2. ана̄тхапин̣д̣икавагго

1. чандимасасуттам̣

92. са̄ваттхинида̄нам̣. атха кхо чандимасо [чандима̄со (ка.)] девапутто абхикканта̄йа раттийа̄ абхиккантаван̣н̣о кевалакаппам̣ джетаванам̣ обха̄сетва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо чандимасо девапутто бхагавато сантике имам̣ га̄тхам̣ абха̄си –

‘‘те хи соттхим̣ гамиссанти, каччхе ва̄макасе мага̄;

джха̄на̄ни упасампаджджа, екоди нипака̄ сата̄’’ти.

‘‘те хи па̄рам̣ гамиссанти, чхетва̄ джа̄лам̣ва амбуджо;

джха̄на̄ни упасампаджджа, аппаматта̄ ран̣ан̃джаха̄’’ти.

2. вен̣д̣усуттам̣

93. екамантам̣ т̣хито кхо вен̣д̣у [вен̣ху (сӣ.)] девапутто бхагавато сантике имам̣ га̄тхам̣ абха̄си –

‘‘сукхита̄ва те [сукхита̄ вата те (сӣ. сйа̄. кам̣.)] мануджа̄, сугатам̣ пайирупа̄сийа;

йун̃джам̣ [йуджджа (сӣ.), йун̃джа (сйа̄. кам̣. пӣ.)] готамаса̄сане, аппаматта̄ ну сиккхаре’’ти.

‘‘йе ме павутте сит̣т̣хипаде [саттхипаде (сӣ. сйа̄. кам̣. пӣ.)] (вен̣д̣ӯти бхагава̄),

анусиккханти джха̄йино;

ка̄ле те аппамаджджанта̄,

на маччувасага̄ сийу’’нти.

3. дӣгхалат̣т̣хисуттам̣

94. евам̣ ме сутам̣ – екам̣ самайам̣ бхагава̄ ра̄джагахе вихарати вел̣уване каландаканива̄пе. атха кхо дӣгхалат̣т̣хи девапутто абхикканта̄йа раттийа̄ абхиккантаван̣н̣о кевалакаппам̣ вел̣уванам̣ обха̄сетва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо дӣгхалат̣т̣хи девапутто бхагавато сантике имам̣ га̄тхам̣ абха̄си –

‘‘бхиккху сийа̄ джха̄йӣ вимуттачитто,

а̄кан̇кхе че хадайасса̄нупаттим̣;

локасса н̃атва̄ удайаббайан̃ча,

сучетасо аниссито тада̄нисам̣со’’ти.

4. нанданасуттам̣

95. екамантам̣ т̣хито кхо нандано девапутто бхагавантам̣ га̄тха̄йа аджджхабха̄си –

‘‘пуччха̄ми там̣ готама бхӯрипан̃н̃а,

ана̄ват̣ам̣ бхагавато н̃а̄н̣адассанам̣;

катхам̣видхам̣ сӣлавантам̣ ваданти,

катхам̣видхам̣ пан̃н̃авантам̣ ваданти;

катхам̣видхо дуккхаматичча ирийати,

катхам̣видхам̣ девата̄ пӯджайантӣ’’ти.

‘‘йо сӣлава̄ пан̃н̃ава̄ бха̄витатто,

сама̄хито джха̄нарато сатӣма̄;

саббасса сока̄ вигата̄ пахӣна̄,

кхӣн̣а̄саво антимадехадха̄рӣ.

‘‘татха̄видхам̣ сӣлавантам̣ ваданти,

татха̄видхам̣ пан̃н̃авантам̣ ваданти;

татха̄видхо дуккхаматичча ирийати,

татха̄видхам̣ девата̄ пӯджайантӣ’’ти.

5. чанданасуттам̣

96. екамантам̣ т̣хито кхо чандано девапутто бхагавантам̣ га̄тха̄йа аджджхабха̄си –

‘‘катхам̣су [косудха (сӣ.)] тарати огхам̣, раттиндиваматандито;

аппатит̣т̣хе ана̄ламбе, ко гамбхӣре на сӣдатӣ’’ти.

‘‘саббада̄ сӣласампанно, пан̃н̃ава̄ сусама̄хито;

а̄раддхавӣрийо пахитатто, огхам̣ тарати дуттарам̣.

