2. уддхатасуттам̣

32. евам̣ ме сутам̣ – екам̣ самайам̣ бхагава̄ кусина̄ра̄йам̣ вихарати упаваттане малла̄нам̣ са̄лаване. тена кхо пана самайена самбахула̄ бхиккхӯ бхагавато авидӯре аран̃н̃акут̣ика̄йам̣ вихаранти уддхата̄ уннал̣а̄ чапала̄ мукхара̄ викин̣н̣ава̄ча̄ мут̣т̣хассатино асампаджа̄на̄ асама̄хита̄ виббхантачитта̄ па̄катиндрийа̄.

аддаса̄ кхо бхагава̄ те самбахуле бхиккхӯ авидӯре аран̃н̃акут̣ика̄йам̣ вихаранте уддхате уннал̣е чапале мукхаре викин̣н̣ава̄че мут̣т̣хассатино асампаджа̄не асама̄хите виббхантачитте па̄катиндрийе.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘араккхитена ка̄йена [читтена (неттийам̣)], миччха̄дит̣т̣хихатена [миччха̄дит̣т̣хигатена (бахӯсу)] ча;

тхинамиддха̄ [тхӣнамиддха̄ (сӣ. сйа̄. кам̣. пӣ.)] бхибхӯтена, васам̣ ма̄расса гаччхати.

‘‘тасма̄ раккхитачиттасса, самма̄сан̇каппагочаро;

самма̄дит̣т̣хипуреккха̄ро, н̃атва̄на удайаббайам̣;

тхӣнамиддха̄бхибхӯ бхиккху, сабба̄ дуггатийо джахе’’ти. дутийам̣;