3. саппурисасуттам̣

105. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча – ‘‘саппурисадхамман̃ча во, бхиккхаве, десесса̄ми асаппурисадхамман̃ча. там̣ сун̣а̄тха, са̄дхукам̣ манаси каротха; бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча –

‘‘катамо ча, бхиккхаве, асаппурисадхаммо? идха, бхиккхаве, асаппурисо учча̄кула̄ паббаджито хоти. со ити пат̣исан̃чиккхати – ‘ахам̣ кхомхи учча̄кула̄ паббаджито, име панан̃н̃е бхиккхӯ на учча̄кула̄ паббаджита̄’ти. со та̄йа учча̄кулӣната̄йа атта̄нуккам̣сети, парам̣ вамбхети. айам̣ [айампи (сӣ. пӣ.)], бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо учча̄кулӣната̄йа лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи учча̄кула̄ паббаджито хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ та̄йа учча̄кулӣната̄йа неватта̄нуккам̣сети на парам̣ вамбхети. айам̣, бхиккхаве, саппурисадхаммо.

‘‘пуна чапарам̣, бхиккхаве, асаппурисо маха̄кула̄ паббаджито хоти…пе… [йатха̄ учча̄кулава̄ре татха̄ виттха̄ретаббам̣] маха̄бхогакула̄ паббаджито хоти…пе… ул̣а̄рабхогакула̄ паббаджито хоти. со ити пат̣исан̃чиккхати – ‘ахам̣ кхомхи ул̣а̄рабхогакула̄ паббаджито, име панан̃н̃е бхиккхӯ на ул̣а̄рабхогакула̄ паббаджита̄’ти. со та̄йа ул̣а̄рабхогата̄йа атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо ул̣а̄рабхогата̄йа лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи ул̣а̄рабхогакула̄ паббаджито хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ та̄йа ул̣а̄рабхогата̄йа неватта̄нуккам̣сети, на парам̣ вамбхети. айампи, бхиккхаве, саппурисадхаммо.

106. ‘‘пуна чапарам̣, бхиккхаве, асаппурисо н̃а̄то хоти йасассӣ. со ити пат̣исан̃чиккхати – ‘ахам̣ кхомхи н̃а̄то йасассӣ, име панан̃н̃е бхиккхӯ аппан̃н̃а̄та̄ аппесаккха̄’ти. со тена н̃аттена [н̃а̄тена (сӣ. ка.), н̃а̄таттена (сйа̄. кам̣. пӣ.)] атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо н̃аттена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи н̃а̄то хоти йасассӣ; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена н̃аттена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо ла̄бхӣ хоти чӣварапин̣д̣апа̄тасена̄санагила̄наппаччайабхесаджджапариккха̄ра̄нам̣. со ити пат̣исан̃чиккхати – ‘ахам̣ кхомхи ла̄бхӣ чӣварапин̣д̣апа̄тасена̄санагила̄наппаччайабхесаджджапариккха̄ра̄нам̣, име панан̃н̃е бхиккхӯ на ла̄бхино чӣварапин̣д̣апа̄тасена̄санагила̄наппаччайабхесаджджапариккха̄ра̄на’нти. со тена ла̄бхена атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо ла̄бхена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи ла̄бхӣ хоти чӣварапин̣д̣апа̄тасена̄санагила̄наппаччайабхесаджджапариккха̄ра̄нам̣; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена ла̄бхена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо бахуссуто хоти. со ити пат̣исан̃чиккхати – ‘ахам̣ кхомхи бахуссуто, име панан̃н̃е бхиккхӯ на бахуссута̄’ти. со тена ба̄хусаччена атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо ба̄хусаччена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи бахуссуто хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена ба̄хусаччена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо винайадхаро хоти. со ити пат̣исан̃чиккхати – ‘ахам̣ кхомхи винайадхаро, име панан̃н̃е бхиккхӯ на винайадхара̄’ти. со тена винайадхараттена атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо винайадхараттена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи винайадхаро хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена винайадхараттена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо дхаммакатхико хоти. со ити пат̣исан̃чиккхати – ‘ахам̣ кхомхи дхаммакатхико, име панан̃н̃е бхиккхӯ на дхаммакатхика̄’ти. со тена дхаммакатхикаттена атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо дхаммакатхикаттена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи дхаммакатхико хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена дхаммакатхикаттена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

