5. субха̄ситаджайасуттам̣

251. са̄ваттхинида̄нам̣. ‘‘бхӯтапуббам̣, бхиккхаве, дева̄сурасан̇га̄мо самупабйӯл̣хо ахоси. атха кхо, бхиккхаве, вепачитти асуриндо саккам̣ дева̄наминдам̣ етадавоча – ‘хоту, дева̄наминда, субха̄ситена джайо’ти. ‘хоту, вепачитти, субха̄ситена джайо’ти. атха кхо, бхиккхаве, дева̄ ча асура̄ ча па̄рисадждже т̣хапесум̣ – ‘име но субха̄ситадуббха̄ситам̣ а̄джа̄ниссантӣ’ти. атха кхо, бхиккхаве, вепачиттим̣ асуриндо саккам̣ дева̄наминдам̣ етадавоча – ‘бхан̣а, дева̄наминда, га̄тха’нти. евам̣ вутте, бхиккхаве, сакко дева̄наминдо вепачитти асуриндам̣ етадавоча – ‘тумхе кхветтха, вепачитти, пуббадева̄. бхан̣а, вепачитти, га̄тха’нти. евам̣ вутте, бхиккхаве, вепачитти асуриндо имам̣ га̄тхам̣ абха̄си –

‘‘бхиййо ба̄ла̄ пабхиджджеййум̣, но часса пат̣иседхако;

тасма̄ бхусена дан̣д̣ена, дхӣро ба̄лам̣ ниседхайе’’ти.

‘‘бха̄сита̄йа кхо пана, бхиккхаве, вепачиттина̄ асуриндена га̄тха̄йа асура̄ анумодим̣су, дева̄ тун̣хӣ ахесум̣. атха кхо, бхиккхаве, вепачитти асуриндо саккам̣ дева̄наминдам̣ етадавоча – ‘бхан̣а, дева̄наминда, га̄тха’нти. евам̣ вутте, бхиккхаве, сакко дева̄наминдо имам̣ га̄тхам̣ абха̄си –

‘‘етадева ахам̣ ман̃н̃е, ба̄ласса пат̣иседханам̣;

парам̣ сан̇купитам̣ н̃атва̄, йо сато упасамматӣ’’ти.

‘‘бха̄сита̄йа кхо пана, бхиккхаве, саккена дева̄наминдена га̄тха̄йа, дева̄ анумодим̣су, асура̄ тун̣хӣ ахесум̣. атха кхо, бхиккхаве, сакко дева̄наминдо вепачиттим̣ асуриндам̣ етадавоча – ‘бхан̣а, вепачитти, га̄тха’нти. евам̣ вутте, бхиккхаве, вепачитти асуриндо имам̣ га̄тхам̣ абха̄си –

‘‘етадева титиккха̄йа, ваджджам̣ пасса̄ми ва̄сава;

йада̄ нам̣ ман̃н̃ати ба̄ло, бхайа̄ мйа̄йам̣ титиккхати;

аджджха̄рухати думмедхо, гова бхиййо пала̄йина’’нти.

‘‘ка̄мам̣ ман̃н̃ату ва̄ ма̄ ва̄, бхайа̄ мйа̄йам̣ титиккхати;

садаттхапарама̄ аттха̄, кхантйа̄ бхиййо на виджджати.

‘‘йо хаве балава̄ санто, дуббаласса титиккхати;

тама̄ху парамам̣ кхантим̣, ниччам̣ кхамати дуббало.

‘‘абалам̣ там̣ балам̣ а̄ху, йасса ба̄лабалам̣ балам̣;

баласса дхаммагуттасса, пат̣иватта̄ на виджджати.

‘‘тассева тена па̄пийо, йо куддхам̣ пат̣икуджджхати;

куддхам̣ аппат̣икуджджханто, сан̇га̄мам̣ джети дуджджайам̣.

‘‘убхиннаматтхам̣ чарати, аттано ча парасса ча;

парам̣ сан̇купитам̣ н̃атва̄, йо сато упасаммати.

‘‘убхиннам̣ тикиччханта̄нам̣, аттано ча парасса ча;

джана̄ ман̃н̃анти ба̄лоти, йе дхаммасса аковида̄’’ти.

‘‘бха̄сита̄су кхо пана, бхиккхаве, саккена дева̄наминдена га̄тха̄су, дева̄ анумодим̣су, асура̄ тун̣хӣ ахесум̣. атха кхо, бхиккхаве, дева̄нан̃ча асура̄нан̃ча па̄рисаджджа̄ етадавочум̣ – ‘бха̄сита̄ кхо вепачиттина̄ асуриндена га̄тха̄йо. та̄ ча кхо садан̣д̣а̄вачара̄ сасаттха̄вачара̄, ити бхан̣д̣анам̣ ити виггахо ити калахо. бха̄сита̄ кхо [бха̄сита̄ кхо пана (сӣ.)] саккена дева̄наминдена га̄тха̄йо. та̄ ча кхо адан̣д̣а̄вачара̄ асаттха̄вачара̄, ити абхан̣д̣анам̣ ити авиггахо ити акалахо. саккасса дева̄наминдасса субха̄ситена джайо’ти. ити кхо, бхиккхаве саккасса дева̄наминдасса субха̄ситена джайо ахосӣ’’ти.