7. аддхавагго

1. на̄масуттам̣

61. ‘‘ким̣су саббам̣ аддхабхави [анвабхави (сӣ.)], кисма̄ бхиййо на виджджати;

киссассу екадхаммасса, саббева васаманвагӯ’’ти [васамаддхагӯ (ка.)].

‘‘на̄мам̣ саббам̣ аддхабхави, на̄ма̄ бхиййо на виджджати;

на̄масса екадхаммасса, саббева васаманвагӯ’’ти.

2. читтасуттам̣

62. ‘‘кенассу нӣйати локо, кенассу парикассати;

киссассу екадхаммасса, саббева васаманвагӯ’’ти.

‘‘читтена нӣйати локо, читтена парикассати;

читтасса екадхаммасса, саббева васаманвагӯ’’ти.

3. тан̣ха̄суттам̣

63. ‘‘кенассу нӣйати локо, кенассу парикассати;

киссассу екадхаммасса, саббева васаманвагӯ’’ти.

‘‘тан̣ха̄йа нӣйати локо, тан̣ха̄йа парикассати;

тан̣ха̄йа екадхаммасса, саббева васаманвагӯ’’ти.

4. сам̣йоджанасуттам̣

64. ‘‘ким̣су сам̣йоджано локо, ким̣су тасса вича̄ран̣ам̣;

киссассу виппаха̄нена, нибба̄нам̣ ити вуччатӣ’’ти.

‘‘нандӣсам̣йоджано [нандисам̣йоджано (сӣ. сйа̄. кам̣.)] локо, витаккасса вича̄ран̣ам̣;

тан̣ха̄йа виппаха̄нена, нибба̄нам̣ ити вуччатӣ’’ти.

5. бандханасуттам̣

65. ‘‘ким̣су самбандхано локо, ким̣су тасса вича̄ран̣ам̣;

киссассу виппаха̄нена, саббам̣ чхиндати бандхана’’нти.

‘‘нандӣсамбандхано локо, витаккасса вича̄ран̣ам̣;

тан̣ха̄йа виппаха̄нена, саббам̣ чхиндати бандхана’’нти.

6. аттахатасуттам̣

66. ‘‘кенассуббха̄хато локо, кенассу парива̄рито;

кена саллена отин̣н̣о, кисса дхӯпа̄йито сада̄’’ти.

‘‘маччуна̄ббха̄хато локо, джара̄йа парива̄рито;

тан̣ха̄саллена отин̣н̣о, иччха̄дхӯпа̄йито сада̄’’ти.

7. уд̣д̣итасуттам̣

67. ‘‘кенассу уд̣д̣ито локо, кенассу парива̄рито;

кенассу пихито локо, кисмим̣ локо патит̣т̣хито’’ти.

‘‘тан̣ха̄йа уд̣д̣ито локо, джара̄йа парива̄рито;

маччуна̄ пихито локо, дуккхе локо патит̣т̣хито’’ти.

8. пихитасуттам̣

68. ‘‘кенассу пихито локо, кисмим̣ локо патит̣т̣хито;

кенассу уд̣д̣ито локо, кенассу парива̄рито’’ти.

‘‘маччуна̄ пихито локо, дуккхе локо патит̣т̣хито;

тан̣ха̄йа уд̣д̣ито локо, джара̄йа парива̄рито’’ти.

9. иччха̄суттам̣

69. ‘‘кенассу баджджхатӣ локо, кисса винайа̄йа муччати;

киссассу виппаха̄нена, саббам̣ чхиндати бандхана’’нти.

‘‘иччха̄йа баджджхатӣ локо, иччха̄винайа̄йа муччати;

иччха̄йа виппаха̄нена, саббам̣ чхиндати бандхана’’нти.

10. локасуттам̣

70. ‘‘кисмим̣ локо самуппанно, кисмим̣ куббати сантхавам̣;

кисса локо упа̄да̄йа, кисмим̣ локо вихан̃н̃атӣ’’ти.

‘‘чхасу локо самуппанно, чхасу куббати сантхавам̣;

чханнамева упа̄да̄йа, чхасу локо вихан̃н̃атӣ’’ти.

аддхавагго [анвавагго (сӣ.)] саттамо.

тассудда̄нам̣ –

на̄мам̣ читтан̃ча тан̣ха̄ ча, сам̣йоджанан̃ча бандхана̄;

аббха̄хатуд̣д̣ито пихито, иччха̄ локена те даса̄ти.