5. упа̄сакасуттам̣

15. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена ан̃н̃атаро иччха̄нан̇галако упа̄сако са̄ваттхим̣ ануппатто хоти кеначидева каран̣ӣйена. атха кхо со упа̄сако са̄ваттхийам̣ там̣ каран̣ӣйам̣ тӣретва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо там̣ упа̄сакам̣ бхагава̄ етадавоча – ‘‘чирассам̣ кхо твам̣, упа̄сака, имам̣ парийа̄йамака̄си йадидам̣ идха̄гамана̄йа̄’’ти.

‘‘чирапат̣ика̄хам̣, бханте, бхагавантам̣ дассана̄йа упасан̇камитука̄мо, апи ча̄хам̣ кехичи кехичи киччакаран̣ӣйехи бйа̄ват̣о. ева̄хам̣ на̄саккхим̣ бхагавантам̣ дассана̄йа упасан̇камиту’’нти.

атха кхо бхагава̄ етаматтхам̣ видитва̄ та̄йам̣ вела̄йам̣ имам̣ уда̄нам̣ уда̄неси –

‘‘сукхам̣ вата тасса на хоти кин̃чи,

сан̇кха̄тадхаммасса бахуссутасса;

сакин̃чанам̣ пасса вихан̃н̃ама̄нам̣,

джано джанасмим̣ пат̣ибандхарӯпо’’ти. пан̃чамам̣;