107. ‘‘пуна чапарам̣, бхиккхаве, асаппурисо а̄ран̃н̃ико хоти. со ити пат̣исан̃чиккхати – ‘ахам̣ кхомхи а̄ран̃н̃ико име панан̃н̃е бхиккхӯ на а̄ран̃н̃ика̄’ти. со тена а̄ран̃н̃икаттена атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо а̄ран̃н̃икаттена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи а̄ран̃н̃ико хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена а̄ран̃н̃икаттена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо пам̣сукӯлико хоти. со ити пат̣исан̃чиккхати – ‘ахам̣ кхомхи пам̣сукӯлико, име панан̃н̃е бхиккхӯ на пам̣сукӯлика̄’ти. со тена пам̣сукӯликаттена атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо пам̣сукӯликаттена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи пам̣сукӯлико хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена пам̣сукӯликаттена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо пин̣д̣апа̄тико хоти. со ити пат̣исан̃чиккхати – ‘ахам̣ кхомхи пин̣д̣апа̄тико, име панан̃н̃е бхиккхӯ на пин̣д̣апа̄тика̄’ти. со тена пин̣д̣апа̄тикаттена атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо пин̣д̣апа̄тикаттена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи пин̣д̣апа̄тико хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена пин̣д̣апа̄тикаттена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо руккхамӯлико хоти. со ити пат̣исан̃чиккхати – ‘ахам̣ кхомхи руккхамӯлико, име панан̃н̃е бхиккхӯ на руккхамӯлика̄’ти. со тена руккхамӯликаттена атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо руккхамӯликаттена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи руккхамӯлико хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена руккхамӯликаттена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо соса̄нико хоти…пе… аббхока̄сико хоти… несаджджико хоти… йатха̄сантхатико хоти… ека̄санико хоти. со ити пат̣исан̃чиккхати – ‘ахам̣ кхомхи ека̄санико, име панан̃н̃е бхиккхӯ на ека̄саника̄’ти. со тена ека̄саникаттена атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘на кхо ека̄саникаттена лобхадхамма̄ ва̄ париккхайам̣ гаччханти, досадхамма̄ ва̄ париккхайам̣ гаччханти, мохадхамма̄ ва̄ париккхайам̣ гаччханти. но чепи ека̄санико хоти; со ча хоти дхамма̄нудхаммаппат̣ипанно са̄мӣчиппат̣ипанно анудхаммача̄рӣ, со таттха пуджджо, со таттха па̄сам̣со’ти. со пат̣ипадам̣йева антарам̣ каритва̄ тена ека̄саникаттена неватта̄нуккам̣сети, на парам̣ вамбхети. айампи, бхиккхаве, саппурисадхаммо.

