7. екапуттакасуттам̣

17. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена ан̃н̃атарасса упа̄сакасса екапуттако пийо мана̄по ка̄лан̇като хоти.

атха кхо самбахула̄ упа̄сака̄ аллаваттха̄ аллакеса̄ дива̄ дивасса йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинне кхо те упа̄саке бхагава̄ етадавоча – ‘‘ким̣ ну кхо тумхе, упа̄сака̄, аллаваттха̄ аллакеса̄ идхӯпасан̇каманта̄ дива̄ дивасса̄’’ти?

евам̣ вутте, со упа̄сако бхагавантам̣ етадавоча – ‘‘майхам̣ кхо, бханте, екапуттако пийо мана̄по ка̄лан̇като. тена майам̣ аллаваттха̄ аллакеса̄ идхӯпасан̇каманта̄ дива̄ дивасса̄’’ти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘пийарӯпасса̄дагадхита̄се [пийарӯпасса̄тагадхита̄се (сӣ. пӣ.)],

девака̄йа̄ путху манусса̄ ча;

агха̄вино париджунна̄,

маччура̄джасса васам̣ гаччханти.

‘‘йе ве дива̄ ча ратто ча,

аппаматта̄ джаханти пийарӯпам̣;

те ве кхан̣анти агхамӯлам̣,

маччуно а̄мисам̣ дуративатта’’нти. саттамам̣;