9. чандимасуттам̣

90. са̄ваттхинида̄нам̣. тена кхо пана самайена чандима̄ девапутто ра̄хуна̄ асуриндена гахито хоти. атха кхо чандима̄ девапутто бхагавантам̣ ануссарама̄но та̄йам̣ вела̄йам̣ имам̣ га̄тхам̣ абха̄си –

‘‘намо те буддха вӣраттху, виппамуттоси саббадхи;

самба̄дхапат̣ипанносми, тасса ме саран̣ам̣ бхава̄’’ти.

атха кхо бхагава̄ чандимам̣ девапуттам̣ а̄раббха ра̄хум̣ асуриндам̣ га̄тха̄йа аджджхабха̄си –

‘‘татха̄гатам̣ арахантам̣, чандима̄ саран̣ам̣ гато;

ра̄ху чандам̣ памун̃чассу, буддха̄ лока̄нукампака̄’’ти.

атха кхо ра̄ху асуриндо чандимам̣ девапуттам̣ мун̃читва̄ тарама̄нарӯпо йена вепачитти асуриндо тенупасан̇ками; упасан̇камитва̄ сам̣вигго ломахат̣т̣хаджа̄то екамантам̣ ат̣т̣ха̄си. екамантам̣ т̣хитам̣ кхо ра̄хум̣ асуриндам̣ вепачитти асуриндо га̄тха̄йа аджджхабха̄си –

‘‘ким̣ ну сантарама̄нова, ра̄ху чандам̣ памун̃часи;

сам̣виггарӯпо а̄гамма, ким̣ ну бхӣтова тит̣т̣хасӣ’’ти.

‘‘саттадха̄ ме пхале муддха̄, джӣванто на сукхам̣ лабхе;

буддхага̄тха̄бхигӣтомхи, но че мун̃чеййа чандима’’нти.