13. содханаха̄равибхан̇го

45. таттха катамо содхано ха̄ро? ‘‘виссаджджитамхи пан̃хе’’тига̄тха̄. йатха̄ а̄йасма̄ аджито па̄ра̄йане бхагавантам̣ пан̃хам̣ пуччхати –

‘‘кенассу нивуто локо, кенассу наппака̄сати;

кисса̄бхилепанам̣ брӯси, ким̣су тасса махаббхайа’’нти.

‘‘авиджджа̄йа нивуто локо, [аджита̄ти бхагава̄]

вивиччха̄ пама̄да̄ наппака̄сати;

джаппа̄бхилепанам̣ брӯми, дуккхамасса махаббхайа’’нти.

‘‘кенассу нивуто локо’’ти пан̃хе ‘‘авиджджа̄йа нивуто локо’’ти бхагава̄ падам̣ содхети, но ча а̄рамбхам̣. ‘‘кенассу наппака̄сатӣ’’ти пан̃хе ‘‘вивиччха̄ пама̄да̄ наппака̄сатӣ’’ти бхагава̄ падам̣ содхети, но ча а̄рамбхам̣. ‘‘кисса̄бхилепанам̣ брӯсӣ’’ти пан̃хе ‘‘джаппа̄бхилепанам̣ брӯмӣ’’ти бхагава̄ падам̣ содхети, но ча а̄рамбхам̣. ‘‘ким̣су тасса махаббхайа’’нти пан̃хе ‘‘дуккхамасса махаббхайа’’нти суддхо а̄рамбхо. тена̄ха бхагава̄ ‘‘авиджджа̄йа нивуто локо’’ти.

‘‘саванти саббадхи сота̄, [ичча̄йасма̄ аджито]

сота̄нам̣ ким̣ нива̄ран̣ам̣;

сота̄нам̣ сам̣варам̣ брӯхи, кена сота̄ пидхӣйаре’’ти.

‘‘йа̄ни сота̄ни локасмим̣, [аджита̄ти бхагава̄]

сати тесам̣ нива̄ран̣ам̣;

сота̄нам̣ сам̣варам̣ брӯми, пан̃н̃а̄йете пидхӣйаре’’ти.

‘‘саванти саббадхи сота̄, сота̄нам̣ ким̣ нива̄ран̣а’’нти пан̃хе ‘‘йа̄ни сота̄ни локасмим̣, сати тесам̣ нива̄ран̣а’’нти бхагава̄ падам̣ содхети, но ча а̄рамбхам̣. ‘‘сота̄нам̣ сам̣варам̣ брӯхи, кена сота̄ пидхӣйаре’’ти пан̃хе ‘‘сота̄нам̣ сам̣варам̣ брӯми, пан̃н̃а̄йете пидхӣйаре’’ти суддхо а̄рамбхо. тена̄ха бхагава̄ ‘‘йа̄ни сота̄ни локасми’’нти.

‘‘пан̃н̃а̄ чева сати ча, [ичча̄йасма̄ аджито]

на̄марӯпан̃ча [на̄мам̣ рӯпан̃ча (ка.) пасса су. ни. 1042] ма̄риса;

етам̣ ме пут̣т̣хо пабрӯхи, каттхетам̣ упаруджджхатӣ’’ти.

пан̃хе –

‘‘йаметам̣ пан̃хам̣ апуччхи, аджита там̣ вада̄ми те;

йаттха на̄ман̃ча рӯпан̃ча, асесам̣ упаруджджхати;

вин̃н̃а̄н̣асса ниродхена, еттхетам̣ упаруджджхатӣ’’ти.

суддхо а̄рамбхо. тена̄ха бхагава̄ ‘‘йаметам̣ пан̃хам̣ апуччхӣ’’ти. йаттха евам̣ суддхо а̄рамбхо, со пан̃хо висаджджито бхавати. йаттха пана а̄рамбхо асуддхо, на та̄ва со пан̃хо висаджджито бхавати. тена̄ха а̄йасма̄ маха̄качча̄йано ‘‘виссаджджитамхи пан̃хе’’ти.

нийутто содхано ха̄ро.