‘‘вирато ка̄масан̃н̃а̄йа, рӯпасам̣йоджана̄тиго;

нандӣра̄гапариккхӣн̣о, со гамбхӣре на сӣдатӣ’’ти.

6. ва̄судаттасуттам̣

97. екамантам̣ т̣хито кхо ва̄судатто девапутто бхагавато сантике имам̣ га̄тхам̣ абха̄си –

‘‘саттийа̄ вийа омат̣т̣хо, д̣айхама̄нова [д̣айхама̄нева (саббаттха)] маттхаке;

ка̄мара̄гаппаха̄на̄йа, сато бхиккху париббадже’’ти.

‘‘саттийа̄ вийа омат̣т̣хо, д̣айхама̄нова маттхаке;

сакка̄йадит̣т̣хиппаха̄на̄йа, сато бхиккху париббадже’’ти.

7. субрахмасуттам̣

98. екамантам̣ т̣хито кхо субрахма̄ девапутто бхагавантам̣ га̄тха̄йа аджджхабха̄си –

‘‘ниччам̣ утрастамидам̣ читтам̣, ниччам̣ уббиггамидам̣ [уббиггидам̣ (маха̄сатипат̣т̣ха̄насуттаван̣н̣ана̄йам̣)] мано;

ануппаннесу киччхесу [киччесу (бахӯсу)], атхо уппатитесу ча;

саче аттхи анутрастам̣, там̣ ме аккха̄хи пуччхито’’ти.

‘‘на̄н̃н̃атра боджджха̄ тапаса̄ [боджджхан̇гатапаса̄ (сӣ. сйа̄. кам̣. пӣ.)], на̄н̃н̃атриндрийасам̣вара̄;

на̄н̃н̃атра саббаниссагга̄, соттхим̣ пасса̄ми па̄н̣ина’’нти.

‘‘идамавоча…пе… таттхевантарадха̄йӣ’’ти.

8. какудхасуттам̣

99. евам̣ ме сутам̣ – екам̣ самайам̣ бхагава̄ са̄кете вихарати ан̃джанаване мигада̄йе. атха кхо какудхо девапутто абхикканта̄йа раттийа̄ абхиккантаван̣н̣о кевалакаппам̣ ан̃джанаванам̣ обха̄сетва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо какудхо девапутто бхагавантам̣ етадавоча – ‘‘нандаси, саман̣а̄’’ти? ‘‘ким̣ ладдха̄, а̄вусо’’ти? ‘‘тена хи, саман̣а, сочасӣ’’ти? ‘‘ким̣ джӣйиттха, а̄вусо’’ти? ‘‘тена хи, саман̣а, нева нандаси на ча [нева (сӣ. сйа̄. кам̣.)] сочасӣ’’ти? ‘‘евама̄вусо’’ти.

‘‘каччи твам̣ анагхо [анигхо (саббаттха)] бхиккху, каччи нандӣ [нанди (сӣ. сйа̄. кам̣.)] на виджджати;

каччи там̣ екама̄сӣнам̣, аратӣ на̄бхикӣратӣ’’ти.

‘‘анагхо ве ахам̣ йаккха, атхо нандӣ на виджджати;

атхо мам̣ екама̄сӣнам̣, аратӣ на̄бхикӣратӣ’’ти.

‘‘катхам̣ твам̣ анагхо бхиккху, катхам̣ нандӣ на виджджати;

катхам̣ там̣ екама̄сӣнам̣, аратӣ на̄бхикӣратӣ’’ти.

‘‘агхаджа̄тасса ве нандӣ, нандӣджа̄тасса ве агхам̣;

анандӣ анагхо бхиккху, евам̣ джа̄на̄хи а̄вусо’’ти.

‘‘чирассам̣ вата пасса̄ми, бра̄хман̣ам̣ париниббутам̣;

анандим̣ анагхам̣ бхиккхум̣, тин̣н̣ам̣ локе висаттика’’нти.

9. уттарасуттам̣

100. ра̄джагаханида̄нам̣. екамантам̣ т̣хито кхо уттаро девапутто бхагавато сантике имам̣ га̄тхам̣ абха̄си –

‘‘упанӣйати джӣвитамаппама̄йу,

джарӯпанӣтасса на санти та̄н̣а̄;

етам̣ бхайам̣ маран̣е пеккхама̄но,

пун̃н̃а̄ни кайира̄тха сукха̄ваха̄нӣ’’ти.

