2. хаттхира̄джаван̣н̣асуттам̣

138. евам̣ ме сутам̣ – екам̣ самайам̣ бхагава̄ урувела̄йам̣ вихарати наджджа̄ неран̃джара̄йа тӣре аджапа̄ланигродхамӯле пат̣хама̄бхисамбуддхо. тена кхо пана самайена бхагава̄ раттандхака̄ратимиса̄йам̣ аббхока̄се нисинно хоти, дево ча екамекам̣ пхуса̄йати. атха кхо ма̄ро па̄пима̄ бхагавато бхайам̣ чхамбхитаттам̣ ломахам̣сам̣ уппа̄детука̄мо махантам̣ хаттхира̄джаван̣н̣ам̣ абхинимминитва̄ йена бхагава̄ тенупасан̇ками. сеййатха̄пи на̄ма маха̄арит̣т̣хако ман̣и, евамасса сӣсам̣ хоти. сеййатха̄пи на̄ма суддхам̣ рӯпийам̣, евамасса данта̄ хонти. сеййатха̄пи на̄ма махатӣ нан̇галӣса̄ [нан̇галасӣса̄ (пӣ. ка.)], евамасса сон̣д̣о хоти. атха кхо бхагава̄ ‘‘ма̄ро айам̣ па̄пима̄’’ ити видитва̄ ма̄рам̣ па̄пимантам̣ га̄тха̄йа аджджхабха̄си –

‘‘сам̣сарам̣ дӣгхамаддха̄нам̣, ван̣н̣ам̣ катва̄ субха̄субхам̣;

алам̣ те тена па̄пима, нихато твамаси антака̄’’ти.

атха кхо ма̄ро па̄пима̄ ‘‘джа̄на̄ти мам̣ бхагава̄, джа̄на̄ти мам̣ сугато’’ти дуккхӣ думмано таттхевантарадха̄йӣти.