1. тапокаммасуттам̣

137. евам̣ ме сутам̣ – екам̣ самайам̣ бхагава̄ урувела̄йам̣ вихарати наджджа̄ неран̃джара̄йа тӣре аджапа̄ланигродхамӯле пат̣хама̄бхисамбуддхо. атха кхо бхагавато рахогатасса пат̣исаллӣнасса евам̣ четасо паривитакко удапа̄ди – ‘‘мутто ватамхи та̄йа дуккарака̄рика̄йа. са̄дху мутто ватамхи та̄йа анаттхасам̣хита̄йа дуккарака̄рика̄йа. са̄дху ватамхи мутто бодхим̣ самаджджхага’’нти [са̄дху т̣хито сато бодхим̣ самаджджхеганти (сӣ. пӣ.), са̄дху ватамхи сатто бодхисамаджджхагӯти (сйа̄. кам̣.)].

атха кхо ма̄ро па̄пима̄ бхагавато четаса̄ четопаривитаккаман̃н̃а̄йа йена бхагава̄ тенупасан̇ками; упасан̇камитва̄ бхагавантам̣ га̄тха̄йа аджджхабха̄си –

‘‘тапокамма̄ апаккамма, йена на суджджханти ма̄н̣ава̄;

асуддхо ман̃н̃аси суддхо, суддхимагга̄ апараддхо’’ [суддхимаггамапараддхо (сӣ. сйа̄. кам̣. пӣ.)] ти.

атха кхо бхагава̄ ‘‘ма̄ро айам̣ па̄пима̄’’ ити видитва̄ ма̄рам̣ па̄пимантам̣ га̄тха̄хи аджджхабха̄си –

‘‘анаттхасам̣хитам̣ н̃атва̄, йам̣ кин̃чи амарам̣ тапам̣ [апарам̣ тапам̣ (ка.)];

саббам̣ наттха̄вахам̣ хоти, пхийа̄риттам̣ва дхаммани [ваммани (сӣ.), дхамманим̣ (пӣ.), джамманим̣ (ка.) еттха̄йам̣ дхаммасаддо саккате дханванам̣-саддена садисо марува̄чакоти ведитаббо, йатха̄ дал̣хадхамма̄типадам̣].

‘‘сӣлам̣ сама̄дхи пан̃н̃ан̃ча, маггам̣ бодха̄йа бха̄вайам̣;

паттосми парамам̣ суддхим̣, нихато твамаси антака̄’’ти.

атха кхо ма̄ро па̄пима̄ ‘‘джа̄на̄ти мам̣ бхагава̄, джа̄на̄ти мам̣ сугато’’ти, дуккхӣ думмано таттхевантарадха̄йӣти.