6. серин̣ӣпетаваттху

464. ‘‘нагга̄ дуббан̣н̣арӯпа̄си, киса̄ дхаманисантхата̄;

уппха̄сулике кисике, ка̄ ну твам̣ идха тит̣т̣хасӣ’’ти.

465. ‘‘ахам̣ бхаданте петӣмхи, дуггата̄ йамалокика̄;

па̄пакаммам̣ каритва̄на, петалокам̣ ито гата̄’’ти.

466. ‘‘ким̣ ну ка̄йена ва̄ча̄йа, манаса̄ куккат̣ам̣ катам̣;

кисса каммавипа̄кена, петалокам̣ ито гата̄’’ти.

467. ‘‘ана̄ват̣есу титтхесу, вичиним̣ ад̣д̣хама̄сакам̣;

сантесу деййадхаммесу, дӣпам̣ на̄ка̄симаттано.

468. ‘‘надим̣ упеми тасита̄, риттака̄ париваттати;

чха̄йам̣ упеми ун̣хесу, а̄тапо париваттати.

469. ‘‘аггиван̣н̣о ча ме ва̄то, д̣аханто упава̄йати;

етан̃ча бханте араха̄ми, ан̃н̃ан̃ча па̄пакам̣ тато.

470. ‘‘гантва̄на хаттхиним̣ пурам̣, ваджджеси майха ма̄тарам̣;

‘дхӣта̄ ча те майа̄ дит̣т̣ха̄, дуггата̄ йамалокика̄;

па̄пакаммам̣ каритва̄на, петалокам̣ ито гата̄’.

471. ‘‘аттхи ме еттха никкхиттам̣, анаккха̄тан̃ча там̣ майа̄;

чатта̄рисатасахасса̄ни, паллан̇касса ча хет̣т̣хато.

472. ‘‘тато ме да̄нам̣ дадату, тасса̄ ча хоту джӣвика̄;

да̄нам̣ датва̄ ча ме ма̄та̄, даккхин̣ам̣ анудиччхату [анудиссату (сӣ. пӣ.), анва̄диссату (сйа̄.)];

тада̄хам̣ сукхита̄ хессам̣, саббака̄масамиддхинӣ’’ти.

473. ‘‘са̄дхӯ’’ти со пат̣иссутва̄, гантва̄на хаттхиним̣ пурам̣;

авоча тасса̄ ма̄тарам̣ –

‘дхӣта̄ ча те майа̄ дит̣т̣ха̄, дуггата̄ йамалокика̄;

па̄пакаммам̣ каритва̄на, петалокам̣ ито гата̄’.

474. ‘‘са̄ мам̣ таттха сама̄дапеси, ( ) [(гантва̄на хаттхиним̣ пурам̣) (сйа̄. ка.)] ваджджеси майха ма̄тарам̣;

‘дхӣта̄ ча те майа̄ дит̣т̣ха̄, дуггата̄ йамалокика̄;

па̄пакаммам̣ каритва̄на, петалокам̣ ито гата̄’.

475. ‘‘аттхи ча ме еттха никкхиттам̣, анаккха̄тан̃ча там̣ майа̄;

чатта̄рисатасахасса̄ни, паллан̇касса ча хет̣т̣хато.

476. ‘‘тато ме да̄нам̣ дадату, тасса̄ ча хоту джӣвика̄;

да̄нам̣ датва̄ ча ме ма̄та̄, даккхин̣ам̣ анудиччхату ( ) [(тато тувам̣ да̄нам̣ дехи, тасса̄ даккхин̣ама̄дисӣ) (ка.)];

‘тада̄ са̄ сукхита̄ хессам̣, саббака̄масамиддхинӣ’’’ти.

477. тато хи са̄ да̄намада̄, тасса̄ даккхин̣ама̄дисӣ;

петӣ ча сукхита̄ а̄си, тасса̄ ча̄си суджӣвика̄ти.

серин̣ӣпетаваттху чхат̣т̣хам̣.