9. аран̣авибхан̇гасуттам̣

323. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо бхагава̄ бхиккхӯ а̄мантеси ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча – ‘‘аран̣авибхан̇гам̣ во, бхиккхаве, десесса̄ми. там̣ сун̣а̄тха, са̄дхукам̣ манаси каротха; бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча –

‘‘на ка̄масукхамануйун̃джеййа хӣнам̣ гаммам̣ потхуджджаникам̣ анарийам̣ анаттхасам̣хитам̣, на ча аттакиламатха̄нуйогамануйун̃джеййа дуккхам̣ анарийам̣ анаттхасам̣хитам̣. ете кхо, бхиккхаве [ете кхо (сӣ.), ете те (сйа̄. кам̣. пӣ.)], убхо анте анупагамма маджджхима̄ пат̣ипада̄ татха̄гатена абхисамбуддха̄, чаккхукаран̣ӣ н̃а̄н̣акаран̣ӣ упасама̄йа абхин̃н̃а̄йа самбодха̄йа нибба̄на̄йа сам̣ваттати. усса̄данан̃ча джан̃н̃а̄, апаса̄данан̃ча джан̃н̃а̄; усса̄данан̃ча н̃атва̄ апаса̄данан̃ча н̃атва̄ невусса̄деййа, на апаса̄деййа [на̄паса̄деййа (сӣ.)], дхаммамева десеййа. сукхавиниччхайам̣ джан̃н̃а̄; сукхавиниччхайам̣ н̃атва̄ аджджхаттам̣ сукхамануйун̃джеййа. рахова̄дам̣ на бха̄сеййа, саммукха̄ на кхӣн̣ам̣ [на̄тикхӣн̣ам̣ (сйа̄. кам̣. ка.)] бхан̣е. атарама̄нова бха̄сеййа, но тарама̄но. джанападанируттим̣ на̄бхинивесеййа, саман̃н̃ам̣ на̄тидха̄веййа̄ти – айамуддесо аран̣авибхан̇гасса.

324. ‘‘‘на ка̄масукхамануйун̃джеййа хӣнам̣ гаммам̣ потхуджджаникам̣ анарийам̣ анаттхасам̣хитам̣, на ча аттакиламатха̄нуйогамануйун̃джеййа дуккхам̣ анарийам̣ анаттхасам̣хита’нти – ити кхо панетам̣ вуттам̣; кин̃четам̣ пат̣ичча вуттам̣? йо ка̄мапат̣исандхисукхино соманасса̄нуйого хӣно гаммо потхуджджанико анарийо анаттхасам̣хито, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. йо ка̄мапат̣исандхисукхино соманасса̄нуйогам̣ анануйого хӣнам̣ гаммам̣ потхуджджаникам̣ анарийам̣ анаттхасам̣хитам̣, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. йо аттакиламатха̄нуйого дуккхо анарийо анаттхасам̣хито, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. йо аттакиламатха̄нуйогам̣ анануйого дуккхам̣ анарийам̣ анаттхасам̣хитам̣, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. ‘на ка̄масукхамануйун̃джеййа хӣнам̣ гаммам̣ потхуджджаникам̣ анарийам̣ анаттхасам̣хитам̣, на ча аттакиламатха̄нуйогам̣ ануйун̃джеййа дуккхам̣ анарийам̣ анаттхасам̣хита’нти – ити йам̣ там̣ вуттам̣ идаметам̣ пат̣ичча вуттам̣.

325. ‘‘‘ете кхо убхо анте анупагамма маджджхима̄ пат̣ипада̄ татха̄гатена абхисамбуддха̄, чаккхукаран̣ӣ н̃а̄н̣акаран̣ӣ упасама̄йа абхин̃н̃а̄йа самбодха̄йа нибба̄на̄йа сам̣ваттатӣ’ти – ити кхо панетам̣ вуттам̣. кин̃четам̣ пат̣ичча вуттам̣? айамева арийо ат̣т̣хан̇гико магго, сеййатхидам̣ – самма̄дит̣т̣хи, самма̄сан̇каппо, самма̄ва̄ча̄, самма̄камманто, самма̄а̄джӣво, самма̄ва̄йа̄мо, самма̄сати, самма̄сама̄дхи. ‘ете кхо убхо анте анупагамма маджджхима̄ пат̣ипада̄ татха̄гатена абхисамбуддха̄, чаккхукаран̣ӣ н̃а̄н̣акаран̣ӣ упасама̄йа абхин̃н̃а̄йа самбодха̄йа нибба̄на̄йа сам̣ваттатӣ’ти – ити йам̣ там̣ вуттам̣, идаметам̣ пат̣ичча вуттам̣.

