9. сиппасуттам̣

29. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена самбахула̄нам̣ бхиккхӯнам̣ паччха̄бхаттам̣ пин̣д̣апа̄тапат̣икканта̄нам̣ ман̣д̣алама̄л̣е саннисинна̄нам̣ саннипатита̄нам̣ айамантара̄катха̄ удапа̄ди – ‘‘ко ну кхо, а̄вусо, сиппам̣ джа̄на̄ти? ко ким̣ сиппам̣ сиккхи? катарам̣ сиппам̣ сиппа̄нам̣ агга’’нти?

таттхекачче евама̄хам̣су – ‘‘хаттхисиппам̣ сиппа̄нам̣ агга’’нти. екачче евама̄хам̣су – ‘‘ассасиппам̣ сиппа̄нам̣ агга’’нти. екачче евама̄хам̣су – ‘‘ратхасиппам̣ сиппа̄нам̣ агга’’нти. екачче евама̄хам̣су – ‘‘дханусиппам̣ сиппа̄нам̣ агга’’нти. екачче евама̄хам̣су – ‘‘тхарусиппам̣ сиппа̄нам̣ агга’’нти. екачче евама̄хам̣су – ‘‘мудда̄сиппам̣ сиппа̄нам̣ агга’’нти. екачче евама̄хам̣су – ‘‘ган̣ана̄сиппам̣ сиппа̄нам̣ агга’’нти. екачче евама̄хам̣су – ‘‘сан̇кха̄насиппам̣ сиппа̄нам̣ агга’’нти. екачче евама̄хам̣су – ‘‘лекха̄сиппам̣ сиппа̄нам̣ агга’’нти. екачче евама̄хам̣су – ‘‘ка̄веййасиппам̣ [ка̄бйасиппам̣ (сйа̄.)] сиппа̄нам̣ агга’’нти. екачче евама̄хам̣су – ‘‘лока̄йатасиппам̣ сиппа̄нам̣ агга’’нти. екачче евама̄хам̣су – ‘‘кхаттавиджджа̄сиппам̣ сиппа̄нам̣ агга’’нти. айан̃чарахи тесам̣ бхиккхӯнам̣ антара̄катха̄ хоти виппаката̄.

атха кхо бхагава̄ са̄йанхасамайам̣ пат̣исалла̄на̄ вут̣т̣хито йена ман̣д̣алама̄л̣о тенупасан̇ками; упасан̇камитва̄ пан̃н̃атте а̄сане нисӣди. нисаджджа кхо бхагава̄ бхиккхӯ а̄мантеси – ‘‘ка̄йа нуттха, бхиккхаве, етарахи катха̄йа саннисинна̄, ка̄ ча пана во антара̄катха̄ виппаката̄’’ти?

‘‘идха, бханте, амха̄кам̣ паччха̄бхаттам̣ пин̣д̣апа̄тапат̣икканта̄нам̣ ман̣д̣алама̄л̣е саннисинна̄нам̣ айамантара̄катха̄ удапа̄ди – ‘ко ну кхо, а̄вусо, сиппам̣ джа̄на̄ти? ко ким̣ сиппам̣ сиккхи? катарам̣ сиппам̣ сиппа̄нам̣ агга’нти?

‘‘таттхекачче евама̄хам̣су – ‘хаттхисиппам̣ сиппа̄нам̣ агга’нти. екачче евама̄хам̣су – ‘ассасиппам̣ сиппа̄нам̣ агга’нти; екачче евама̄хам̣су – ‘ратхасиппам̣ сиппа̄нам̣ агга’нти; екачче евама̄хам̣су – ‘дханусиппам̣ сиппа̄нам̣ агга’нти; екачче евама̄хам̣су – ‘тхарусиппам̣ сиппа̄нам̣ агга’нти, екачче евама̄хам̣су – ‘мудда̄сиппам̣ сиппа̄нам̣ агга’нти екачче евама̄хам̣су – ‘ган̣ана̄сиппам̣ сиппа̄нам̣ агга’нти; екачче евама̄хам̣су – ‘сан̇кха̄насиппам̣ сиппа̄нам̣ агга’нти; екачче евама̄хам̣су – ‘лекха̄сиппам̣ сиппа̄нам̣ агга’нти; екачче евама̄хам̣су – ‘ка̄веййасиппам̣ сиппа̄нам̣ агга’нти; екачче евама̄хам̣су – ‘лока̄йатасиппам̣ сиппа̄нам̣ агга’нти; екачче евама̄хам̣су – ‘кхаттавиджджа̄сиппам̣ сиппа̄нам̣ агга’нти. айам̣ кхо но, бханте, антара̄катха̄ хоти виппаката̄, атха бхагава̄ ануппатто’’ти.

‘‘на кхветам̣, бхиккхаве, тумха̄кам̣ патирӯпам̣ кулапутта̄нам̣ саддха̄ ага̄расма̄ анага̄рийам̣ паббаджита̄нам̣ йам̣ тумхе еварӯпим̣ катхам̣ катхеййа̄тха. саннипатита̄нам̣ во, бхиккхаве, двайам̣ каран̣ӣйам̣ – дхаммӣ ва̄ катха̄ арийо ва̄ тун̣хӣбха̄во’’ти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘асиппаджӣвӣ лаху аттхака̄мо,

йатиндрийо саббадхи виппамутто;

анокаса̄рӣ амамо нира̄со,

хитва̄ ма̄нам̣ екачаро са бхиккхӯ’’ти. навамам̣;