3. саттивагго

1. саттисуттам̣

21. са̄ваттхинида̄нам̣. екамантам̣ т̣хита̄ кхо са̄ девата̄ бхагавато сантике имам̣ га̄тхам̣ абха̄си –

‘‘саттийа̄ вийа омат̣т̣хо, д̣айхама̄нова [д̣айхама̄нева (саббаттха)] маттхаке;

ка̄мара̄гаппаха̄на̄йа, сато бхиккху париббадже’’ти.

‘‘саттийа̄ вийа омат̣т̣хо, д̣айхама̄нова маттхаке;

сакка̄йадит̣т̣хиппаха̄на̄йа, сато бхиккху париббадже’’ти.

2. пхусатисуттам̣

22. ‘‘на̄пхусантам̣ пхусати ча, пхусантан̃ча тато пхусе;

тасма̄ пхусантам̣ пхусати, аппадут̣т̣хападосина’’нти.

‘‘йо аппадут̣т̣хасса нарасса дуссати,

суддхасса посасса анан̇ган̣асса;

тамева ба̄лам̣ паччети па̄пам̣,

сукхумо раджо пат̣ива̄там̣ва кхитто’’ти.

3. джат̣а̄суттам̣

23. ‘‘анто джат̣а̄ бахи джат̣а̄, джат̣а̄йа джат̣ита̄ паджа̄;

там̣ там̣ готама пуччха̄ми, ко имам̣ виджат̣айе джат̣а’’нти.

‘‘сӣле патит̣т̣ха̄йа наро сапан̃н̃о, читтам̣ пан̃н̃ан̃ча бха̄вайам̣;

а̄та̄пӣ нипако бхиккху, со имам̣ виджат̣айе джат̣ам̣.

‘‘йесам̣ ра̄го ча досо ча, авиджджа̄ ча вира̄джита̄;

кхӣн̣а̄сава̄ араханто, тесам̣ виджат̣ита̄ джат̣а̄.

‘‘йаттха на̄ман̃ча рӯпан̃ча, асесам̣ упаруджджхати;

пат̣игхам̣ рӯпасан̃н̃а̄ ча, еттхеса̄ чхиджджате [виджат̣е (ка.)] джат̣а̄’’ти.

4. манонива̄ран̣асуттам̣

24. ‘‘йато йато мано нива̄райе,

на дуккхамети нам̣ тато тато;

са саббато мано нива̄райе,

са саббато дуккха̄ памуччати’’.

‘‘на саббато мано нива̄райе,

на мано сам̣йататтама̄гатам̣;

йато йато ча па̄пакам̣,

тато тато мано нива̄райе’’ти.

5. арахантасуттам̣

25. ‘‘йо хоти бхиккху арахам̣ ката̄вӣ,

кхӣн̣а̄саво антимадехадха̄рӣ;

ахам̣ вада̄мӣтипи со вадеййа,

мамам̣ вадантӣтипи со вадеййа̄’’ти.

‘‘йо хоти бхиккху арахам̣ ката̄вӣ,

кхӣн̣а̄саво антимадехадха̄рӣ;

ахам̣ вада̄мӣтипи со вадеййа,

мамам̣ вадантӣтипи со вадеййа;

локе саман̃н̃ам̣ кусало видитва̄,

воха̄раматтена со [са (?)] вохареййа̄’’ти.

‘‘йо хоти бхиккху арахам̣ ката̄вӣ,

кхӣн̣а̄саво антимадехадха̄рӣ;

ма̄нам̣ ну кхо со упагамма бхиккху,

ахам̣ вада̄мӣтипи со вадеййа;

мамам̣ вадантӣтипи со вадеййа̄’’ти.

‘‘пахӣнама̄насса на санти гантха̄,

видхӯпита̄ ма̄нагантхасса саббе;

са вӣтиватто ман̃н̃атам̣ [ма̄нанам̣ (сӣ.), ман̃н̃ӣтам̣ (?)] сумедхо,

ахам̣ вада̄мӣтипи со вадеййа.