326. ‘‘‘усса̄данан̃ча джан̃н̃а̄, апаса̄данан̃ча джан̃н̃а̄; усса̄данан̃ча н̃атва̄ апаса̄данан̃ча н̃атва̄ невусса̄деййа, на апаса̄деййа, дхаммамева десеййа̄’ти – ити кхо панетам̣ вуттам̣. кин̃четам̣ пат̣ичча вуттам̣? катхан̃ча, бхиккхаве, усса̄дана̄ ча хоти апаса̄дана̄ ча, но ча дхаммадесана̄? ‘йе ка̄мапат̣исандхисукхино соманасса̄нуйогам̣ ануйутта̄ хӣнам̣ гаммам̣ потхуджджаникам̣ анарийам̣ анаттхасам̣хитам̣, саббе те садуккха̄ саупагха̄та̄ саупа̄йа̄са̄ сапарил̣а̄ха̄ миччха̄пат̣ипанна̄’ти – ити вадам̣ [ити парам̣ (ка.)] иттхеке апаса̄дети.

‘‘‘йе аттакиламатха̄нуйогам̣ ануйутта̄ дуккхам̣ анарийам̣ анаттхасам̣хитам̣, саббе те садуккха̄ саупагха̄та̄ саупа̄йа̄са̄ сапарил̣а̄ха̄ миччха̄пат̣ипанна̄’ти – ити вадам̣ иттхеке апаса̄дети.

‘‘‘йе аттакиламатха̄нуйогам̣ анануйутта̄ дуккхам̣ анарийам̣ анаттхасам̣хитам̣, саббе те адуккха̄ анупагха̄та̄ анупа̄йа̄са̄ апарил̣а̄ха̄ самма̄пат̣ипанна̄’ти – ити вадам̣ иттхеке усса̄дети.

‘‘‘йесам̣ кесан̃чи бхавасам̣йоджанам̣ аппахӣнам̣, саббе те садуккха̄ саупагха̄та̄ саупа̄йа̄са̄ сапарил̣а̄ха̄ миччха̄пат̣ипанна̄’ти – ити вадам̣ иттхеке апаса̄дети.

‘‘‘йесам̣ кесан̃чи бхавасам̣йоджанам̣ пахӣнам̣, саббе те адуккха̄ анупагха̄та̄ анупа̄йа̄са̄ апарил̣а̄ха̄ самма̄пат̣ипанна̄’ти – ити вадам̣ иттхеке усса̄дети. евам̣ кхо, бхиккхаве, усса̄дана̄ ча хоти апаса̄дана̄ ча, но ча дхаммадесана̄.

327. ‘‘катхан̃ча, бхиккхаве, невусса̄дана̄ хоти на апаса̄дана̄, дхаммадесана̄ ча [дхаммадесана̄ва (сйа̄. кам̣.)]? ‘йе ка̄мапат̣исандхисукхино соманасса̄нуйогам̣ ануйутта̄ хӣнам̣ гаммам̣ потхуджджаникам̣ анарийам̣ анаттхасам̣хитам̣, саббе те садуккха̄ саупагха̄та̄ саупа̄йа̄са̄ сапарил̣а̄ха̄ миччха̄пат̣ипанна̄’ти – на евама̄ха. ‘ануйого ча кхо, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄’ти – ити вадам̣ дхаммамева десети.

