3. пат̣хамасаттасуттам̣

63. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена са̄ваттхийа̄ манусса̄ йебхуййена ка̄месу ативелам̣ сатта̄ ( ) [(хонти) (бахӯсу) ат̣т̣хакатха̄йа сам̣сандетаббам̣] ратта̄ гиддха̄ гадхита̄ [гатхита̄ (сӣ.)] муччхита̄ аджджхопанна̄ самматтакаджа̄та̄ ка̄месу вихаранти.

атха кхо самбахула̄ бхиккхӯ пуббан̣хасамайам̣ нива̄сетва̄ паттачӣварама̄да̄йа са̄ваттхийам̣ пин̣д̣а̄йа па̄висим̣су. са̄ваттхийам̣ пин̣д̣а̄йа чаритва̄ паччха̄бхаттам̣ пин̣д̣апа̄тапат̣икканта̄ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘идха, бханте, са̄ваттхийа̄ манусса̄ йебхуййена ка̄месу ативелам̣ сатта̄ ратта̄ гиддха̄ гадхита̄ муччхита̄ аджджхопанна̄ самматтакаджа̄та̄ ка̄месу вихарантӣ’’ти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘ка̄месу сатта̄ ка̄масан̇гасатта̄,

сам̣йоджане ваджджамапассама̄на̄;

на хи джа̄ту сам̣йоджанасан̇гасатта̄,

огхам̣ тареййум̣ випулам̣ маханта’’нти. татийам̣;