9. виса̄кха̄суттам̣

19. евам̣ ме сутам̣ – екам̣ самайам̣ бхагава̄ са̄ваттхийам̣ вихарати пубба̄ра̄ме мига̄рама̄тупа̄са̄де. тена кхо пана самайена виса̄кха̄йа мига̄рама̄туйа̄ кочидева аттхо ран̃н̃е пасенадимхи косале пат̣ибаддхо [пат̣ибандхо (пӣ. ка.)] хоти. там̣ ра̄джа̄ пасенади косало на йатха̄дхиппа̄йам̣ тӣрети.

атха кхо виса̄кха̄ мига̄рама̄та̄ дива̄ дивасса [дива̄дивассева (сйа̄.), дива̄дивассейева (пӣ.), дива̄ дивассайева (ка.)] йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо виса̄кхам̣ мига̄рама̄тарам̣ бхагава̄ етадавоча – ‘‘ханда куто ну твам̣, виса̄кхе, а̄гаччхаси дива̄ дивасса̄’’ти? ‘‘идха ме, бханте, кочидева аттхо ран̃н̃е пасенадимхи косале пат̣ибаддхо; там̣ ра̄джа̄ пасенади косало на йатха̄дхиппа̄йам̣ тӣретӣ’’ти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘саббам̣ паравасам̣ дуккхам̣, саббам̣ иссарийам̣ сукхам̣;

са̄дха̄ран̣е вихан̃н̃анти, йога̄ хи дуратиккама̄’’ти. навамам̣;