‘‘‘йе ка̄мапат̣исандхисукхино соманасса̄нуйогам̣ анануйутта̄ хӣнам̣ гаммам̣ потхуджджаникам̣ анарийам̣ анаттхасам̣хитам̣, саббе те адуккха̄ анупагха̄та̄ анупа̄йа̄са̄ апарил̣а̄ха̄ самма̄пат̣ипанна̄’ти – на евама̄ха. ‘анануйого ча кхо, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄’ти – ити вадам̣ дхаммамева десети.

‘‘‘йе аттакиламатха̄нуйогам̣ ануйутта̄ дуккхам̣ анарийам̣ анаттхасам̣хитам̣, саббе те садуккха̄ саупагха̄та̄ саупа̄йа̄са̄ сапарил̣а̄ха̄ миччха̄пат̣ипанна̄’ти – на евама̄ха. ‘ануйого ча кхо, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄’ти – ити вадам̣ дхаммамева десети.

‘‘‘йе аттакиламатха̄нуйогам̣ анануйутта̄ дуккхам̣ анарийам̣ анаттхасам̣хитам̣, саббе те адуккха̄ анупагха̄та̄ анупа̄йа̄са̄ апарил̣а̄ха̄ самма̄пат̣ипанна̄’ти – на евама̄ха. ‘анануйого ча кхо, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄’ти – ити вадам̣ дхаммамева десети.

‘‘‘йесам̣ кесан̃чи бхавасам̣йоджанам̣ аппахӣнам̣, саббе те садуккха̄ саупагха̄та̄ саупа̄йа̄са̄ сапарил̣а̄ха̄ миччха̄пат̣ипанна̄’ти – на евама̄ха. ‘бхавасам̣йоджане ча кхо аппахӣне бхавопи аппахӣно хотӣ’ти – ити вадам̣ дхаммамева десети.

‘‘‘йесам̣ кесан̃чи бхавасам̣йоджанам̣ пахӣнам̣, саббе те адуккха̄ анупагха̄та̄ анупа̄йа̄са̄ апарил̣а̄ха̄ самма̄пат̣ипанна̄’ти – на евама̄ха. ‘бхавасам̣йоджане ча кхо пахӣне бхавопи пахӣно хотӣ’ти – ити вадам̣ дхаммамева десети. евам̣ кхо, бхиккхаве, невусса̄дана̄ хоти на апаса̄дана̄, дхаммадесана̄ ча. ‘усса̄данан̃ча джан̃н̃а̄, апаса̄данан̃ча джан̃н̃а̄; усса̄данан̃ча н̃атва̄ апаса̄данан̃ча н̃атва̄ невусса̄деййа, на апаса̄деййа, дхаммамева десеййа̄’ти – ити йам̣ там̣ вуттам̣ идаметам̣ пат̣ичча вуттам̣.

