4. ломасакан̇гийабхаддекараттасуттам̣

286. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасма̄ ломасакан̇гийо [ломасакакан̇гийо (т̣ӣка̄)] саккесу вихарати капилаваттхусмим̣ нигродха̄ра̄ме. атха кхо чандано девапутто абхикканта̄йа раттийа̄ абхиккантаван̣н̣о кевалакаппам̣ нигродха̄ра̄мам̣ обха̄сетва̄ йена̄йасма̄ ломасакан̇гийо тенупасан̇ками; упасан̇камитва̄ екамантам̣ ат̣т̣ха̄си. екамантам̣ т̣хито кхо чандано девапутто а̄йасмантам̣ ломасакан̇гийам̣ етадавоча – ‘‘дха̄реси твам̣, бхиккху, бхаддекараттасса уддесан̃ча вибхан̇ган̃ча̄’’ти? ‘‘на кхо ахам̣, а̄вусо, дха̄реми бхаддекараттасса уддесан̃ча вибхан̇ган̃ча. твам̣ пана̄вусо, дха̄реси бхаддекараттасса уддесан̃ча вибхан̇ган̃ча̄’’ти? ‘‘ахампи кхо, бхиккху, на дха̄реми бхаддекараттасса уддесан̃ча вибхан̇ган̃ча. дха̄реси пана твам̣, бхиккху, бхаддекараттийо га̄тха̄’’ти? ‘‘на кхо ахам̣, а̄вусо, дха̄реми бхаддекараттийо га̄тха̄. твам̣ пана̄вусо, дха̄реси бхаддекараттийо га̄тха̄’’ти? ‘‘дха̄реми кхо ахам̣, бхиккху, бхаддекараттийо га̄тха̄’’ти. ‘‘йатха̄ катхам̣ пана твам̣, а̄вусо, дха̄реси бхаддекараттийо га̄тха̄’’ти? ‘‘екамидам̣, бхиккху, самайам̣ бхагава̄ девесу та̄ватим̣сесу вихарати па̄риччхаттакамӯле пан̣д̣укамбаласила̄йам̣. татра бхагава̄ дева̄нам̣ та̄ватим̣са̄нам̣ бхаддекараттасса уддесан̃ча вибхан̇ган̃ча абха̄си –

‘‘атӣтам̣ на̄нва̄гамеййа, наппат̣икан̇кхе ана̄гатам̣;

йадатӣтам̣ пахӣнам̣ там̣, аппаттан̃ча ана̄гатам̣.

‘‘паччуппаннан̃ча йо дхаммам̣, таттха таттха випассати;

асам̣хӣрам̣ асам̣куппам̣, там̣ видва̄ манубрӯхайе.

‘‘аджджева киччама̄таппам̣, ко джан̃н̃а̄ маран̣ам̣ суве;

на хи но сан̇гарам̣ тена, маха̄сенена маччуна̄.

‘‘евам̣ виха̄рим̣ а̄та̄пим̣, ахораттаматандитам̣;

там̣ ве бхаддекараттоти, санто а̄чиккхате мунӣ’’ти.

‘‘евам̣ кхо ахам̣, бхиккху, дха̄реми бхаддекараттийо га̄тха̄. угган̣ха̄хи твам̣, бхиккху, бхаддекараттасса уддесан̃ча вибхан̇ган̃ча; парийа̄пун̣а̄хи твам̣, бхиккху, бхаддекараттасса уддесан̃ча вибхан̇ган̃ча; дха̄рехи твам̣, бхиккху, бхаддекараттасса уддесан̃ча вибхан̇ган̃ча. аттхасам̣хито, бхиккху, бхаддекараттасса уддесо ча вибхан̇го ча а̄дибрахмачарийако’’ти. идамавоча чандано девапутто. идам̣ ватва̄ таттхевантарадха̄йи.

287. атха кхо а̄йасма̄ ломасакан̇гийо тасса̄ раттийа̄ аччайена сена̄санам̣ сам̣са̄метва̄ паттачӣварама̄да̄йа йена са̄ваттхи тена ча̄рикам̣ пакка̄ми. анупуббена ча̄рикам̣ чарама̄но йена са̄ваттхи джетаванам̣ ана̄тхапин̣д̣икасса а̄ра̄мо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ ломасакан̇гийо бхагавантам̣ етадавоча –

‘‘екамида̄хам̣, бханте, самайам̣ саккесу вихара̄ми капилаваттхусмим̣ нигродха̄ра̄ме. атха кхо, бханте, ан̃н̃атаро девапутто абхикканта̄йа раттийа̄ абхиккантаван̣н̣о кевалакаппам̣ нигродха̄ра̄мам̣ обха̄сетва̄ йена̄хам̣ тенупасан̇ками; упасан̇камитва̄ екамантам̣ ат̣т̣ха̄си. екамантам̣ т̣хито кхо, бханте, со девапутто мам̣ етадавоча – ‘дха̄реси твам̣, бхиккху, бхаддекараттасса уддесан̃ча вибхан̇ган̃ча̄’ти? евам̣ вутте ахам̣, бханте, там̣ девапуттам̣ етадавочам̣ – ‘на кхо ахам̣, а̄вусо, дха̄реми бхаддекараттасса уддесан̃ча вибхан̇ган̃ча. твам̣ пана̄вусо, дха̄реси бхаддекараттасса уддесан̃ча вибхан̇ган̃ча̄’ти? ‘ахампи кхо, бхиккху, на дха̄реми бхаддекараттасса уддесан̃ча вибхан̇ган̃ча. дха̄реси пана твам̣, бхиккху, бхаддекараттийо га̄тха̄’ти? ‘на кхо ахам̣, а̄вусо, дха̄реми бхаддекараттийо га̄тха̄. твам̣ пана̄вусо, дха̄реси бхаддекараттийо га̄тха̄’ти? ‘дха̄реми кхо ахам̣, бхиккху, бхаддекараттийо га̄тха̄’ти. ‘йатха̄ катхам̣ пана твам̣, а̄вусо, дха̄реси бхаддекараттийо га̄тха̄’ти? екамидам̣, бхиккху, самайам̣ бхагава̄ девесу та̄ватим̣сесу вихарати па̄риччхаттакамӯле пан̣д̣укамбаласила̄йам̣. татра кхо бхагава̄ дева̄нам̣ та̄ватим̣са̄нам̣ бхаддекараттасса уддесан̃ча вибхан̇ган̃ча абха̄си –

‘‘атӣтам̣ на̄нва̄гамеййа…пе…

там̣ ве бхаддекараттоти, санто а̄чиккхате мунӣ’’ти.

