10. сӯрийасуттам̣

91. са̄ваттхинида̄нам̣. тена кхо пана самайена сӯрийо девапутто ра̄хуна̄ асуриндена гахито хоти. атха кхо сӯрийо девапутто бхагавантам̣ ануссарама̄но та̄йам̣ вела̄йам̣ имам̣ га̄тхам̣ абха̄си –

‘‘намо те буддха вӣраттху, виппамуттоси саббадхи;

самба̄дхапат̣ипанносми, тасса ме саран̣ам̣ бхава̄’’ти.

атха кхо бхагава̄ сӯрийам̣ девапуттам̣ а̄раббха ра̄хум̣ асуриндам̣ га̄тха̄хи аджджхабха̄си –

‘‘татха̄гатам̣ арахантам̣, сӯрийо саран̣ам̣ гато;

ра̄ху сӯрийам̣ [сурийам̣ (сӣ. сйа̄. кам̣. пӣ.)] памун̃чассу, буддха̄ лока̄нукампака̄.

‘‘йо андхака̄ре тамаси пабхан̇каро,

верочано ман̣д̣алӣ уггатеджо;

ма̄ ра̄ху гилӣ чараманталиккхе,

паджам̣ мамам̣ ра̄ху памун̃ча сӯрийа’’нти.

атха кхо ра̄ху асуриндо сӯрийам̣ девапуттам̣ мун̃читва̄ тарама̄нарӯпо йена вепачитти асуриндо тенупасан̇ками; упасан̇камитва̄ сам̣вигго ломахат̣т̣хаджа̄то екамантам̣ ат̣т̣ха̄си. екамантам̣ т̣хитам̣ кхо ра̄хум̣ асуриндам̣ вепачитти асуриндо га̄тха̄йа аджджхабха̄си –

‘‘ким̣ ну сантарама̄нова, ра̄ху сӯрийам̣ памун̃часи;

сам̣виггарӯпо а̄гамма, ким̣ ну бхӣтова тит̣т̣хасӣ’’ти.

‘‘саттадха̄ ме пхале муддха̄, джӣванто на сукхам̣ лабхе;

буддхага̄тха̄бхигӣтомхи, но че мун̃чеййа сӯрийа’’нти.

пат̣хамо вагго.

тассудда̄нам̣ –

две кассапа̄ ча ма̄гхо ча, ма̄гадхо да̄мали ка̄мадо;

пан̃ча̄лачан̣д̣о та̄йано, чандимасӯрийена те даса̄ти.