5. дутийана̄на̄титтхийасуттам̣

55. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена самбахула̄ на̄на̄титтхийасаман̣абра̄хман̣апарибба̄джака̄ са̄ваттхийам̣ пат̣ивасанти на̄на̄дит̣т̣хика̄ на̄на̄кхантика̄ на̄на̄ручика̄ на̄на̄дит̣т̣хиниссайаниссита̄.

сантеке саман̣абра̄хман̣а̄ евам̣ва̄дино евам̣дит̣т̣хино – ‘‘сассато атта̄ ча локо ча, идамева саччам̣ могхаман̃н̃а’’нти. санти панеке саман̣абра̄хман̣а̄ евам̣ва̄дино евам̣дит̣т̣хино – ‘‘асассато атта̄ ча локо ча, идамева саччам̣ могхаман̃н̃а’’нти. сантеке саман̣абра̄хман̣а̄ евам̣ва̄дино евам̣дит̣т̣хино – ‘‘сассато ча асассато ча [сассато асассато (сӣ.)] атта̄ ча локо ча, идамева саччам̣ могхаман̃н̃а’’нти. санти панеке саман̣абра̄хман̣а̄ евам̣ва̄дино евам̣дит̣т̣хино – ‘‘нева сассато на̄сассато атта̄ ча локо ча, идамева саччам̣ могхаман̃н̃а’’нти. сантеке саман̣абра̄хман̣а̄ евам̣ва̄дино евам̣дит̣т̣хино – ‘‘сайам̣като атта̄ ча локо ча, идамева саччам̣ могхаман̃н̃а’’нти. санти панеке саман̣абра̄хман̣а̄ евам̣ва̄дино евам̣дит̣т̣хино – ‘‘парам̣като атта̄ ча локо ча, идамева саччам̣ могхаман̃н̃а’’нти. сантеке саман̣абра̄хман̣а̄ евам̣ва̄дино евам̣дит̣т̣хино – ‘‘сайам̣като ча парам̣като ча [сайам̣като парам̣като (сӣ.)] атта̄ ча локо ча, идамева саччам̣ могхаман̃н̃а’’нти. санти панеке саман̣абра̄хман̣а̄ евам̣ва̄дино евам̣дит̣т̣хино – ‘‘асайам̣ка̄ро апарам̣ка̄ро [асайам̣ка̄ро ча апарам̣ка̄ро ча (сйа̄. пӣ.)] адхиччасамуппанно атта̄ ча локо ча, идамева саччам̣ могхаман̃н̃а’’нти. сантеке саман̣абра̄хман̣а̄ евам̣ва̄дино евам̣дит̣т̣хино – ‘‘сассатам̣ сукхадуккхам̣ атта̄ ча локо ча, идамева саччам̣ могхаман̃н̃а’’нти. санти панеке саман̣абра̄хман̣а̄ евам̣ва̄дино евам̣дит̣т̣хино – ‘‘асассатам̣ сукхадуккхам̣ атта̄ ча локо ча, идамева саччам̣ могхаман̃н̃а’’нти. сантеке саман̣абра̄хман̣а̄ евам̣ва̄дино евам̣дит̣т̣хино – ‘‘сассатан̃ча асассатан̃ча [сассатам̣ асассатам̣ (сӣ.)] сукхадуккхам̣ атта̄ ча локо ча, идамева саччам̣ могхаман̃н̃а’’нти. санти панеке саман̣абра̄хман̣а̄ евам̣ва̄дино евам̣дит̣т̣хино – ‘‘нева сассатам̣ на̄сассатам̣ сукхадуккхам̣ атта̄ ча локо ча, идамева саччам̣ могхаман̃н̃а’’нти. сантеке саман̣абра̄хман̣а̄ евам̣ва̄дино евам̣дит̣т̣хино – ‘‘сайам̣катам̣ сукхадуккхам̣ атта̄ ча локо ча, идамева саччам̣ могхаман̃н̃а’’нти. санти панеке саман̣абра̄хман̣а̄ евам̣ва̄дино евадит̣т̣хино – ‘‘парам̣катам̣ сукхадуккхам̣ атта̄ ча локо ча, идамева саччам̣ могхаман̃н̃а’’нти. сантеке саман̣абра̄хман̣а̄ евам̣ва̄дино евам̣дит̣т̣хино – ‘‘сайам̣катан̃ча парам̣катан̃ча [сайам̣катхам̣ парам̣катам̣ (сӣ.)] сукхадуккхам̣ атта̄ ча локо ча, идамева саччам̣ могхаман̃н̃а’’нти. санти панеке саман̣абра̄хман̣а̄ евам̣ва̄дино евам̣дит̣т̣хино – ‘‘асайам̣ка̄рам̣ апарам̣ка̄рам̣ адхиччасамуппаннам̣ сукхадуккхам̣ атта̄ ча локо ча, идамева саччам̣ могхаман̃н̃а’’нти.

те бхан̣д̣анаджа̄та̄ калахаджа̄та̄ вива̄да̄панна̄ ан̃н̃аман̃н̃ам̣ мукхасаттӣхи витуданта̄ вихаранти – ‘‘едисо дхаммо, недисо дхаммо; недисо дхаммо, едисо дхаммо’’ти.

атха кхо самбахула̄ бхиккхӯ пуббан̣хасамайам̣ нива̄сетва̄ паттачӣварама̄да̄йа са̄ваттхим̣ пин̣д̣а̄йа па̄висим̣су. са̄ваттхийам̣ пин̣д̣а̄йа чаритва̄ паччха̄бхаттам̣ пин̣д̣апа̄тапат̣икканта̄ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ –

‘‘идха, бханте, самбахула̄ на̄на̄титтхийасаман̣абра̄хман̣апарибба̄джака̄ са̄ваттхийам̣ пат̣ивасанти на̄на̄дит̣т̣хика̄ на̄на̄кхантика̄ на̄на̄ручика̄ на̄на̄дит̣т̣хиниссайаниссита̄.

‘‘сантеке саман̣абра̄хман̣а̄ евам̣ва̄дино евам̣дит̣т̣хино – ‘сассато атта̄ ча локо ча, идамева саччам̣ могхаман̃н̃а’нти…пе… те бхан̣д̣анаджа̄та̄ калахаджа̄та̄ вива̄да̄панна̄ ан̃н̃аман̃н̃ам̣ мукхасаттӣхи витуданта̄ вихаранти – ‘едисо дхаммо, недисо дхаммо; недисо дхаммо, едисо дхаммо’’’ти.

‘‘ан̃н̃атиттхийа̄, бхиккхаве, парибба̄джака̄ андха̄ ачаккхука̄; аттхам̣ на джа̄нанти анаттхам̣ на джа̄нанти, дхаммам̣ на джа̄нанти адхаммам̣ на джа̄нанти. те аттхам̣ аджа̄нанта̄ анаттхам̣ аджа̄нанта̄, дхаммам̣ аджа̄нанта̄ адхаммам̣ аджа̄нанта̄ бхан̣д̣анаджа̄та̄ калахаджа̄та̄ вива̄да̄панна̄ ан̃н̃аман̃н̃ам̣ мукхасаттӣхи витуданта̄ вихаранти – ‘едисо дхаммо, недисо дхаммо; недисо дхаммо, едисо дхаммо’’’ти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘имесу кира саджджанти, еке саман̣абра̄хман̣а̄;

антара̄ва висӣданти, аппатва̄ва тамогадха’’нти. пан̃чамам̣;