5. кума̄рапетаваттху

453. аччхерарӯпам̣ сугатасса н̃а̄н̣ам̣, саттха̄ йатха̄ пуггалам̣ бйа̄ка̄си;

уссаннапун̃н̃а̄пи бхаванти хеке, париттапун̃н̃а̄пи бхаванти хеке.

454. айам̣ кума̄ро сӣватхика̄йа чхад̣д̣ито, ан̇гут̣т̣хаснехена йа̄пети раттим̣;

на йаккхабхӯта̄ на сарӣсапа̄ [сирим̣сапа̄ (сӣ. сйа̄. пӣ.)] ва̄, вихет̣хайеййум̣ катапун̃н̃ам̣ кума̄рам̣.

455. сунакха̄пимасса палихим̣су па̄де, дхан̇ка̄ син̇га̄ла̄ [сига̄ла̄ (сӣ. сйа̄. пӣ.)] париваттайанти;

габбха̄сайам̣ паккхиган̣а̄ харанти, ка̄ка̄ пана аккхималам̣ харанти.

456. найимасса [на имасса (сйа̄.), нимасса (ка.)] раккхам̣ видахим̣су кечи, на осадхам̣ са̄сападхӯпанам̣ ва̄;

наккхаттайогампи на аггахесум̣ [на уггахесум̣ (ка.)], на саббадхан̃н̃а̄нипи а̄кирим̣су.

457. ета̄дисам̣ уттамакиччхапаттам̣, ратта̄бхатам̣ сӣватхика̄йа чхад̣д̣итам̣;

нонӣтапин̣д̣ам̣ва паведхама̄нам̣, сасам̣сайам̣ джӣвитаса̄васесам̣.

458. тамаддаса̄ девамануссапӯджито, дисва̄ ча там̣ бйа̄кари бхӯрипан̃н̃о;

‘‘айам̣ кума̄ро нагарассимасса, аггакулико бхависсати бхогато ча’’ [бхогава̄ ча (сйа̄. ка.)].

459. ‘‘кисса [ким̣’са (?)] ватам̣ ким̣ пана брахмачарийам̣, кисса сучин̣н̣асса айам̣ випа̄ко;

ета̄дисам̣ бйасанам̣ па̄пун̣итва̄, там̣ та̄дисам̣ паччанубхоссатиддхи’’нти.

460. буддхапамукхасса бхиккхусан̇гхасса, пӯджам̣ ака̄си джаната̄ ул̣а̄рам̣;

татрасса читтассаху ан̃н̃атхаттам̣, ва̄чам̣ абха̄си пхарусам̣ асаббхам̣.

461. со там̣ витаккам̣ павинодайитва̄, пӣтим̣ паса̄дам̣ пат̣иладдха̄ паччха̄;

татха̄гатам̣ джетаване васантам̣, йа̄гуйа̄ упат̣т̣ха̄си саттараттам̣.

462. тасса [там̣’са (?)] ватам̣ там̣ пана брахмачарийам̣, тасса сучин̣н̣асса айам̣ випа̄ко;

ета̄дисам̣ бйасанам̣ па̄пун̣итва̄, там̣ та̄дисам̣ паччанубхоссатиддхим̣.

463. т̣хатва̄на со вассасатам̣ идхева, саббехи ка̄мехи саман̇гибхӯто;

ка̄йасса бхеда̄ абхисампара̄йам̣, сахабйатам̣ гаччхати ва̄савасса̄ти.

кума̄рапетаваттху пан̃чамам̣.