати исипатане мигада̄йе. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘мутта̄хам̣, бхиккхаве, саббапа̄сехи йе дибба̄ йе ча ма̄нуса̄. тумхепи, бхиккхаве, мутта̄ саббапа̄сехи йе дибба̄ йе ча ма̄нуса̄. чаратха, бхиккхаве, ча̄рикам̣ бахуджанахита̄йа бахуджанасукха̄йа лока̄нукампа̄йа аттха̄йа хита̄йа сукха̄йа деваманусса̄нам̣. ма̄ екена две агамиттха. десетха, бхиккхаве, дхаммам̣ а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ пака̄сетха. санти сатта̄ аппараджаккхаджа̄тика̄, ассаваната̄ дхаммасса париха̄йанти. бхависсанти дхаммасса ан̃н̃а̄та̄ро. ахампи, бхиккхаве, йена урувела̄ сена̄нигамо тенупасан̇камисса̄ми дхаммадесана̄йа̄’’ти. атха кхо ма̄ро па̄пима̄ йена бхагава̄ тенупасан̇ками; упасан̇камитва̄ бхагавантам̣ га̄тха̄йа аджджхабха̄си –

‘‘баддхоси саббапа̄сехи, йе дибба̄ йе ча ма̄нуса̄;

маха̄бандханабаддхоси, на ме саман̣а моккхасӣ’’ти.

‘‘мутта̄хам̣ саббапа̄сехи, йе дибба̄ йе ча ма̄нуса̄;

маха̄бандханамуттомхи, нихато твамаси антака̄’’ти.

атха кхо ма̄ро па̄пима̄…пе… таттхевантарадха̄йӣти.