6. кула̄вакасуттам̣

252. са̄ваттхийам̣. ‘‘бхӯтапуббам̣, бхиккхаве, дева̄сурасан̇га̄мо самупабйӯл̣хо ахоси. тасмим̣ кхо пана, бхиккхаве, сан̇га̄ме асура̄ джиним̣су, дева̄ пара̄джиним̣су. пара̄джита̄ ча кхо, бхиккхаве, дева̄ апа̄йам̣свева уттаренамукха̄, абхийам̣свева не асура̄. атха кхо, бхиккхаве, сакко дева̄наминдо ма̄тали сан̇га̄хакам̣ га̄тха̄йа аджджхабха̄си –

‘‘кула̄вака̄ ма̄тали симбалисмим̣,

ӣса̄мукхена париваджджайассу;

ка̄мам̣ чаджа̄ма асуресу па̄н̣ам̣,

ма̄йиме диджа̄ викула̄вака̄ [викула̄ва̄ (сйа̄. кам̣. ка.)] ахесу’’нти.

‘‘‘евам̣ бхаддантава̄’ти кхо, бхиккхаве, ма̄тали сан̇га̄хако саккасса дева̄наминдасса пат̣иссутва̄ сахассайуттам̣ а̄джан̃н̃аратхам̣ паччуда̄ваттеси. атха кхо, бхиккхаве, асура̄нам̣ етадахоси – ‘паччуда̄ватто кхо да̄ни саккасса дева̄наминдасса сахассайутто а̄джан̃н̃аратхо. дутийампи кхо дева̄ асурехи сан̇га̄мессантӣти бхӣта̄ асурапурамева па̄висим̣су. ити кхо, бхиккхаве, саккасса дева̄наминдасса дхаммена джайо ахосӣ’’’ти.