328. ‘‘‘сукхавиниччхайам̣ джан̃н̃а̄; сукхавиниччхайам̣ н̃атва̄ аджджхаттам̣ сукхамануйун̃джеййа̄’ти – ити кхо панетам̣ вуттам̣. кин̃четам̣ пат̣ичча вуттам̣? пан̃чиме, бхиккхаве, ка̄магун̣а̄. катаме пан̃ча? чаккхувин̃н̃еййа̄ рӯпа̄ ит̣т̣ха̄ канта̄ мана̄па̄ пийарӯпа̄ ка̄мӯпасам̣хита̄ раджанӣйа̄, сотавин̃н̃еййа̄ садда̄… гха̄навин̃н̃еййа̄ гандха̄… дживха̄вин̃н̃еййа̄ раса̄… ка̄йавин̃н̃еййа̄ пхот̣т̣хабба̄ ит̣т̣ха̄ канта̄ мана̄па̄ пийарӯпа̄ ка̄мӯпасам̣хита̄ раджанӣйа̄ – име кхо, бхиккхаве, пан̃ча ка̄магун̣а̄. йам̣ кхо, бхиккхаве, име пан̃ча ка̄магун̣е пат̣ичча уппаджджати сукхам̣ соманассам̣ идам̣ вуччати ка̄масукхам̣ мӣл̣хасукхам̣ путхуджджанасукхам̣ анарийасукхам̣. ‘на а̄севитаббам̣, на бха̄ветаббам̣, на бахулӣка̄таббам̣, бха̄йитаббам̣ етасса сукхасса̄’ти – вада̄ми. идха, бхиккхаве, бхиккху вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихарати. витаккавича̄ра̄нам̣ вӯпасама̄ аджджхаттам̣ сампаса̄данам̣ четасо екодибха̄вам̣ авитаккам̣ авича̄рам̣ сама̄дхиджам̣ пӣтисукхам̣ дутийам̣ джха̄нам̣ упасампаджджа вихарати. пӣтийа̄ ча вира̄га̄ упеккхако ча вихарати…пе… татийам̣ джха̄нам̣… чатуттхам̣ джха̄нам̣ упасампаджджа вихарати. идам̣ вуччати неккхаммасукхам̣ павивекасукхам̣ упасамасукхам̣ самбодхисукхам̣. ‘а̄севитаббам̣, бха̄ветаббам̣, бахулӣка̄таббам̣, на бха̄йитаббам̣ етасса сукхасса̄’ти – вада̄ми. ‘сукхавиниччхайам̣ джан̃н̃а̄; сукхавиниччхайам̣ н̃атва̄ аджджхаттам̣ сукхамануйун̃джеййа̄’ти – ити йам̣ там̣ вуттам̣ идаметам̣ пат̣ичча вуттам̣.

329. ‘‘‘рахова̄дам̣ на бха̄сеййа, саммукха̄ на кхӣн̣ам̣ бхан̣е’ти – ити кхо панетам̣ вуттам̣. кин̃четам̣ пат̣ичча вуттам̣? татра, бхиккхаве, йам̣ джан̃н̃а̄ рахова̄дам̣ абхӯтам̣ атаччхам̣ анаттхасам̣хитам̣ сасаккам̣ [сампаттам̣ (ка.)] там̣ рахова̄дам̣ на бха̄сеййа. йампи джан̃н̃а̄ рахова̄дам̣ бхӯтам̣ таччхам̣ анаттхасам̣хитам̣ тассапи сиккхеййа авачана̄йа. йан̃ча кхо джан̃н̃а̄ рахова̄дам̣ бхӯтам̣ таччхам̣ аттхасам̣хитам̣ татра ка̄лан̃н̃ӯ асса тасса рахова̄дасса вачана̄йа. татра, бхиккхаве, йам̣ джан̃н̃а̄ саммукха̄ кхӣн̣ава̄дам̣ абхӯтам̣ атаччхам̣ анаттхасам̣хитам̣ сасаккам̣ там̣ саммукха̄ кхӣн̣ава̄дам̣ на бха̄сеййа. йампи джан̃н̃а̄ саммукха̄ кхӣн̣ава̄дам̣ бхӯтам̣ таччхам̣ анаттхасам̣хитам̣ тассапи сиккхеййа авачана̄йа. йан̃ча кхо джан̃н̃а̄ саммукха̄ кхӣн̣ава̄дам̣ бхӯтам̣ таччхам̣ аттхасам̣хитам̣ татра ка̄лан̃н̃ӯ асса тасса саммукха̄ кхӣн̣ава̄дасса вачана̄йа. ‘рахова̄дам̣ на бха̄сеййа, саммукха̄ на кхӣн̣ам̣ бхан̣е’ти – ити йам̣ там̣ вуттам̣, идаметам̣ пат̣ичча вуттам̣.

330. ‘‘‘атарама̄нова бха̄сеййа но тарама̄но’ти – ити кхо панетам̣ вуттам̣. кин̃четам̣ пат̣ичча вуттам̣? татра, бхиккхаве, тарама̄насса бха̄сато ка̄йопи киламати, читтампи упахан̃н̃ати [ӯхан̃н̃ати (сӣ.)], саропи упахан̃н̃ати [ӯхан̃н̃ати (сӣ.)], кан̣т̣хопи а̄турӣйати, ависат̣т̣хампи хоти авин̃н̃еййам̣ тарама̄насса бха̄ситам̣. татра, бхиккхаве, атарама̄насса бха̄сато ка̄йопи на киламати, читтампи на упахан̃н̃ати, саропи на упахан̃н̃ати, кан̣т̣хопи на а̄турӣйати, висат̣т̣хампи хоти вин̃н̃еййам̣ атарама̄насса бха̄ситам̣. ‘атарама̄нова бха̄сеййа, но тарама̄но’ти – ити йам̣ там̣ вуттам̣, идаметам̣ пат̣ичча вуттам̣.

