3. дхаджаггасуттам̣

249. са̄ваттхийам̣. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘бхӯтапуббам̣, бхиккхаве, дева̄сурасан̇га̄мо самупабйӯл̣хо ахоси. атха кхо, бхиккхаве, сакко дева̄наминдо деве та̄ватим̣се а̄мантеси –

‘саче, ма̄риса̄, дева̄нам̣ сан̇га̄магата̄нам̣ уппаджджеййа бхайам̣ ва̄ чхамбхитаттам̣ ва̄ ломахам̣со ва̄, мамева тасмим̣ самайе дхаджаггам̣ уллокеййа̄тха. маман̃хи во дхаджаггам̣ уллокайатам̣ йам̣ бхависсати бхайам̣ ва̄ чхамбхитаттам̣ ва̄ ломахам̣со ва̄, со пахӣйиссати’.

‘но че ме дхаджаггам̣ уллокеййа̄тха, атха паджа̄патисса девара̄джасса дхаджаггам̣ уллокеййа̄тха. паджа̄патисса хи во девара̄джасса дхаджаггам̣ уллокайатам̣ йам̣ бхависсати бхайам̣ ва̄ чхамбхитаттам̣ ва̄ ломахам̣со ва̄, со пахӣйиссати’.

‘но че паджа̄патисса девара̄джасса дхаджаггам̣ уллокеййа̄тха, атха варун̣асса девара̄джасса дхаджаггам̣ уллокеййа̄тха. варун̣асса хи во девара̄джасса дхаджаггам̣ уллокайатам̣ йам̣ бхависсати бхайам̣ ва̄ чхамбхитаттам̣ ва̄ ломахам̣со ва̄, со пахӣйиссати’.

‘но че варун̣асса девара̄джасса дхаджаггам̣ уллокеййа̄тха, атха ӣса̄насса девара̄джасса дхаджаггам̣ уллокеййа̄тха. ӣса̄насса хи во девара̄джасса дхаджаггам̣ уллокайатам̣ йам̣ бхависсати бхайам̣ ва̄ чхамбхитаттам̣ ва̄ ломахам̣со ва̄, со пахӣйиссатӣ’’’ти.

‘‘там̣ кхо пана, бхиккхаве, саккасса ва̄ дева̄наминдасса дхаджаггам̣ уллокайатам̣, паджа̄патисса ва̄ девара̄джасса дхаджаггам̣ уллокайатам̣, варун̣асса ва̄ девара̄джасса дхаджаггам̣ уллокайатам̣, ӣса̄насса ва̄ девара̄джасса дхаджаггам̣ уллокайатам̣ йам̣ бхависсати бхайам̣ ва̄ чхамбхитаттам̣ ва̄ ломахам̣со ва̄, со пахӣйетха̄пи нопи пахӣйетха [но пахӣйетха (ка.)].

‘‘там̣ кисса хету? сакко хи, бхиккхаве, дева̄наминдо авӣтара̄го авӣтадосо авӣтамохо бхӣру чхамбхӣ утра̄сӣ пала̄йӣти.

‘‘ахан̃ча кхо, бхиккхаве, евам̣ вада̄ми – ‘саче тумха̄кам̣, бхиккхаве, аран̃н̃агата̄нам̣ ва̄ руккхамӯлагата̄нам̣ ва̄ сун̃н̃а̄га̄рагата̄нам̣ ва̄ уппаджджеййа бхайам̣ ва̄ чхамбхитаттам̣ ва̄ ломахам̣со ва̄, мамева тасмим̣ самайе ануссареййа̄тха – итипи со бхагава̄ арахам̣ самма̄самбуддхо виджджа̄чаран̣асампанно сугато локавидӯ ануттаро пурисадаммаса̄ратхи саттха̄ деваманусса̄нам̣ буддхо бхагава̄’ти. маман̃хи во, бхиккхаве, ануссаратам̣ йам̣ бхависсати бхайам̣ ва̄ чхамбхитаттам̣ ва̄ ломахам̣со ва̄, со пахӣйиссати.

‘‘но че мам̣ ануссареййа̄тха, атха дхаммам̣ ануссареййа̄тха – ‘сва̄ккха̄то бхагавата̄ дхаммо сандит̣т̣хико ака̄лико ехипассико опанеййико паччаттам̣ ведитаббо вин̃н̃ӯхӣ’ти. дхамман̃хи во, бхиккхаве, ануссаратам̣ йам̣ бхависсати бхайам̣ ва̄ чхамбхитаттам̣ ва̄ ломахам̣со ва̄, со пахӣйиссати.

‘‘но че дхаммам̣ ануссареййа̄тха, атха сан̇гхам̣ ануссареййа̄тха – ‘суппат̣ипанно бхагавато са̄вакасан̇гхо уджуппат̣ипанно бхагавато са̄вакасан̇гхо н̃а̄йаппат̣ипанно бхагавато са̄вакасан̇гхо са̄мӣчиппат̣ипанно бхагавато са̄вакасан̇гхо, йадидам̣ чатта̄ри пурисайуга̄ни ат̣т̣ха пурисапуггала̄ еса бхагавато са̄вакасан̇гхо, а̄хунеййо па̄хунеййо даккхин̣еййо ан̃джаликаран̣ӣйо ануттарам̣ пун̃н̃аккхеттам̣ локасса̄’ти. сан̇гхан̃хи во, бхиккхаве, ануссаратам̣ йам̣ бхависсати бхайам̣ ва̄ чхамбхитаттам̣ ва̄ ломахам̣со ва̄, со пахӣйиссати.

‘‘там̣ кисса хету? татха̄гато хи, бхиккхаве, арахам̣ самма̄самбуддхо вӣтара̄го вӣтадосо вӣтамохо абхӣру аччхамбхӣ анутра̄сӣ апала̄йӣ’’ти. идамавоча бхагава̄. идам̣ ватва̄на сугато атха̄парам̣ етадавоча саттха̄ –

‘‘аран̃н̃е руккхамӯле ва̄, сун̃н̃а̄га̄рева бхиккхаво;

ануссаретха [ануссареййа̄тха (ка.) падасиддхи пана чинтетабба̄] самбуддхам̣, бхайам̣ тумха̄ка но сийа̄.

‘‘но че буддхам̣ сареййа̄тха, локаджет̣т̣хам̣ нара̄сабхам̣;

атха дхаммам̣ сареййа̄тха, ниййа̄никам̣ судеситам̣.

‘‘но че дхаммам̣ сареййа̄тха, ниййа̄никам̣ судеситам̣;

атха сан̇гхам̣ сареййа̄тха, пун̃н̃аккхеттам̣ ануттарам̣.

‘‘евам̣ буддхам̣ саранта̄нам̣, дхаммам̣ сан̇гхан̃ча бхиккхаво;

бхайам̣ ва̄ чхамбхитаттам̣ ва̄, ломахам̣со на хессатӣ’’ти.