1. саттаджат̣иласуттам̣

122. екам̣ самайам̣ бхагава̄ са̄ваттхийам̣ вихарати пубба̄ра̄ме мига̄рама̄тупа̄са̄де. тена кхо пана самайена бхагава̄ са̄йанхасамайам̣ пат̣исалла̄на̄ вут̣т̣хито бахидва̄ракот̣т̣хаке нисинно хоти. атха кхо ра̄джа̄ пасенади косало йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди.

тена кхо пана самайена сатта ча джат̣ила̄ сатта ча ниган̣т̣ха̄ сатта ча ачелака̄ сатта ча екаса̄т̣ака̄ сатта ча парибба̄джака̄ парӯл̣хакаччханакхалома̄ кха̄рививидхама̄да̄йа [кха̄ривидхам̣ а̄да̄йа (пӣ.) дӣ. ни. 1.280 тадат̣т̣хакатха̄пи олокетабба̄] бхагавато авидӯре атиккаманти. атха кхо ра̄джа̄ пасенади косало ут̣т̣ха̄йа̄сана̄ екам̣сам̣ уттара̄сан̇гам̣ каритва̄ даккхин̣аджа̄н̣уман̣д̣алам̣ патхавийам̣ нихантва̄ йена те сатта ча джат̣ила̄ сатта ча ниган̣т̣ха̄ сатта ча ачелака̄ сатта ча екаса̄т̣ака̄ сатта ча парибба̄джака̄ тенан̃джалим̣ пан̣а̄метва̄ тиккхаттум̣ на̄мам̣ са̄веси – ‘‘ра̄джа̄хам̣, бханте, пасенади косало…пе… ра̄джа̄хам̣, бханте, пасенади косало’’ти.

атха кхо ра̄джа̄ пасенади косало ачирапаккантесу тесу саттасу ча джат̣илесу саттасу ча ниган̣т̣хесу саттасу ча ачелакесу саттасу ча екаса̄т̣акесу саттасу ча парибба̄джакесу йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо ра̄джа̄ пасенади косало бхагавантам̣ етадавоча – ‘‘йе те, бханте, локе араханто ва̄ арахаттамаггам̣ ва̄ сама̄панна̄ ете тесам̣ ан̃н̃атара̄’’ти.

‘‘дуджджа̄нам̣ кхо етам̣, маха̄ра̄джа, тайа̄ гихина̄ ка̄мабхогина̄ путтасамба̄дхасайанам̣ аджджха̄васантена ка̄сикачанданам̣ паччанубхонтена ма̄ла̄гандхавилепанам̣ дха̄райантена джа̄тарӯпараджатам̣ са̄дийантена – ‘име ва̄ араханто, име ва̄ арахаттамаггам̣ сама̄панна̄’’’ти.

‘‘сам̣ва̄сена кхо, маха̄ра̄джа, сӣлам̣ ведитаббам̣. тан̃ча кхо дӣгхена аддхуна̄, на иттарам̣; манасикарота̄, но аманасикарота̄; пан̃н̃авата̄, но дуппан̃н̃ена. сам̣воха̄рена кхо, маха̄ра̄джа, сочеййам̣ ведитаббам̣. тан̃ча кхо дӣгхена аддхуна̄, на иттарам̣; манасикарота̄, но аманасикарота̄; пан̃н̃авата̄, но дуппан̃н̃ена. а̄пада̄су кхо, маха̄ра̄джа, тха̄мо ведитаббо. со ча кхо дӣгхена аддхуна̄, на иттарам̣; манасикарота̄, но аманасикарота̄; пан̃н̃авата̄, но дуппан̃н̃ена. са̄каччха̄йа, кхо, маха̄ра̄джа, пан̃н̃а̄ ведитабба̄. са̄ ча кхо дӣгхена аддхуна̄, на иттарам̣; манасикарота̄, но аманасикарота̄; пан̃н̃авата̄, но дуппан̃н̃ена̄’’ти.

‘‘аччхарийам̣, бханте, аббхутам̣ бханте! йа̄ва субха̄ситамидам̣, бханте, бхагавата̄ – ‘дуджджа̄нам̣ кхо етам̣, маха̄ра̄джа, тайа̄ гихина̄ ка̄мабхогина̄ путтасамба̄дхасайанам̣ аджджха̄васантена ка̄сикачанданам̣ паччанубхонтена ма̄ла̄гандхавилепанам̣ дха̄райантена джа̄тарӯпараджатам̣ са̄дийантена – име ва̄ араханто, име ва̄ арахаттамаггам̣ сама̄панна̄’ти. сам̣ва̄сена кхо, маха̄ра̄джа, сӣлам̣ ведитаббам̣. тан̃ча кхо дӣгхена аддхуна̄, на иттарам̣; манасикарота̄, но аманасикарота̄; пан̃н̃авата̄, но дуппан̃н̃ена. сам̣воха̄рена кхо маха̄ра̄джа, сочеййам̣ ведитаббам̣. тан̃ча кхо дӣгхена аддхуна̄, на иттарам̣; манасикарота̄, но аманасикарота̄; пан̃н̃авата̄, но дуппан̃н̃ена. а̄пада̄су кхо, маха̄ра̄джа, тха̄мо ведитаббо. со ча кхо дӣгхена аддхуна̄, на иттарам̣; манасикарота̄, но аманасикарота̄; пан̃н̃авата̄, но дуппан̃н̃ена. са̄каччха̄йа кхо, маха̄ра̄джа, пан̃н̃а̄ ведитабба̄. са̄ ча кхо дӣгхена аддхуна̄, на иттарам̣; манасикарота̄, но аманасикарота̄; пан̃н̃авата̄, но дуппан̃н̃ена̄’’ти.

‘‘ете, бханте, мама пуриса̄ чара̄ очарака̄ джанападам̣ очаритва̄ а̄гаччханти. техи пат̣хамам̣ очин̣н̣ам̣ ахам̣ паччха̄ оса̄пайисса̄ми [ойа̄йисса̄ми (сӣ.), охайисса̄ми (сйа̄. кам̣.)]. ида̄ни те, бханте, там̣ раджоджаллам̣ пава̄хетва̄ сунха̄та̄ сувилитта̄ каппитакесамассӯ ода̄таваттха̄ [ода̄таваттхавасана̄ (сӣ.)] пан̃чахи ка̄магун̣ехи самаппита̄ саман̇гӣбхӯта̄ парича̄рессантӣ’’ти.

атха кхо бхагава̄ етаматтхам̣ видитва̄ та̄йам̣ вела̄йам̣ има̄ га̄тха̄йо абха̄си –

‘‘на ван̣н̣арӯпена наро суджа̄но,

на виссасе иттарадассанена;

сусан̃н̃ата̄нан̃хи вийан̃джанена,

асан̃н̃ата̄ локамимам̣ чаранти.

‘‘патирӯпако маттика̄кун̣д̣алова,

лохад̣д̣хама̄сова суван̣н̣ачханно;

чаранти локе [еке (сӣ. пӣ.)] парива̄рачханна̄,

анто асуддха̄ бахи собхама̄на̄’’ти.