6. аппакасуттам̣

117. са̄ваттхинида̄нам̣. екамантам̣ нисинно кхо ра̄джа̄ пасенади косало бхагавантам̣ етадавоча – ‘‘идха майхам̣, бханте, рахогатасса пат̣исаллӣнасса евам̣ четасо паривитакко удапа̄ди – ‘аппака̄ те сатта̄ локасмим̣ йе ул̣а̄ре ул̣а̄ре бхоге лабхитва̄ на чева маджджанти, на ча памаджджанти, на ча ка̄месу гедхам̣ а̄паджджанти, на ча саттесу виппат̣ипаджджанти. атха кхо етева бахутара̄ сатта̄ локасмим̣ йе ул̣а̄ре ул̣а̄ре бхоге лабхитва̄ маджджанти чева памаджджанти, ча ка̄месу ча гедхам̣ а̄паджджанти, саттесу ча виппат̣ипаджджантӣ’’’ти.

‘‘еваметам̣, маха̄ра̄джа, еваметам̣, маха̄ра̄джа! аппака̄ те, маха̄ра̄джа, сатта̄ локасмим̣, йе ул̣а̄ре ул̣а̄ре бхоге лабхитва̄ на чева маджджанти, на ча памаджджанти, на ча ка̄месу гедхам̣ а̄паджджанти, на ча саттесу виппат̣ипаджджанти. атха кхо етева бахутара̄ сатта̄ локасмим̣, йе ул̣а̄ре ул̣а̄ре бхоге лабхитва̄ маджджанти чева памаджджанти ча ка̄месу ча гедхам̣ а̄паджджанти, саттесу ча виппат̣ипаджджантӣ’’ти. идамавоча…пе…

‘‘са̄ратта̄ ка̄мабхогесу, гиддха̄ ка̄месу муччхита̄;

атиса̄рам̣ на буджджханти, мига̄ кӯт̣ам̣ва од̣д̣итам̣;

паччха̄сам̣ кат̣укам̣ хоти, випа̄ко хисса па̄пако’’ти.