10. самуддакасуттам̣

256. са̄ваттхийам̣. ‘‘бхӯтапуббам̣, бхиккхаве, самбахула̄ исайо сӣлаванто калйа̄н̣адхамма̄ самуддатӣре пан̣н̣акут̣ӣсу самманти. тена кхо пана самайена дева̄сурасан̇га̄мо самупабйӯл̣хо ахоси. атха кхо, бхиккхаве, тесам̣ исӣнам̣ сӣлаванта̄нам̣ калйа̄н̣адхамма̄нам̣ етадахоси – ‘дхаммика̄ кхо дева̄, адхаммика̄ асура̄. сийа̄пи но асурато бхайам̣. йам̣нӯна майам̣ самбарам̣ асуриндам̣ упасан̇камитва̄ абхайадаккхин̣ам̣ йа̄чеййа̄ма̄’’’ти. ‘‘атха кхо, бхиккхаве, те исайо сӣлаванто калйа̄н̣адхамма̄ – сеййатха̄пи на̄ма балава̄ пурисо самин̃джитам̣ ва̄ ба̄хам̣ паса̄реййа, паса̄ритам̣ ва̄ ба̄хам̣ самин̃джеййа евамева – самуддатӣре пан̣н̣акут̣ӣсу антарахита̄ самбарасса асуриндасса саммукхе па̄турахесум̣. атха кхо, бхиккхаве, те исайо сӣлаванто калйа̄н̣адхамма̄ самбарам̣ асуриндам̣ га̄тха̄йа аджджхабха̄сим̣су –

‘‘исайо самбарам̣ патта̄, йа̄чанти абхайадаккхин̣ам̣;

ка̄мам̣каро хи те да̄тум̣, бхайасса абхайасса ва̄’’ти.

‘‘исӣнам̣ абхайам̣ наттхи, дут̣т̣ха̄нам̣ саккасевинам̣;

абхайам̣ йа̄чама̄на̄нам̣, бхайамева дада̄ми во’’ти.

‘‘абхайам̣ йа̄чама̄на̄нам̣, бхайамева дада̄си но;

пат̣игган̣ха̄ма те етам̣, аккхайам̣ хоту те бхайам̣.

‘‘йа̄дисам̣ вапате бӣджам̣, та̄дисам̣ харате пхалам̣;

калйа̄н̣ака̄рӣ калйа̄н̣ам̣, па̄пака̄рӣ ча па̄пакам̣;

павуттам̣ та̄та те бӣджам̣, пхалам̣ паччанубхоссасӣ’’ти.

‘‘атха кхо, бхиккхаве, те исайо сӣлаванто калйа̄н̣адхамма̄ самбарам̣ асуриндам̣ абхисапитва̄ – сеййатха̄пи на̄ма балава̄ пурисо самин̃джитам̣ ва̄ ба̄хам̣ паса̄реййа, паса̄ритам̣ ва̄ ба̄хам̣ самин̃джеййа евамева – самбарасса асуриндасса саммукхе антарахита̄ самуддатӣре пан̣н̣акут̣ӣсу па̄турахесум̣. атха кхо, бхиккхаве, самбаро асуриндо техи исӣхи сӣлавантехи калйа̄н̣адхаммехи абхисапито раттийа̄ судам̣ тиккхаттум̣ уббиджджӣ’’ти.

пат̣хамо вагго.

тассудда̄нам̣ –

сувӣрам̣ сусӣман̃чева, дхаджаггам̣ вепачиттино;

субха̄ситам̣ джайан̃чева, кула̄вакам̣ надуббхийам̣;

верочана асуриндо, исайо аран̃н̃акан̃чева;

исайо ча самуддака̄ти.