10. утенасуттам̣

70. евам̣ ме сутам̣ – екам̣ самайам̣ бхагава̄ косамбийам̣ вихарати гхосита̄ра̄ме. тена кхо пана самайена ран̃н̃о утенасса [уденасса (сӣ. сйа̄. пӣ.)] уййа̄нагатасса антепурам̣ дад̣д̣хам̣ хоти, пан̃ча ча иттхисата̄ни [пан̃ча иттхисата̄ни (сӣ. сйа̄. пӣ.)] ка̄лан̇ката̄ни хонти са̄ма̄ватӣпамукха̄ни.

атха кхо самбахула̄ бхиккхӯ пуббан̣хасамайам̣ нива̄сетва̄ паттачӣварама̄да̄йа косамбим̣ пин̣д̣а̄йа па̄висим̣су. косамбийам̣ пин̣д̣а̄йа чаритва̄ паччха̄бхаттам̣ пин̣д̣апа̄тапат̣икканта̄ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘идха, бханте, ран̃н̃о утенасса уййа̄нагатасса антепурам̣ дад̣д̣хам̣, пан̃ча ча иттхисата̄ни ка̄лан̇ката̄ни са̄ма̄ватӣпамукха̄ни. та̄сам̣, бханте, упа̄сика̄нам̣ ка̄ гати ко абхисампара̄йо’’ти?

‘‘сантеттха, бхиккхаве, упа̄сика̄йо сота̄панна̄, санти сакада̄га̄минийо, санти ана̄га̄минийо. сабба̄ та̄, бхиккхаве, упа̄сика̄йо аниппхала̄ ка̄лан̇ката̄’’ти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘мохасамбандхано локо, бхаббарӯпова диссати;

упадхибандхано [упадхисамбандхано (ка. сӣ.)] ба̄ло, тамаса̄ парива̄рито;

сассаторива [сассати вийа (ка. сӣ.)] кха̄йати, пассато наттхи кин̃чана’’нти. дасамам̣;

тассудда̄нам̣ –

две бхаддийа̄ две ча сатта̄, лакун̣д̣ако тан̣ха̄кхайо;

папан̃чакхайо ча качча̄но, удапа̄нан̃ча утеноти.

чӯл̣авагго [чуллавагго (сӣ.), чӯлавагго (пӣ.)] саттамо нит̣т̣хито.