4. пат̣хамасан̇га̄масуттам̣

125. са̄ваттхинида̄нам̣. атха кхо ра̄джа̄ ма̄гадхо аджа̄тасатту ведехипутто чатуран̇гиним̣ сенам̣ саннайхитва̄ ра̄джа̄нам̣ пасенадим̣ косалам̣ аббхуййа̄си йена ка̄си. ассоси кхо ра̄джа̄ пасенади косало – ‘‘ра̄джа̄ кира ма̄гадхо аджа̄тасатту ведехипутто чатуран̇гиним̣ сенам̣ саннайхитва̄ мамам̣ аббхуййа̄то йена ка̄сӣ’’ти. атха кхо ра̄джа̄ пасенади косало чатуран̇гиним̣ сенам̣ саннайхитва̄ ра̄джа̄нам̣ ма̄гадхам̣ аджа̄тасаттум̣ ведехипуттам̣ паччуййа̄си йена ка̄си. атха кхо ра̄джа̄ ча ма̄гадхо аджа̄тасатту ведехипутто ра̄джа̄ ча пасенади косало сан̇га̄месум̣. тасмим̣ кхо пана сан̇га̄ме ра̄джа̄ ма̄гадхо аджа̄тасатту ведехипутто ра̄джа̄нам̣ пасенадим̣ косалам̣ пара̄джеси. пара̄джито ча ра̄джа̄ пасенади косало сакамева [сан̇га̄ма̄ (ка.)] ра̄джадха̄ним̣ са̄ваттхим̣ паччуййа̄си [па̄йа̄си (сӣ. пӣ.)].

атха кхо самбахула̄ бхиккхӯ пуббан̣хасамайам̣ нива̄сетва̄ паттачӣварама̄да̄йа са̄ваттхим̣ пин̣д̣а̄йа пависим̣су. са̄ваттхийам̣ пин̣д̣а̄йа чаритва̄ паччха̄бхаттам̣ пин̣д̣апа̄тапат̣икканта̄ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ –

‘‘идха, бханте, ра̄джа̄ ма̄гадхо аджа̄тасатту ведехипутто чатуран̇гиним̣ сенам̣ саннайхитва̄ ра̄джа̄нам̣ пасенадим̣ косалам̣ аббхуййа̄си йена ка̄си. ассоси кхо, бханте, ра̄джа̄ пасенади косало – ‘ра̄джа̄ кира ма̄гадхо аджа̄тасатту ведехипутто чатуран̇гиним̣ сенам̣ саннайхитва̄ мамам̣ аббхуййа̄то йена ка̄сӣ’ти. атха кхо, бханте, ра̄джа̄ пасенади косало чатуран̇гиним̣ сенам̣ саннайхитва̄ ра̄джа̄нам̣ ма̄гадхам̣ аджа̄тасаттум̣ ведехипуттам̣ паччуййа̄си йена ка̄си. атха кхо, бханте, ра̄джа̄ ча ма̄гадхо аджа̄тасатту ведехипутто ра̄джа̄ ча пасенади косало сан̇га̄месум̣. тасмим̣ кхо пана, бханте, сан̇га̄ме ра̄джа̄ ма̄гадхо аджа̄тасатту ведехипутто ра̄джа̄нам̣ пасенадим̣ косалам̣ пара̄джеси. пара̄джито ча, бханте, ра̄джа̄ пасенади косало сакамева ра̄джадха̄ним̣ са̄ваттхим̣ паччуййа̄сӣ’’ти.

‘‘ра̄джа̄, бхиккхаве, ма̄гадхо аджа̄тасатту ведехипутто па̄памитто па̄пасаха̄йо па̄пасампаван̇ко; ра̄джа̄ ча кхо, бхиккхаве, пасенади косало калйа̄н̣амитто калйа̄н̣асаха̄йо калйа̄н̣асампаван̇ко. аджджева [аджджатан̃ча (сӣ. пӣ.), аджджевам̣ (сйа̄. кам̣.)], бхиккхаве, ра̄джа̄ пасенади косало имам̣ раттим̣ дуккхам̣ сети пара̄джито’’ти. идамавоча…пе…

‘‘джайам̣ верам̣ пасавати, дуккхам̣ сети пара̄джито;

упасанто сукхам̣ сети, хитва̄ джайапара̄джайа’’нти.