7. надуббхийасуттам̣

253. са̄ваттхийам̣. ‘‘бхӯтапуббам̣, бхиккхаве, саккасса дева̄наминдасса рахогатасса пат̣исаллӣнасса евам̣ четасо паривитакко удапа̄ди – ‘йопи ме асса супаччаттхико тассапа̄хам̣ на дуббхеййа’нти. атха кхо, бхиккхаве, вепачитти асуриндо саккасса дева̄наминдасса четаса̄ четопаривитаккаман̃н̃а̄йа йена сакко дева̄наминдо тенупасан̇ками. аддаса̄ кхо, бхиккхаве, сакко дева̄наминдо вепачиттим̣ асуриндам̣ дӯратова а̄гаччхантам̣. дисва̄на вепачиттим̣ асуриндам̣ етадавоча – ‘тит̣т̣ха, вепачитти, гахитосӣ’’’ти.

‘‘йадева те, ма̄риса, пуббе читтам̣, тадева твам̣ ма̄ паджаха̄сӣ’’ти [тадева твам̣ ма̄риса паха̄сӣти (сӣ. сйа̄. кам̣.)].

‘‘сапассу ча ме, вепачитти, адуббха̄йа̄’’ти [адруббха̄йа (ка.)].

‘‘йам̣ муса̄ бхан̣ато па̄пам̣, йам̣ па̄пам̣ арийӯпава̄дино;

миттаддуно ча йам̣ па̄пам̣, йам̣ па̄пам̣ акатан̃н̃уно;

тамева па̄пам̣ пхусату [пхусати (сӣ. пӣ.)], йо те дуббхе суджампатӣ’’ти.