3. гопа̄лакасуттам̣

33. евам̣ ме сутам̣ – екам̣ самайам̣ бхагава̄ косалесу ча̄рикам̣ чарати махата̄ бхиккхусан̇гхена саддхим̣. атха кхо бхагава̄ магга̄ оккамма йена ан̃н̃атарам̣ руккхамӯлам̣ тенупасан̇ками; упасан̇камитва̄ пан̃н̃атте а̄сане нисӣди.

атха кхо ан̃н̃атаро гопа̄лако йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо там̣ гопа̄лакам̣ бхагава̄ дхаммийа̄ катха̄йа сандассеси сама̄дапеси [сама̄да̄песи (?)] самуттеджеси сампахам̣сеси.

атха кхо со гопа̄лако бхагавата̄ дхаммийа̄ катха̄йа сандассито сама̄дапито [сама̄дипито (?)] самуттеджито сампахам̣сито бхагавантам̣ етадавоча – ‘‘адхива̄сету ме, бханте, бхагава̄ сва̄тана̄йа бхаттам̣ саддхим̣ бхиккхусан̇гхена̄’’ти. адхива̄сеси бхагава̄ тун̣хӣбха̄вена. атха кхо со гопа̄лако бхагавато адхива̄санам̣ видитва̄ ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми.

атха кхо со гопа̄лако тасса̄ раттийа̄ аччайена саке нивесане пахӯтам̣ апподакапа̄йасам̣ [апподакапа̄йа̄сам̣ (саббаттха)] пат̣ийа̄да̄петва̄ наван̃ча саппим̣ бхагавато ка̄лам̣ а̄рочеси – ‘‘ка̄ло, бханте, нит̣т̣хитам̣ бхатта’’нти. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа саддхим̣ бхиккхусан̇гхена йена тасса гопа̄лакасса нивесанам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо со гопа̄лако буддхаппамукхам̣ бхиккхусан̇гхам̣ апподакапа̄йасена [апподакапа̄йа̄сена ча (сйа̄. пӣ.)] навена ча саппина̄ сахаттха̄ сантаппеси сампава̄реси. атха кхо со гопа̄лако бхагавантам̣ бхутта̄вим̣ онӣтапаттапа̄н̣им̣ ан̃н̃атарам̣ нӣчам̣ а̄санам̣ гахетва̄ екамантам̣ нисӣди. екамантам̣ нисиннам̣ кхо там̣ гопа̄лакам̣ бхагава̄ дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ ут̣т̣ха̄йа̄сана̄ пакка̄ми. атха кхо ачирапаккантасса бхагавато там̣ гопа̄лакам̣ ан̃н̃атаро пурисо сӣмантарика̄йа джӣвита̄ воропеси.

атха кхо самбахула̄ бхиккхӯ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘йена, бханте, гопа̄лакена аджджа буддхаппамукхо бхиккхусан̇гхо апподакапа̄йасена навена ча саппина̄ сахаттха̄ сантаппито сампава̄рито со кира, бханте, гопа̄лако ан̃н̃атарена пурисена сӣмантарика̄йа джӣвита̄ воропито’’ти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘дисо дисам̣ йам̣ там̣ кайира̄, верӣ ва̄ пана веринам̣;

миччха̄пан̣ихитам̣ читтам̣, па̄пийо нам̣ тато каре’’ти. татийам̣;