‘‘упанӣйати джӣвитамаппама̄йу,

джарӯпанӣтасса на санти та̄н̣а̄;

етам̣ бхайам̣ маран̣е пеккхама̄но,

лока̄мисам̣ паджахе сантипеккхо’’ти.

10. ана̄тхапин̣д̣икасуттам̣

101. екамантам̣ т̣хито кхо ана̄тхапин̣д̣ико девапутто бхагавато сантике има̄ га̄тха̄йо абха̄си –

‘‘идан̃хи там̣ джетаванам̣, исисан̇гханисевитам̣;

а̄вуттхам̣ дхаммара̄джена, пӣтисан̃джананам̣ мама.

‘‘каммам̣ виджджа̄ ча дхаммо ча, сӣлам̣ джӣвитамуттамам̣;

етена мачча̄ суджджханти, на готтена дханена ва̄.

‘‘тасма̄ хи пан̣д̣ито посо, сампассам̣ аттхаматтано;

йонисо вичине дхаммам̣, евам̣ таттха висуджджхати.

‘‘са̄рипуттова пан̃н̃а̄йа, сӣлена упасамена ча;

йопи па̄ран̇гато бхиккху, ета̄вапарамо сийа̄’’ти.

идамавоча ана̄тхапин̣д̣ико девапутто. идам̣ ватва̄ бхагавантам̣ абхива̄детва̄ падаккхин̣ам̣ катва̄ таттхевантарадха̄йӣти.

атха кхо бхагава̄ тасса̄ раттийа̄ аччайена бхиккхӯ а̄мантеси – ‘‘имам̣, бхиккхаве, раттим̣ ан̃н̃атаро девапутто абхикканта̄йа раттийа̄ абхиккантаван̣н̣о кевалакаппам̣ джетаванам̣ обха̄сетва̄ йена̄хам̣ тенупасан̇ками; упасан̇камитва̄ мам̣ абхива̄детва̄ екамантам̣ ат̣т̣ха̄си. екамантам̣ т̣хито кхо, бхиккхаве, со девапутто мама сантике има̄ га̄тха̄йо абха̄си –

‘‘идан̃хи там̣ джетаванам̣, исисан̇гханисевитам̣;

а̄вуттхам̣ дхаммара̄джена, пӣтисан̃джананам̣ мама.

‘‘каммам̣ виджджа̄ ча дхаммо ча, сӣлам̣ джӣвитамуттамам̣;

етена мачча̄ суджджханти, на готтена дханена ва̄.

‘‘тасма̄ хи пан̣д̣ито посо, сампассам̣ аттхаматтано;

йонисо вичине дхаммам̣, евам̣ таттха висуджджхати.

‘‘са̄рипуттова пан̃н̃а̄йа, сӣлена упасамена ча;

йопи па̄ран̇гато бхиккху, ета̄вапарамо сийа̄’’ти.

‘‘идамавоча, бхиккхаве, со девапутто. идам̣ ватва̄ мам̣ абхива̄детва̄ падаккхин̣ам̣ катва̄ таттхевантарадха̄йӣ’’ти.

евам̣ вутте, а̄йасма̄ а̄нандо бхагавантам̣ етадавоча – ‘‘со хи нӯна, бханте, ана̄тхапин̣д̣ико девапутто бхависсати. ана̄тхапин̣д̣ико гахапати а̄йасманте са̄рипутте абхиппасанно ахосӣ’’ти. ‘‘са̄дху са̄дху, а̄нанда, йа̄ватакам̣ кхо, а̄нанда, такка̄йа паттаббам̣ ануппаттам̣ там̣ тайа̄. ана̄тхапин̣д̣ико хи со, а̄нанда, девапутто’’ти.

ана̄тхапин̣д̣икавагго дутийо.

тассудда̄нам̣ –

чандимасо [чандима̄со (пӣ. ка.)] ча вен̣д̣у [вен̣ху (сӣ. ка.)] ча, дӣгхалат̣т̣хи ча нандано;

чандано ва̄судатто ча, субрахма̄ какудхена ча;

уттаро навамо вутто, дасамо ана̄тхапин̣д̣икоти.