4. дутийасаттасуттам̣

64. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена са̄ваттхийа̄ манусса̄ йебхуййена ка̄месу сатта̄ ( ) [(хонти) (бахӯсу) ат̣т̣хакатха̄йа сам̣сандетаббам̣] ратта̄ гиддха̄ гадхита̄ муччхита̄ аджджхопанна̄ андхӣката̄ самматтакаджа̄та̄ ка̄месу вихаранти.

атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа са̄ваттхим̣ пин̣д̣а̄йа па̄виси. аддаса̄ кхо бхагава̄ са̄ваттхийа̄ те мануссе йебхуййена ка̄месу сатте ратте гиддхе гадхите муччхите аджджхопанне андхӣкате самматтакаджа̄те ка̄месу вихаранте.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘ка̄мандха̄ джа̄ласан̃чханна̄, тан̣ха̄чхаданачха̄дита̄;

паматтабандхуна̄ баддха̄, маччха̄ва кумина̄мукхе;

джара̄маран̣аманвенти [джара̄маран̣ам̣ гаччханти (сӣ. сйа̄.)], ваччхо кхӣрапакова ма̄тара’’нти. чатуттхам̣;