10. дутийаапуттакасуттам̣

131. атха кхо ра̄джа̄ пасенади косало дива̄ дивасса йена бхагава̄ тенупасан̇ками; упасан̇камитва̄ екамантам̣ нисиннам̣ кхо ра̄джа̄нам̣ пасенадим̣ косалам̣ бхагава̄ етадавоча – ‘‘ханда, куто ну твам̣, маха̄ра̄джа, а̄гаччхаси дива̄ дивасса̄’’ти?

‘‘идха, бханте, са̄ваттхийам̣ сет̣т̣хи гахапати ка̄лан̇като. тамахам̣ апуттакам̣ са̄патеййам̣ ра̄джантепурам̣ атихаритва̄ а̄гаччха̄ми. сатам̣, бханте, сатасахасса̄ни хиран̃н̃ассева, ко пана ва̄до рӯпийасса! тасса кхо пана, бханте, сет̣т̣хисса гахапатисса еварӯпо бхаттабхого ахоси – кан̣а̄джакам̣ бхун̃джати билан̇гадутийам̣. еварӯпо ваттхабхого ахоси – са̄н̣ам̣ дха̄рети типаккхавасанам̣. еварӯпо йа̄набхого ахоси – джаджджараратхакена йа̄ти пан̣н̣ачхаттакена дха̄рийама̄нена̄’’ти.

‘‘еваметам̣, маха̄ра̄джа, еваметам̣, маха̄ра̄джа! бхӯтапуббам̣ со, маха̄ра̄джа, сет̣т̣хи гахапати таггарасикхим̣ на̄ма паччекасамбуддхам̣ пин̣д̣апа̄тена пат̣ипа̄деси. ‘детха саман̣асса пин̣д̣а’нти ватва̄ ут̣т̣ха̄йа̄сана̄ пакка̄ми. датва̄ ча пана паччха̄ виппат̣иса̄рӣ ахоси – ‘вараметам̣ пин̣д̣апа̄там̣ да̄са̄ ва̄ каммакара̄ ва̄ бхун̃джеййу’нти. бха̄ту ча пана екапуттакам̣ са̄патеййасса ка̄ран̣а̄ джӣвита̄ воропеси.

‘‘йам̣ кхо со, маха̄ра̄джа, сет̣т̣хи гахапати таггарасикхим̣ паччекасамбуддхам̣ пин̣д̣апа̄тена пат̣ипа̄деси, тасса каммасса випа̄кена саттаккхаттум̣ сугатим̣ саггам̣ локам̣ упападжджи. тассева каммасса випа̄ка̄васесена имисса̄йева са̄ваттхийа̄ саттаккхаттум̣ сет̣т̣хиттам̣ ка̄реси. йам̣ кхо со, маха̄ра̄джа, сет̣т̣хи гахапати датва̄ паччха̄ виппат̣иса̄рӣ ахоси – ‘вараметам̣ пин̣д̣апа̄там̣ да̄са̄ ва̄ каммакара̄ ва̄ бхун̃джеййу’нти, тасса каммасса випа̄кена на̄ссул̣а̄ра̄йа бхаттабхога̄йа читтам̣ намати, на̄ссул̣а̄ра̄йа ваттхабхога̄йа читтам̣ намати, на̄ссул̣а̄ра̄йа йа̄набхога̄йа читтам̣ намати, на̄ссул̣а̄ра̄нам̣ пан̃чаннам̣ ка̄магун̣а̄нам̣ бхога̄йа читтам̣ намати. йам̣ кхо со, маха̄ра̄джа, сет̣т̣хи гахапати бха̄ту ча пана екапуттакам̣ са̄патеййасса ка̄ран̣а̄ джӣвита̄ воропеси, тасса каммасса випа̄кена бахӯни васса̄ни бахӯни вассасата̄ни бахӯни вассасахасса̄ни бахӯни вассасатасахасса̄ни нирайе паччиттха. тассева каммасса випа̄ка̄васесена идам̣ саттамам̣ апуттакам̣ са̄патеййам̣ ра̄джакосам̣ павесети. тасса кхо, маха̄ра̄джа, сет̣т̣хисса гахапатисса пура̄н̣ан̃ча пун̃н̃ам̣ париккхӣн̣ам̣, наван̃ча пун̃н̃ам̣ анупачитам̣. аджджа пана, маха̄ра̄джа, сет̣т̣хи гахапати маха̄роруве нирайе паччатӣ’’ти. ‘‘евам̣, бханте, сет̣т̣хи гахапати маха̄рорувам̣ нирайам̣ упапанно’’ти. ‘‘евам̣, маха̄ра̄джа, сет̣т̣хи гахапати маха̄рорувам̣ нирайам̣ упапанно’’ти. идамавоча…пе….

‘‘дхан̃н̃ам̣ дханам̣ раджатам̣ джа̄тарӯпам̣, париггахам̣ ва̄пи йадаттхи кин̃чи;

да̄са̄ каммакара̄ песса̄, йе часса ануджӣвино.

‘‘саббам̣ на̄да̄йа гантаббам̣, саббам̣ никкхиппага̄минам̣ [никкхӣпага̄минам̣ (сйа̄. кам̣. ка.)];

йан̃ча кароти ка̄йена, ва̄ча̄йа уда четаса̄.

‘‘тан̃хи тасса сакам̣ хоти, тан̃ча а̄да̄йа гаччхати;

тан̃часса анугам̣ хоти, чха̄йа̄ва анапа̄йинӣ.

‘‘тасма̄ кареййа калйа̄н̣ам̣, ничайам̣ сампара̄йикам̣;

пун̃н̃а̄ни паралокасмим̣, патит̣т̣ха̄ хонти па̄н̣ина’’нти.

дутийо вагго.

тассудда̄нам̣ –

джат̣ила̄ пан̃ча ра̄джа̄но, дон̣апа̄какурена ча;

сан̇га̄мена две вутта̄ни, маллика̄ [дхӣтара̄ (бахӯсу)] две аппама̄дена ча;

апуттакена две вутта̄, вагго тена павуччатӣти.