108. ‘‘пуна чапарам̣, бхиккхаве, асаппурисо вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихарати. со ити пат̣исан̃чиккхати – ‘ахам̣ кхомхи пат̣хамаджджха̄насама̄паттийа̄ ла̄бхӣ, име панан̃н̃е бхиккхӯ пат̣хамаджджха̄насама̄паттийа̄ на ла̄бхино’ти. со та̄йа пат̣хамаджджха̄насама̄паттийа̄ атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘пат̣хамаджджха̄насама̄паттийа̄пи кхо атаммайата̄ вутта̄ бхагавата̄. йена йена хи ман̃н̃анти тато там̣ хоти ан̃н̃атха̄’ти. со атаммайатан̃н̃ева антарам̣ каритва̄ та̄йа пат̣хамаджджха̄насама̄паттийа̄ неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо витаккавича̄ра̄нам̣ вӯпасама̄ аджджхаттам̣ сампаса̄данам̣ четасо екодибха̄вам̣ авитаккам̣ авича̄рам̣ сама̄дхиджам̣ пӣтисукхам̣ дутийам̣ джха̄нам̣…пе… татийам̣ джха̄нам̣… чатуттхам̣ джха̄нам̣ упасампаджджа вихарати. со ити пат̣исан̃чиккхати – ‘ахам̣ кхомхи чатуттхаджджха̄насама̄паттийа̄ ла̄бхӣ, име панан̃н̃е бхиккхӯ чатуттхаджджха̄насама̄паттийа̄ на ла̄бхино’ти. со та̄йа чатуттхаджджха̄насама̄паттийа̄ атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘чатуттхаджджха̄насама̄паттийа̄пи кхо атаммайата̄ вутта̄ бхагавата̄. йена йена хи ман̃н̃анти тато там̣ хоти ан̃н̃атха̄’ти. со атаммайатан̃н̃ева антарам̣ каритва̄ та̄йа чатуттхаджджха̄насама̄паттийа̄ неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо саббасо рӯпасан̃н̃а̄нам̣ саматиккама̄ пат̣игхасан̃н̃а̄нам̣ аттхан̇гама̄ на̄наттасан̃н̃а̄нам̣ аманасика̄ра̄ ‘ананто а̄ка̄со’ти а̄ка̄са̄нан̃ча̄йатанам̣ упасампаджджа вихарати. со ити пат̣исан̃чиккхати – ‘ахам̣ кхомхи а̄ка̄са̄нан̃ча̄йатанасама̄паттийа̄ ла̄бхӣ, име панан̃н̃е бхиккхӯ а̄ка̄са̄нан̃ча̄йатанасама̄паттийа̄ на ла̄бхино’ти. со та̄йа а̄ка̄са̄нан̃ча̄йатанасама̄паттийа̄ атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘а̄ка̄са̄нан̃ча̄йатанасама̄паттийа̄пи кхо атаммайата̄ вутта̄ бхагавата̄. йена йена хи ман̃н̃анти тато там̣ хоти ан̃н̃атха̄’ти. со атаммайатан̃н̃ева антарам̣ каритва̄ та̄йа а̄ка̄са̄нан̃ча̄йатанасама̄паттийа̄ неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо саббасо а̄ка̄са̄нан̃ча̄йатанам̣ саматиккамма ‘анантам̣ вин̃н̃а̄н̣а’нти вин̃н̃а̄н̣ан̃ча̄йатанам̣ упасампаджджа вихарати. со ити пат̣исан̃чиккхати – ‘ахам̣ кхомхи вин̃н̃а̄н̣ан̃ча̄йатанасама̄паттийа̄ ла̄бхӣ, име панан̃н̃е бхиккхӯ вин̃н̃а̄н̣ан̃ча̄йатанасама̄паттийа̄ на ла̄бхино’ти. со та̄йа вин̃н̃а̄н̣ан̃ча̄йатанасама̄паттийа̄ атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘вин̃н̃а̄н̣ан̃ча̄йатанасама̄паттийа̄пи кхо атаммайата̄ вутта̄ бхагавата̄. йена йена хи ман̃н̃анти тато там̣ хоти ан̃н̃атха̄’ти. со атаммайатан̃н̃ева антарам̣ каритва̄ та̄йа вин̃н̃а̄н̣ан̃ча̄йатанасама̄паттийа̄ неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо саббасо вин̃н̃а̄н̣ан̃ча̄йатанам̣ саматиккамма ‘наттхи кин̃чӣ’ти а̄кин̃чан̃н̃а̄йатанам̣ упасампаджджа вихарати. со ити пат̣исан̃чиккхати – ‘ахам̣ кхомхи а̄кин̃чан̃н̃а̄йатанасама̄паттийа̄ ла̄бхӣ, име панан̃н̃е бхиккхӯ а̄кин̃чан̃н̃а̄йатанасама̄паттийа̄ на ла̄бхино’ти. со та̄йа а̄кин̃чан̃н̃а̄йатанасама̄паттийа̄ атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘а̄кин̃чан̃н̃а̄йатанасама̄паттийа̄пи кхо атаммайата̄ вутта̄ бхагавата̄. йена йена хи ман̃н̃анти тато там̣ хоти ан̃н̃атха̄’ти. со атаммайатан̃н̃ева антарам̣ каритва̄ та̄йа а̄кин̃чан̃н̃а̄йатанасама̄паттийа̄ неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, асаппурисо саббасо а̄кин̃чан̃н̃а̄йатанам̣ саматиккамма невасан̃н̃а̄на̄сан̃н̃а̄йатанам̣ упасампаджджа вихарати. со ити пат̣исан̃чиккхати – ‘ахам̣ кхомхи невасан̃н̃а̄на̄сан̃н̃а̄йатанасама̄паттийа̄ ла̄бхӣ, име панан̃н̃е бхиккхӯ невасан̃н̃а̄на̄сан̃н̃а̄йатанасама̄паттийа̄ на ла̄бхино’ти. со та̄йа невасан̃н̃а̄на̄сан̃н̃а̄йатанасама̄паттийа̄ атта̄нуккам̣сети, парам̣ вамбхети. айампи, бхиккхаве, асаппурисадхаммо. саппурисо ча кхо, бхиккхаве, ити пат̣исан̃чиккхати – ‘невасан̃н̃а̄на̄сан̃н̃а̄йатанасама̄паттийа̄пи кхо атаммайата̄ вутта̄ бхагавата̄. йена йена хи ман̃н̃анти тато там̣ хоти ан̃н̃атха̄’ти. со атаммайатан̃н̃ева антарам̣ каритва̄ та̄йа невасан̃н̃а̄на̄сан̃н̃а̄йатанасама̄паттийа̄ неватта̄нуккам̣сети, на парам̣ вамбхети. айампи, бхиккхаве, саппурисадхаммо.

‘‘пуна чапарам̣, бхиккхаве, саппурисо саббасо невасан̃н̃а̄на̄сан̃н̃а̄йатанам̣ саматиккамма сан̃н̃а̄ведайитаниродхам̣ упасампаджджа вихарати. пан̃н̃а̄йа часса дисва̄ а̄сава̄ [екачче а̄сава̄ (ка.)] париккхӣн̣а̄ хонти. айам̣ [айам̣ кхо (сйа̄. кам̣.)], бхиккхаве, бхиккху на кин̃чи ман̃н̃ати, на кухин̃чи ман̃н̃ати, на кеначи ман̃н̃атӣ’’ти.

идамавоча бхагава̄. аттамана̄ те бхиккхӯ бхагавато бха̄ситам̣ абхинандунти.

саппурисасуттам̣ нит̣т̣хитам̣ татийам̣.