331. ‘‘‘джанападанируттим̣ на̄бхинивесеййа, саман̃н̃ам̣ на̄тидха̄веййа̄’ти – ити кхо панетам̣ вуттам̣. кин̃четам̣ пат̣ичча вуттам̣? катхан̃ча, бхиккхаве, джанападанируттийа̄ ча абхинивесо хоти саман̃н̃а̄йа ча атиса̄ро? идха, бхиккхаве, тадевекаччесу джанападесу ‘па̄тӣ’ти сан̃джа̄нанти, ‘патта’нти сан̃джа̄нанти, ‘витта’нти [вит̣т̣ханти (сйа̄. кам̣.)] сан̃джа̄нанти, ‘сара̄ва’нти сан̃джа̄нанти ‘дха̄ропа’нти [харосанти (сйа̄. кам̣.)] сан̃джа̄нанти, ‘пон̣а’нти сан̃джа̄нанти, ‘писӣлава’нти [писӣланти (сӣ. пӣ.), пипиланти (сйа̄. кам̣.)] сан̃джа̄нанти. ити йатха̄ йатха̄ нам̣ тесу тесу джанападесу сан̃джа̄нанти татха̄ татха̄ тха̄маса̄ пара̄ма̄са̄ [пара̄масса (сӣ.)] абхинивисса вохарати – ‘идамева саччам̣, могхаман̃н̃а’нти. евам̣ кхо, бхиккхаве, джанападанируттийа̄ ча абхинивесо хоти саман̃н̃а̄йа ча атиса̄ро.

332. ‘‘катхан̃ча, бхиккхаве, джанападанируттийа̄ ча анабхинивесо хоти саман̃н̃а̄йа ча анатиса̄ро? идха, бхиккхаве, тадевекаччесу джанападесу ‘па̄тӣ’ти сан̃джа̄нанти, ‘патта’нти сан̃джа̄нанти, ‘витта’нти сан̃джа̄нанти, ‘сара̄ва’нти сан̃джа̄нанти, ‘дха̄ропа’нти сан̃джа̄нанти, ‘пон̣а’нти сан̃джа̄нанти, ‘писӣлава’нти сан̃джа̄нанти. ити йатха̄ йатха̄ нам̣ тесу тесу джанападесу сан̃джа̄нанти ‘идам̣ кира ме [идам̣ кира те ча (ка.)] а̄йасманто сандха̄йа вохарантӣ’ти татха̄ татха̄ вохарати апара̄масам̣. евам̣ кхо, бхиккхаве, джанападанируттийа̄ ча анабхинивесо хоти, саман̃н̃а̄йа ча анатиса̄ро. ‘джанападанируттим̣ на̄бхинивесеййа саман̃н̃ам̣ на̄тидха̄веййа̄’ти – ити йам̣ там̣ вуттам̣, идаметам̣ пат̣ичча вуттам̣.

333. ‘‘татра, бхиккхаве, йо ка̄мапат̣исандхисукхино соманасса̄нуйого хӣно гаммо потхуджджанико анарийо анаттхасам̣хито, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра, бхиккхаве, йо ка̄мапат̣исандхисукхино соманасса̄нуйогам̣ анануйого хӣнам̣ гаммам̣ потхуджджаникам̣ анарийам̣ анаттхасам̣хитам̣, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. тасма̄ есо дхаммо аран̣о.

334. ‘‘татра, бхиккхаве, йо аттакиламатха̄нуйого дуккхо анарийо анаттхасам̣хито, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра, бхиккхаве, йо аттакиламатха̄нуйогам̣ анануйого дуккхам̣ анарийам̣ анаттхасам̣хитам̣, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. тасма̄ есо дхаммо аран̣о.

