10. бхаддийасуттам̣

20. евам̣ ме сутам̣ – екам̣ самайам̣ бхагава̄ анупийа̄йам̣ вихарати амбаване. тена кхо пана самайена а̄йасма̄ бхаддийо ка̄л̣ӣгодха̄йа путто аран̃н̃агатопи руккхамӯлагатопи сун̃н̃а̄га̄рагатопи абхиккхан̣ам̣ уда̄нам̣ уда̄неси – ‘‘ахо сукхам̣, ахо сукха’’нти!

ассосум̣ кхо самбахула̄ бхиккхӯ а̄йасмато бхаддийасса ка̄л̣ӣгодха̄йа путтасса аран̃н̃агатассапи руккхамӯлагатассапи сун̃н̃а̄га̄рагатассапи абхиккхан̣ам̣ уда̄нам̣ уда̄нентасса – ‘‘ахо сукхам̣, ахо сукха’’нти! сутва̄на несам̣ етадахоси – ‘‘ниссам̣сайам̣ кхо, а̄вусо, а̄йасма̄ бхаддийо ка̄л̣ӣгодха̄йа путто анабхирато брахмачарийам̣ чарати, йам̣са пуббе ага̄рийабхӯтасса [ага̄рикабхӯтасса (сйа̄.)] раджджасукхам̣, со тамануссарама̄но аран̃н̃агатопи руккхамӯлагатопи сун̃н̃а̄га̄рагатопи абхиккхан̣ам̣ уда̄нам̣ уда̄неси – ‘ахо сукхам̣, ахо сукха’’’нти!

атха кхо самбахула̄ бхиккхӯ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ – ‘‘а̄йасма̄, бханте, бхаддийо ка̄л̣ӣгодха̄йа путто аран̃н̃агатопи руккхамӯлагатопи сун̃н̃а̄га̄рагатопи абхиккхан̣ам̣ уда̄нам̣ уда̄неси – ‘ахо сукхам̣, ахо сукха’нти! ниссам̣сайам̣ кхо, бханте, а̄йасма̄ бхаддийо ка̄л̣ӣгодха̄йа путто анабхирато брахмачарийам̣ чарати. йам̣са пуббе ага̄рийабхӯтасса раджджасукхам̣, со тамануссарама̄но аран̃н̃агатопи руккхамӯлагатопи сун̃н̃а̄га̄рагатопи абхиккхан̣ам̣ уда̄нам̣ уда̄неси – ‘ахо сукхам̣, ахо сукха’’’нти!

атха кхо бхагава̄ ан̃н̃атарам̣ бхиккхум̣ а̄мантеси – ‘‘ехи твам̣, бхиккху, мама вачанена бхаддийам̣ бхиккхум̣ а̄мантехи – ‘саттха̄ там̣, а̄вусо бхаддийа, а̄мантетӣ’’’ти.

‘‘евам̣, бханте’’ти кхо со бхиккху бхагавато пат̣иссутва̄ йена̄йасма̄ бхаддийо ка̄л̣ӣгодха̄йа путто тенупасан̇ками; упасан̇камитва̄ бхаддийам̣ ка̄л̣ӣгодха̄йа путтам̣ етадавоча – ‘‘саттха̄ там̣, а̄вусо бхаддийа, а̄мантетӣ’’ти. ‘‘евама̄вусо’’ти кхо а̄йасма̄ бхаддийо ка̄л̣ӣгодха̄йа путто тасса бхиккхуно пат̣иссутва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо а̄йасмантам̣ бхаддийам̣ ка̄л̣ӣгодха̄йа путтам̣ бхагава̄ етадавоча –

‘‘саччам̣ кира твам̣, бхаддийа, аран̃н̃агатопи руккхамӯлагатопи сун̃н̃а̄га̄рагатопи абхиккхан̣ам̣ уда̄нам̣ уда̄неси – ‘ахо сукхам̣, ахо сукха’’’нти! ‘‘евам̣, бханте’’ти.

‘‘ким̣ пана [кам̣ пана (сйа̄ пӣ.)] твам̣, бхаддийа, аттхавасам̣ сампассама̄но аран̃н̃агатопи руккхамӯлагатопи сун̃н̃а̄га̄рагатопи абхиккхан̣ам̣ уда̄нам̣ уда̄неси – ‘ахо сукхам̣, ахо сукха’’’нти! ‘‘пуббе ме, бханте, ага̄рийабхӯтасса раджджам̣ ка̄рентасса антопи антепуре раккха̄ сусам̣вихита̄ ахоси, бахипи антепуре раккха̄ сусам̣вихита̄ ахоси, антопи нагаре раккха̄ сусам̣вихита̄ ахоси, бахипи нагаре раккха̄ сусам̣вихита̄ ахоси, антопи джанападе раккха̄ сусам̣вихита̄ ахоси, бахипи джанападе раккха̄ сусам̣вихита̄ ахоси. со кхо ахам̣, бханте, евам̣ раккхито гопито санто бхӣто уббигго уссан̇кӣ утра̄сӣ виха̄сим̣. етарахи кхо пана̄хам̣, бханте, аран̃н̃агатопи руккхамӯлагатопи сун̃н̃а̄га̄рагатопи еко [екако (сйа̄. пӣ.)] абхӣто ануббигго ануссан̇кӣ анутра̄сӣ аппоссукко панналомо парадаттавутто [парадавутто (ка. сӣ. сйа̄. пӣ.)], мигабхӯтена четаса̄ вихара̄ми. имам̣ [идам̣ (сӣ. ка.)] кхо ахам̣, бханте, аттхавасам̣ сампассама̄но аран̃н̃агатопи руккхамӯлагатопи сун̃н̃а̄га̄рагатопи абхиккхан̣ам̣ уда̄нам̣ уда̄неси [уда̄неми (ка.)] – ‘ахо сукхам̣, ахо сукха’’’нти!

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘йассантарато на санти копа̄,

итибхава̄бхаватан̃ча вӣтиватто;

там̣ вигатабхайам̣ сукхим̣ асокам̣,

дева̄ на̄нубхаванти дассана̄йа̄’’ти. дасамам̣;

мучалиндавагго дутийо нит̣т̣хито.