‘‘евам̣ кхо ахам̣, бхиккху, дха̄реми бхаддекараттийо га̄тха̄. угган̣ха̄хи твам̣, бхиккху, бхаддекараттасса уддесан̃ча вибхан̇ган̃ча; парийа̄пун̣а̄хи твам̣, бхиккху, бхаддекараттасса уддесан̃ча вибхан̇ган̃ча; дха̄рехи твам̣, бхиккху, бхаддекараттасса уддесан̃ча вибхан̇ган̃ча. аттхасам̣хито, бхиккху, бхаддекараттасса уддесо ча вибхан̇го ча а̄дибрахмачарийако’ти. идамавоча, бханте, со девапутто; идам̣ ватва̄ таттхевантарадха̄йи. са̄дху ме, бханте, бхагава̄ бхаддекараттасса уддесан̃ча вибхан̇ган̃ча десетӯ’’ти.

288. ‘‘джа̄на̄си пана твам̣, бхиккху, там̣ девапутта’’нти? ‘‘на кхо ахам̣, бханте, джа̄на̄ми там̣ девапутта’’нти. ‘‘чандано на̄ма со, бхиккху, девапутто. чандано, бхиккху, девапутто ат̣т̣хим̣ катва̄ [ат̣т̣хикатва̄ (сӣ. сйа̄. кам̣. пӣ.)] манасикатва̄ саббачетаса̄ [саббам̣ четасо (сӣ. сйа̄. кам̣. пӣ.), саббам̣ четаса̄ (ка.)] саманна̄харитва̄ охитасото дхаммам̣ сун̣а̄ти. тена хи, бхиккху, сун̣а̄хи, са̄дхукам̣ манаси карохи; бха̄сисса̄мӣ’’ти. ‘‘евам̣, бханте’’ти кхо а̄йасма̄ ломасакан̇гийо бхагавато паччассоси. бхагава̄ етадавоча –

‘‘атӣтам̣ на̄нва̄гамеййа, наппат̣икан̇кхе ана̄гатам̣;

йадатӣтам̣ пахӣнам̣ там̣, аппаттан̃ча ана̄гатам̣.

‘‘паччуппаннан̃ча йо дхаммам̣, таттха таттха випассати;

асам̣хӣрам̣ асам̣куппам̣, там̣ видва̄ манубрӯхайе.

‘‘аджджева киччама̄таппам̣, ко джан̃н̃а̄ маран̣ам̣ суве;

на хи но сан̇гарам̣ тена, маха̄сенена маччуна̄;

‘‘евам̣ виха̄рим̣ а̄та̄пим̣, ахораттаматандитам̣;

там̣ ве бхаддекараттоти, санто а̄чиккхате муни’’.

‘‘катхан̃ча, бхиккху, атӣтам̣ анва̄гамети…пе… евам̣ кхо, бхиккху, атӣтам̣ анва̄гамети. катхан̃ча, бхиккху, атӣтам̣ на̄нва̄гамети…пе… евам̣ кхо, бхиккху, атӣтам̣ на̄нва̄гамети. катхан̃ча, бхиккху, ана̄гатам̣ пат̣икан̇кхати…пе… евам̣ кхо, бхиккху, ана̄гатам̣ пат̣икан̇кхати. катхан̃ча, бхиккху, ана̄гатам̣ наппат̣икан̇кхати…пе… евам̣ кхо, бхиккху, ана̄гатам̣ наппат̣икан̇кхати. катхан̃ча, бхиккху, паччуппаннесу дхаммесу сам̣хӣрати…пе… евам̣ кхо, бхиккху, паччуппаннесу дхаммесу сам̣хӣрати. катхан̃ча, бхиккху, паччуппаннесу дхаммесу на сам̣хӣрати…пе… евам̣ кхо, бхиккху, паччуппаннесу дхаммесу на сам̣хӣрати.

‘‘атӣтам̣ на̄нва̄гамеййа, наппат̣икан̇кхе ана̄гатам̣;

йадатӣтам̣ пахӣнам̣ там̣, аппаттан̃ча ана̄гатам̣.

‘‘паччуппаннан̃ча йо дхаммам̣, таттха таттха випассати;

асам̣хӣрам̣ асам̣куппам̣, там̣ видва̄ манубрӯхайе.

‘‘аджджева киччама̄таппам̣, ко джан̃н̃а̄ маран̣ам̣ суве;

на хи но сан̇гарам̣ тена, маха̄сенена маччуна̄.

‘‘евам̣ виха̄рим̣ а̄та̄пим̣, ахораттаматандитам̣;

там̣ ве бхаддекараттоти, санто а̄чиккхате мунӣ’’ти.

идамавоча бхагава̄. аттамано а̄йасма̄ ломасакан̇гийо бхагавато бха̄ситам̣ абхинандӣти.

ломасакан̇гийабхаддекараттасуттам̣ нит̣т̣хитам̣ чатуттхам̣.