335. ‘‘татра, бхиккхаве, йа̄йам̣ маджджхима̄ пат̣ипада̄ татха̄гатена абхисамбуддха̄, чаккхукаран̣ӣ н̃а̄н̣акаран̣ӣ упасама̄йа абхин̃н̃а̄йа самбодха̄йа нибба̄на̄йа сам̣ваттати, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. тасма̄ есо дхаммо аран̣о.

336. ‘‘татра, бхиккхаве, йа̄йам̣ усса̄дана̄ ча апаса̄дана̄ ча но ча дхаммадесана̄, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра, бхиккхаве, йа̄йам̣ невусса̄дана̄ ча на апаса̄дана̄ ча дхаммадесана̄ ча, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. тасма̄ есо дхаммо аран̣о.

337. ‘‘татра, бхиккхаве, йамидам̣ ка̄масукхам̣ мӣл̣хасукхам̣ потхуджджанасукхам̣ анарийасукхам̣, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра, бхиккхаве, йамидам̣ неккхаммасукхам̣ павивекасукхам̣ упасамасукхам̣ самбодхисукхам̣, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. тасма̄ есо дхаммо аран̣о.

338. ‘‘татра, бхиккхаве, йва̄йам̣ рахова̄до абхӯто атаччхо анаттхасам̣хито, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра, бхиккхаве, йва̄йам̣ рахова̄до бхӯто таччхо анаттхасам̣хито, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра, бхиккхаве, йва̄йам̣ рахова̄до бхӯто таччхо аттхасам̣хито, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. тасма̄ есо дхаммо аран̣о.

339. ‘‘татра, бхиккхаве, йва̄йам̣ саммукха̄ кхӣн̣ава̄до абхӯто атаччхо анаттхасам̣хито, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра, бхиккхаве, йва̄йам̣ саммукха̄ кхӣн̣ава̄до бхӯто таччхо анаттхасам̣хито, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра, бхиккхаве, йва̄йам̣ саммукха̄ кхӣн̣ава̄до бхӯто таччхо аттхасам̣хито, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. тасма̄ есо дхаммо аран̣о.

340. ‘‘татра, бхиккхаве, йамидам̣ тарама̄насса бха̄ситам̣, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра, бхиккхаве, йамидам̣ атарама̄насса бха̄ситам̣, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. тасма̄ есо дхаммо аран̣о.

341. ‘‘татра, бхиккхаве, йва̄йам̣ джанападанируттийа̄ ча абхинивесо саман̃н̃а̄йа ча атиса̄ро, садуккхо есо дхаммо саупагха̄то саупа̄йа̄со сапарил̣а̄хо; миччха̄пат̣ипада̄. тасма̄ есо дхаммо саран̣о. татра бхиккхаве, йва̄йам̣ джанападанируттийа̄ ча анабхинивесо саман̃н̃а̄йа ча анатиса̄ро, адуккхо есо дхаммо анупагха̄то анупа̄йа̄со апарил̣а̄хо; самма̄пат̣ипада̄. тасма̄ есо дхаммо аран̣о.

‘‘тасма̄тиха, бхиккхаве, ‘саран̣ан̃ча дхаммам̣ джа̄нисса̄ма, аран̣ан̃ча дхаммам̣ джа̄нисса̄ма; саран̣ан̃ча дхаммам̣ н̃атва̄ аран̣ан̃ча дхаммам̣ н̃атва̄ аран̣апат̣ипадам̣ пат̣ипаджджисса̄ма̄’ти еван̃хи во, бхиккхаве, сиккхитаббам̣. субхӯти ча пана, бхиккхаве, кулапутто аран̣апат̣ипадам̣ пат̣ипанно’’ти.

идамавоча бхагава̄. аттамана̄ те бхиккхӯ бхагавато бха̄ситам̣ абхинандунти.

аран̣авибхан̇гасуттам̣ нит̣т̣хитам̣ навамам̣.