8. та̄йанасуттам̣

89. са̄ваттхинида̄нам̣. атха кхо та̄йано девапутто пура̄н̣атиттхакаро абхикканта̄йа раттийа̄ абхиккантаван̣н̣о кевалакаппам̣ джетаванам̣ обха̄сетва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хито кхо та̄йано девапутто бхагавато сантике има̄ га̄тха̄йо абха̄си –

‘‘чхинда сотам̣ параккамма, ка̄ме пануда бра̄хман̣а;

наппаха̄йа мунӣ ка̄ме, некаттамупападжджати.

‘‘кайира̄ че кайира̄тхенам̣, дал̣хаменам̣ параккаме;

ситхило хи парибба̄джо, бхиййо а̄кирате раджам̣.

‘‘акатам̣ дуккат̣ам̣ [дуккатам̣ (сӣ. пӣ.)] сеййо, паччха̄ тапати дуккат̣ам̣;

катан̃ча сукатам̣ сеййо, йам̣ катва̄ на̄нутаппати.

‘‘кусо йатха̄ дуггахито, хаттхамева̄нукантати;

са̄ман̃н̃ам̣ дуппара̄мат̣т̣хам̣, нирайа̄йӯпакад̣д̣хати.

‘‘йам̣ кин̃чи ситхилам̣ каммам̣, сам̣килит̣т̣хан̃ча йам̣ ватам̣;

сан̇кассарам̣ брахмачарийам̣, на там̣ хоти махаппхала’’нти.

идамавоча та̄йано девапутто; идам̣ ватва̄ бхагавантам̣ абхива̄детва̄ падаккхин̣ам̣ катва̄ таттхевантарадха̄йӣти.

атха кхо бхагава̄ тасса̄ раттийа̄ аччайена бхиккхӯ а̄мантеси – ‘‘имам̣, бхиккхаве, раттим̣ та̄йано на̄ма девапутто пура̄н̣атиттхакаро абхикканта̄йа раттийа̄ абхиккантаван̣н̣о кевалакаппам̣ джетаванам̣ обха̄сетва̄ йена̄хам̣ тенупасан̇ками; упасан̇камитва̄ мам̣ абхива̄детва̄ екамантам̣ ат̣т̣ха̄си. екамантам̣ т̣хито кхо, бхиккхаве, та̄йано девапутто мама сантике има̄ га̄тха̄йо абха̄си –

‘‘чхинда сотам̣ параккамма, ка̄ме пануда бра̄хман̣а;

наппаха̄йа мунӣ ка̄ме, некаттамупападжджати.

‘‘кайира̄ че кайира̄тхенам̣, дал̣хаменам̣ параккаме;

ситхило хи парибба̄джо, бхиййо а̄кирате раджам̣.

‘‘акатам̣ дуккат̣ам̣ сеййо, паччха̄ тапати дуккат̣ам̣;

катан̃ча сукатам̣ сеййо, йам̣ катва̄ на̄нутаппати.

‘‘кусо йатха̄ дуггахито, хаттхамева̄нукантати;

са̄ман̃н̃ам̣ дуппара̄мат̣т̣хам̣, нирайа̄йӯпакад̣д̣хати.

‘‘йам̣ кин̃чи ситхилам̣ каммам̣, сам̣килит̣т̣хан̃ча йам̣ ватам̣;

сан̇кассарам̣ брахмачарийам̣, на там̣ хоти махаппхала’’нти.

‘‘идамавоча, бхиккхаве, та̄йано девапутто, идам̣ ватва̄ мам̣ абхива̄детва̄ падаккхин̣ам̣ катва̄ таттхевантарадха̄йи. угган̣ха̄тха, бхиккхаве, та̄йанага̄тха̄; парийа̄пун̣а̄тха, бхиккхаве, та̄йанага̄тха̄; дха̄ретха, бхиккхаве, та̄йанага̄тха̄. аттхасам̣хита̄, бхиккхаве, та̄йанага̄тха̄ а̄дибрахмачарийика̄’’ти.