3. дон̣апа̄касуттам̣

124. са̄ваттхинида̄нам̣. тена кхо пана самайена ра̄джа̄ пасенади косало дон̣апа̄какурам̣ [дон̣апа̄касудам̣ (сӣ.), дон̣апа̄кам̣ судам̣ (пӣ.)] бхун̃джати. атха кхо ра̄джа̄ пасенади косало бхутта̄вӣ махасса̄сӣ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди.

атха кхо бхагава̄ ра̄джа̄нам̣ пасенадим̣ косалам̣ бхутта̄вим̣ махасса̄сим̣ видитва̄ та̄йам̣ вела̄йам̣ имам̣ га̄тхам̣ абха̄си –

‘‘мануджасса сада̄ сатӣмато,

маттам̣ джа̄нато ладдхабходжане;

танукасса [тану тасса (сӣ. пӣ.)] бхаванти ведана̄,

сан̣икам̣ джӣрати а̄йупа̄лайа’’нти.

тена кхо пана самайена судассано ма̄н̣аво ран̃н̃о пасенадисса косаласса пит̣т̣хито т̣хито хоти. атха кхо ра̄джа̄ пасенади косало судассанам̣ ма̄н̣авам̣ а̄мантеси – ‘‘ехи твам̣, та̄та судассана, бхагавато сантике имам̣ га̄тхам̣ парийа̄пун̣итва̄ мама бхатта̄бхиха̄ре (бхатта̄бхиха̄ре) [( ) сӣ. сйа̄. кам̣. пӣ. поттхакесу наттхи] бха̄са. ахан̃ча те девасикам̣ каха̄пан̣асатам̣ (каха̄пан̣асатам̣) [( ) сӣ. сйа̄. кам̣. поттхакесу наттхи] ниччам̣ бхиккхам̣ паваттайисса̄мӣ’’ти. ‘‘евам̣ дева̄’’ти кхо судассано ма̄н̣аво ран̃н̃о пасенадисса косаласса пат̣иссутва̄ бхагавато сантике имам̣ га̄тхам̣ парийа̄пун̣итва̄ ран̃н̃о пасенадисса косаласса бхатта̄бхиха̄ре судам̣ бха̄сати –

‘‘мануджасса сада̄ сатӣмато,

маттам̣ джа̄нато ладдхабходжане;

танукасса бхаванти ведана̄,

сан̣икам̣ джӣрати а̄йупа̄лайа’’нти.

атха кхо ра̄джа̄ пасенади косало анупуббена на̄л̣икоданапарамата̄йа [на̄л̣икоданаматта̄йа (ка.)] сан̣т̣ха̄си. атха кхо ра̄джа̄ пасенади косало апарена самайена сусалликхитагатто па̄н̣ина̄ гатта̄ни анумаджджанто та̄йам̣ вела̄йам̣ имам̣ уда̄нам̣ уда̄неси – ‘‘убхайена вата мам̣ со бхагава̄ аттхена анукампи – дит̣т̣хадхаммикена чева аттхена сампара̄йикена ча̄’’ти.