4. кума̄ракасуттам̣

44. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена самбахула̄ кума̄рака̄ антара̄ ча са̄ваттхим̣ антара̄ ча джетаванам̣ маччхаке ба̄дхенти.

атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа са̄ваттхим̣ пин̣д̣а̄йа па̄виси. аддаса̄ кхо бхагава̄ те самбахуле кума̄раке антара̄ ча са̄ваттхим̣ антара̄ ча джетаванам̣ маччхаке ба̄дхенте. дисва̄на йена те кума̄рака̄ тенупасан̇ками; упасан̇камитва̄ те кума̄раке етадавоча – ‘‘бха̄йатха во, тумхе кума̄рака̄, дуккхасса, аппийам̣ во дуккха’’нти? ‘‘евам̣, бханте, бха̄йа̄ма майам̣, бханте, дуккхасса, аппийам̣ но дуккха’’нти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘саче бха̄йатха дуккхасса, саче во дуккхамаппийам̣;

ма̄каттха па̄пакам̣ каммам̣, а̄ви ва̄ йади ва̄ рахо.

‘‘саче ча па̄пакам̣ каммам̣, кариссатха каротха ва̄;

на во дуккха̄ памутйаттхи, упеччапи [упаччапи (ка.), уппаччапи (?), уппатитва̄пи ити аттхо] пала̄йата’’нти. чатуттхам̣;