2. саттаджат̣иласуттам̣

52. евам̣ ме сутам̣ – екам̣ самайам̣ бхагава̄ са̄ваттхийам̣ вихарати пубба̄ра̄ме мига̄рама̄тупа̄са̄де. тена кхо пана самайена бхагава̄ са̄йанхасамайам̣ пат̣исалла̄на̄ вут̣т̣хито бахидва̄ракот̣т̣хаке нисинно хоти. атха кхо ра̄джа̄ пасенади косало йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди.

тена кхо пана самайена сатта ча джат̣ила̄, сатта ча ниган̣т̣ха̄, сатта ча ачелака̄, сатта ча екаса̄т̣ака̄, сатта ча парибба̄джака̄, парӯл̣хакаччханакхалома̄ кха̄рививидхама̄да̄йа [кха̄рӣвидхама̄да̄йа (ка. сам̣. ни. 1.122; дӣ. ни. 1.280)] бхагавато авидӯре атиккаманти.

аддаса̄ кхо ра̄джа̄ пасенади косало те сатта ча джат̣иле, сатта ча ниган̣т̣хе, сатта ча ачелаке, сатта ча екаса̄т̣аке, сатта ча парибба̄джаке, парӯл̣хакаччханакхаломе кха̄рививидхама̄да̄йа бхагавато авидӯре атиккаманте. дисва̄на ут̣т̣ха̄йа̄сана̄ екам̣сам̣ уттара̄сан̇гам̣ каритва̄ даккхин̣аджа̄н̣уман̣д̣алам̣ патхавийам̣ [пат̣хавийам̣ (сӣ. сйа̄. пӣ.)] нихантва̄ йена те сатта ча джат̣ила̄, сатта ча ниган̣т̣ха̄, сатта ча ачелака̄, сатта ча екаса̄т̣ака̄, сатта ча парибба̄джака̄, тенан̃джалим̣ пан̣а̄метва̄ тиккхаттум̣ на̄мам̣ са̄веси – ‘‘ра̄джа̄хам̣, бханте, пасенади косало; ра̄джа̄хам̣, бханте, пасенади косало; ра̄джа̄хам̣, бханте, пасенади косало’’ти.

атха кхо ра̄джа̄ пасенади косало ачирапаккантесу тесу саттасу ча джат̣илесу, саттасу ча ниган̣т̣хесу, саттасу ча ачелакесу, саттасу ча екаса̄т̣акесу, саттасу ча парибба̄джакесу, йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо ра̄джа̄ пасенади косало бхагавантам̣ етадавоча – ‘‘йе кхо [йе ча кхо (сӣ.), йе ча те (сйа̄.), йе ну кечи кхо (пӣ.), йе те (сам̣. ни. 1.122), йе ну кхо кечи (?)] бханте, локе араханто ва̄ арахаттамаггам̣ ва̄ сама̄панна̄ ете тесам̣ ан̃н̃атаре’’ти [ан̃н̃атара̄ти (сӣ. ка.), ан̃н̃атароти (сйа̄. пӣ.)].

‘‘дуджджа̄нам̣ кхо етам̣, маха̄ра̄джа, тайа̄ гихина̄ ка̄мабхогина̄ путтасамба̄дхасайанам̣ аджджха̄васантена ка̄сикачанданам̣ паччанубхонтена ма̄ла̄гандхавилепанам̣ дха̄райантена джа̄тарӯпараджатам̣ са̄дийантена – име ва̄ араханто, име ва̄ арахаттамаггам̣ сама̄панна̄ти.

‘‘сам̣ва̄сена кхо, маха̄ра̄джа, сӣлам̣ ведитаббам̣. тан̃ча кхо дӣгхена аддхуна̄ на иттарам̣ [на иттарена (сйа̄. сӣ. сйа̄. ат̣т̣ха.)], манасикарота̄ но аманасикарота̄, пан̃н̃авата̄ но дуппан̃н̃ена. сам̣воха̄рена кхо, маха̄ра̄джа, сочеййам̣ ведитаббам̣. тан̃ча кхо дӣгхена аддхуна̄ на иттарам̣, манасикарота̄ но аманасикарота̄, пан̃н̃авата̄ но дуппан̃н̃ена. а̄пада̄су кхо, маха̄ра̄джа, тха̄мо ведитаббо. со ча кхо дӣгхена аддхуна̄ на иттарам̣, манасикарота̄ но аманасикарота̄, пан̃н̃авата̄ но дуппан̃н̃ена. са̄каччха̄йа кхо, маха̄ра̄джа, пан̃н̃а̄ ведитабба̄. са̄ ча кхо дӣгхена аддхуна̄ на иттарам̣, манасикарота̄ но аманасикарота̄, пан̃н̃авата̄ но дуппан̃н̃ена̄’’ти.

‘‘аччхарийам̣, бханте, аббхутам̣, бханте! йа̄ва субха̄ситам̣ чидам̣ [субха̄ситамидам̣ (сам̣. ни. 1.122)], бханте, бхагавата̄ – ‘дуджджа̄нам̣ кхо етам̣, маха̄ра̄джа, тайа̄ гихина̄ путтасамба̄дхасайанам̣ аджджха̄васантена ка̄сикачанданам̣ паччанубхонтена ма̄ла̄гандхавилепанам̣ дха̄райантена джа̄тарӯпараджатам̣ са̄дийантена – име ва̄ араханто, име ва̄ арахаттамаггам̣ сама̄панна̄ти. сам̣ва̄сена кхо, маха̄ра̄джа, сӣлам̣ ведитаббам̣…пе… са̄каччха̄йа кхо, маха̄ра̄джа, пан̃н̃а̄ ведитабба̄. са̄ ча кхо дӣгхена аддхуна̄ на иттарам̣, манасикарота̄ но аманасикарота̄, пан̃н̃авата̄ но дуппан̃н̃ена̄’’’ти.

‘‘ете, бханте, мама пуриса̄ чора̄ [чара̄ (сам̣. ни. 1.122)] очарака̄ джанападам̣ очаритва̄ гаччханти. техи пат̣хамам̣ очин̣н̣ам̣ ахам̣ паччха̄ оса̄рисса̄ми [отарисса̄ми (сӣ. сйа̄. пӣ.), ойа̄йисса̄ми (сӣ. сйа̄. ат̣т̣ха.), оса̄пайисса̄ми (сам̣. ни. 1.122)]. ида̄ни те, бханте, там̣ раджоджаллам̣ пава̄хетва̄ сунха̄та̄ сувилитта̄ каппитакесамассӯ ода̄таваттхавасана̄ пан̃чахи ка̄магун̣ехи самаппита̄ саман̇гибхӯта̄ парича̄рессантӣ’’ [ча̄рийанти (сйа̄.)] ти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘на ва̄йамеййа саббаттха, на̄н̃н̃асса пурисо сийа̄;

на̄н̃н̃ам̣ нисса̄йа джӣвеййа, дхаммена на ван̣им̣ [ва̄н̣им̣ (сӣ.), ван̣ӣ (сйа̄. пӣ.), ва̄н̣иджам̣ (ка.)] чаре’’ти. дутийам̣;