2. маччхарисуттам̣

32. екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо самбахула̄ сатуллапака̄йика̄ девата̄йо абхикканта̄йа раттийа̄ абхиккантаван̣н̣а̄ кевалакаппам̣ джетаванам̣ обха̄сетва̄ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ ат̣т̣хам̣су. екамантам̣ т̣хита̄ кхо ека̄ девата̄ бхагавато сантике имам̣ га̄тхам̣ абха̄си –

‘‘маччхера̄ ча пама̄да̄ ча, евам̣ да̄нам̣ на дӣйати [диййати (ка.)];

пун̃н̃ам̣ а̄кан̇кхама̄нена, деййам̣ хоти виджа̄ната̄’’ти.

атха кхо апара̄ девата̄ бхагавато сантике има̄ га̄тха̄йо абха̄си –

‘‘йассева бхӣто на дада̄ти маччхарӣ, тадева̄дадато бхайам̣;

джигхаччха̄ ча пипа̄са̄ ча, йасса бха̄йати маччхарӣ;

тамева ба̄лам̣ пхусати, асмим̣ локе парамхи ча.

‘‘тасма̄ винеййа маччхерам̣, даджджа̄ да̄нам̣ мала̄бхибхӯ;

пун̃н̃а̄ни паралокасмим̣, патит̣т̣ха̄ хонти па̄н̣ина’’нти.

атха кхо апара̄ девата̄ бхагавато сантике има̄ га̄тха̄йо абха̄си –

‘‘те матесу на мӣйанти, пантха̄нам̣ва сахаббаджам̣;

аппасмим̣ йе павеччханти, еса дхаммо санантано.

‘‘аппасмеке павеччханти, бахунеке на диччхаре;

аппасма̄ даккхин̣а̄ динна̄, сахассена самам̣ мита̄’’ти.

атха кхо апара̄ девата̄ бхагавато сантике има̄ га̄тха̄йо абха̄си –

‘‘дуддадам̣ дадама̄на̄нам̣, дуккарам̣ камма куббатам̣;

асанто на̄нукуббанти, сатам̣ дхаммо дуранвайо [дураннайо (сӣ.)].

‘‘тасма̄ сатан̃ча асатам̣ [асатан̃ча (сӣ. сйа̄. кам̣.)], на̄на̄ хоти ито гати;

асанто нирайам̣ йанти, санто саггапара̄йана̄’’ти.

атха кхо апара̄ девата̄ бхагавато сантике етадавоча – ‘‘касса ну кхо, бхагава̄, субха̄сита’’нти?

‘‘сабба̄сам̣ во субха̄ситам̣ парийа̄йена; апи ча мамапи сун̣а̄тха –

‘‘дхаммам̣ чаре йопи самун̃джакам̣ чаре,

да̄ран̃ча посам̣ дадамаппакасмим̣;

сатам̣ сахасса̄нам̣ сахассайа̄гинам̣,

калампи на̄ггханти татха̄видхасса те’’ти.

атха кхо апара̄ девата̄ бхагавантам̣ га̄тха̄йа аджджхабха̄си –

‘‘кенеса йан̃н̃о випуло махаггато,

самена диннасса на аггхамети;

катхам̣ [идам̣ падам̣ каттхачи сӣхал̣апоттхаке наттхи] сатам̣ сахасса̄нам̣ сахассайа̄гинам̣,

калампи на̄ггханти татха̄видхасса те’’ти.

‘‘даданти хеке висаме нивит̣т̣ха̄,

чхетва̄ вадхитва̄ атха сочайитва̄;

са̄ даккхин̣а̄ ассумукха̄ садан̣д̣а̄,

самена диннасса на аггхамети.

‘‘евам̣ сатам̣ сахасса̄нам̣ сахассайа̄гинам̣;

калампи на̄ггханти татха̄видхасса те’’ти.