‘‘мамам̣ вадантӣтипи со вадеййа;

локе саман̃н̃ам̣ кусало видитва̄;

воха̄раматтена со вохареййа̄’’ти.

6. паджджотасуттам̣

26. ‘‘кати локасмим̣ паджджота̄, йехи локо пака̄сати [пабха̄сати (ка. сӣ.)];

бхагавантам̣ [бхавантам̣ (ка.)] пут̣т̣хума̄гамма, катхам̣ джа̄нему там̣ майа’’нти.

‘‘чатта̄ро локе паджджота̄, пан̃чаметтха на виджджати;

дива̄ тапати а̄диччо, раттима̄бха̄ти чандима̄.

‘‘атха агги дива̄раттим̣, таттха таттха пака̄сати;

самбуддхо тапатам̣ сет̣т̣хо, еса̄ а̄бха̄ ануттара̄’’ти.

7. сарасуттам̣

27. ‘‘куто сара̄ ниваттанти, каттха ват̣т̣ам̣ на ваттати;

каттха на̄ман̃ча рӯпан̃ча, асесам̣ упаруджджхатӣ’’ти.

‘‘йаттха а̄по ча патхавӣ, теджо ва̄йо на га̄дхати;

ато сара̄ ниваттанти, еттха ват̣т̣ам̣ на ваттати;

еттха на̄ман̃ча рӯпан̃ча, асесам̣ упаруджджхатӣ’’ти.

8. махаддханасуттам̣

28. ‘‘махаддхана̄ маха̄бхога̄, рат̣т̣хавантопи кхаттийа̄;

ан̃н̃аман̃н̃а̄бхигиджджханти, ка̄месу аналан̇ката̄.

‘‘тесу уссуккаджа̄тесу, бхавасота̄нуса̄рису;

кедха тан̣хам̣ [родхатан̣хам̣ (сйа̄. кам̣.), гедхатан̣хам̣ (ка.)] паджахим̣су [пава̄хим̣су (сйа̄. кам̣. ка.)], ке локасмим̣ ануссука̄’’ти.

‘‘хитва̄ ага̄рам̣ паббаджита̄, хитва̄ путтам̣ пасум̣ вийам̣;

хитва̄ ра̄ган̃ча досан̃ча, авиджджан̃ча вира̄джийа;

кхӣн̣а̄сава̄ араханто, те локасмим̣ ануссука̄’’ти.

9. чатучаккасуттам̣

29. ‘‘чатучаккам̣ навадва̄рам̣, пун̣н̣ам̣ лобхена сам̣йутам̣;

пан̇каджа̄там̣ маха̄вӣра, катхам̣ йа̄тра̄ бхависсатӣ’’ти.

‘‘чхетва̄ наддхим̣ вараттан̃ча, иччха̄ лобхан̃ча па̄пакам̣;

самӯлам̣ тан̣хамаббуйха, евам̣ йа̄тра̄ бхависсатӣ’’ти.

10. ен̣иджан̇гхасуттам̣

30. ‘‘ен̣иджан̇гхам̣ кисам̣ вӣрам̣, аппа̄ха̄рам̣ алолупам̣;

сӣхам̣ векачарам̣ на̄гам̣, ка̄месу анапеккхинам̣;

упасан̇камма пуччха̄ма, катхам̣ дуккха̄ памуччатӣ’’ти.

‘‘пан̃ча ка̄магун̣а̄ локе, маночхат̣т̣ха̄ паведита̄;

еттха чхандам̣ вира̄джетва̄, евам̣ дуккха̄ памуччатӣ’’ти.

саттивагго татийо.

тассудда̄нам̣ –

саттийа̄ пхусати чева, джат̣а̄ манонива̄ран̣а̄;

арахантена паджджото, сара̄ махаддханена ча;

чатучаккена навамам̣, ен̣иджан̇гхена те даса̄ти.