2. сусӣмасуттам̣

248. са̄ваттхийам̣. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘бхӯтапуббам̣, бхиккхаве, асура̄ деве абхийам̣су. атха кхо, бхиккхаве, сакко дева̄наминдо сусӣмам̣ [сусимам̣ (сйа̄. кам̣. ка.)] девапуттам̣ а̄мантеси – ‘ете, та̄та сусӣма, асура̄ деве абхийанти. гаччха, та̄та сусӣма, асуре паччуййа̄хӣ’ти. ‘евам̣ бхаддантава̄’ти кхо, бхиккхаве, сусӣмо девапутто саккасса дева̄наминдасса пат̣иссутва̄ пама̄дам̣ а̄па̄деси. дутийампи кхо, бхиккхаве, сакко дева̄наминдо сусӣмам̣ девапуттам̣ а̄мантеси…пе… дутийампи пама̄дам̣ а̄па̄деси. татийампи кхо, бхиккхаве, сакко дева̄наминдо сусӣмам̣ девапуттам̣ а̄мантеси…пе… татийампи пама̄дам̣ а̄па̄деси. атха кхо, бхиккхаве, сакко дева̄наминдо сусӣмам̣ девапуттам̣ га̄тха̄йа аджджхабха̄си –

‘‘анут̣т̣хахам̣ ава̄йа̄мам̣, сукхам̣ йатра̄дхигаччхати;

сусӣма таттха гаччха̄хи, ман̃ча таттхева па̄пайа̄’’ти.

‘‘аласвасса анут̣т̣ха̄та̄, на ча кичча̄ни ка̄райе;

саббака̄масамиддхасса, там̣ ме сакка варам̣ диса̄’’ти.

‘‘йаттха̄ласо анут̣т̣ха̄та̄, аччантам̣ сукхамедхати;

сусӣма таттха гаччха̄хи, ман̃ча таттхева па̄пайа̄’’ти.

‘‘акаммуна̄ девасет̣т̣ха, сакка виндему йам̣ сукхам̣;

асокам̣ анупа̄йа̄сам̣, там̣ ме сакка варам̣ диса̄’’ти.

‘‘саче аттхи акаммена, кочи квачи на джӣвати;

нибба̄насса хи со магго, сусӣма таттха гаччха̄хи;

ман̃ча таттхева па̄пайа̄’’ти.

‘‘со хи на̄ма, бхиккхаве, сакко дева̄наминдо сакам̣ пун̃н̃апхалам̣ упаджӣвама̄но дева̄нам̣ та̄ватим̣са̄нам̣ иссарийа̄дхипаччам̣ раджджам̣ ка̄ренто ут̣т̣ха̄навӣрийасса ван̣н̣ава̄дӣ бхависсати. идха кхо там̣, бхиккхаве, собхетха, йам̣ тумхе евам̣ сва̄ккха̄те дхаммавинайе паббаджита̄ сама̄на̄ ут̣т̣хахеййа̄тха гхат̣еййа̄тха ва̄йамеййа̄тха аппаттасса паттийа̄, анадхигатасса адхигама̄йа, асаччхикатасса саччхикирийа̄йа̄’’ти.