4. иссаттасуттам̣

135. са̄ваттхинида̄нам̣. екамантам̣ нисинно кхо ра̄джа̄ пасенади косало бхагавантам̣ етадавоча – ‘‘каттха ну кхо, бханте, да̄нам̣ да̄табба’’нти? ‘‘йаттха кхо, маха̄ра̄джа, читтам̣ пасӣдатӣ’’ти. ‘‘каттха пана, бханте, диннам̣ махаппхала’’нти? ‘‘ан̃н̃ам̣ кхо етам̣, маха̄ра̄джа, каттха да̄нам̣ да̄таббам̣, ан̃н̃ам̣ панетам̣ каттха диннам̣ махаппхаланти? сӣлавато кхо, маха̄ра̄джа, диннам̣ махаппхалам̣, но татха̄ дуссӣле. тена хи, маха̄ра̄джа, тан̃н̃еветтха пат̣ипуччхисса̄ми. йатха̄, те кхамеййа, татха̄ нам̣ бйа̄кареййа̄си. там̣ ким̣ ман̃н̃аси, маха̄ра̄джа, идха тйасса йуддхам̣ паччупат̣т̣хитам̣ сан̇га̄мо самупабйӯл̣хо [самӯпаббӯл̣хо (сӣ.), самупаббул̣хо (пӣ.)]. атха а̄гаччхеййа кхаттийакума̄ро асиккхито акатахаттхо акатайогго акатӯпа̄сано бхӣру чхамбхӣ утра̄сӣ пала̄йӣ. бхареййа̄си там̣ пурисам̣, аттхо ча те та̄дисена пурисена̄’’ти? ‘‘на̄хам̣, бханте, бхареййам̣ там̣ пурисам̣, на ча ме аттхо та̄дисена пурисена̄’’ти. ‘‘атха а̄гаччхеййа бра̄хман̣акума̄ро асиккхито…пе… атха а̄гаччхеййа вессакума̄ро асиккхито…пе… атха а̄гаччхеййа суддакума̄ро асиккхито…пе… на ча ме аттхо та̄дисена пурисена̄’’ти.

‘‘там̣ ким̣ ман̃н̃аси, маха̄ра̄джа, идха тйасса йуддхам̣ паччупат̣т̣хитам̣ сан̇га̄мо самупабйӯл̣хо. атха а̄гаччхеййа кхаттийакума̄ро сусиккхито катахаттхо катайогго катӯпа̄сано абхӣру аччхамбхӣ анутра̄сӣ апала̄йӣ. бхареййа̄си там̣ пурисам̣, аттхо ча те та̄дисена пурисена̄’’ти? ‘‘бхареййа̄хам̣, бханте, там̣ пурисам̣, аттхо ча ме та̄дисена пурисена̄’’ти. ‘‘атха а̄гаччхеййа бра̄хман̣акума̄ро…пе… атха а̄гаччхеййа вессакума̄ро…пе… атха а̄гаччхеййа суддакума̄ро сусиккхито катахаттхо катайогго катӯпа̄сано абхӣру аччхамбхӣ анутра̄сӣ апала̄йӣ. бхареййа̄си там̣ пурисам̣, аттхо ча те та̄дисена пурисена̄’’ти? ‘‘бхареййа̄хам̣, бханте, там̣ пурисам̣, аттхо ча ме та̄дисена пурисена̄’’ти.

‘‘евамева кхо, маха̄ра̄джа, йасма̄ касма̄ чепи [йасма̄ чепи (сӣ. сйа̄. кам̣. ка.)] кула̄ ага̄расма̄ анага̄рийам̣ паббаджито хоти, со ча хоти пан̃чан̇гавиппахӣно пан̃чан̇гасаманна̄гато, тасмим̣ диннам̣ махаппхалам̣ хоти. катама̄ни пан̃чан̇га̄ни пахӣна̄ни хонти? ка̄маччхандо пахӣно хоти, бйа̄па̄до пахӣно хоти, тхинамиддхам̣ пахӣнам̣ хоти, уддхаччакуккуччам̣ пахӣнам̣ хоти, вичикиччха̄ пахӣна̄ хоти. има̄ни пан̃чан̇га̄ни пахӣна̄ни хонти. катамехи пан̃чахан̇гехи саманна̄гато хоти? асеккхена сӣлаккхандхена саманна̄гато хоти, асеккхена сама̄дхиккхандхена саманна̄гато хоти, асеккхена пан̃н̃а̄ккхандхена саманна̄гато хоти, асеккхена вимуттиккхандхена саманна̄гато хоти, асеккхена вимуттин̃а̄н̣адассанаккхандхена саманна̄гато хоти. имехи пан̃чахан̇гехи саманна̄гато хоти. ити пан̃чан̇гавиппахӣне пан̃чан̇гасаманна̄гате диннам̣ махаппхала’’нти. идамавоча бхагава̄…пе… саттха̄ –

‘‘иссаттам̣ [иссаттхам̣ (сӣ. сйа̄. кам̣.)] балавӣрийан̃ча [балавирийан̃ча (сӣ. сйа̄. кам̣. пӣ.)], йасмим̣ виджджетха ма̄н̣аве;

там̣ йуддхаттхо бхаре ра̄джа̄, на̄сӯрам̣ джа̄типаччайа̄.

‘‘татхева кхантисораччам̣, дхамма̄ йасмим̣ патит̣т̣хита̄;

арийавуттим̣ медха̄вим̣, хӣнаджаччампи пӯджайе.

‘‘ка̄райе ассаме рамме, ва̄сайеттха бахуссуте;

папан̃ча виване кайира̄, дугге сан̇камана̄ни ча.

‘‘аннам̣ па̄нам̣ кха̄данӣйам̣, ваттхасена̄сана̄ни ча;

дадеййа уджубхӯтесу, виппасаннена четаса̄.

‘‘йатха̄ хи мегхо тханайам̣, виджджума̄лӣ сатаккаку;

тхалам̣ ниннан̃ча пӯрети, абхивассам̣ васундхарам̣.

‘‘татхева саддхо сутава̄, абхисан̇кхачча бходжанам̣;

ваниббаке таппайати, аннапа̄нена пан̣д̣ито.

‘‘а̄модама̄но пакирети, детха детха̄ти бха̄сати;

там̣ хисса гаджджитам̣ хоти, девассева павассато;

са̄ пун̃н̃адха̄ра̄ випула̄, да̄та̄рам̣ абхивассатӣ’’ти.